Á þessu ári eru 100 ár liðin frá fæðingu Selmu Kaldalóns, en hún fæddist 27. desember 1919, fjórða og yngsta barn Sigvalda Kaldalóns, tónskálds og læknis, og konu hans, Karenar Margrethe. Selma var eina barn Sigvalda sem lagði stund á tónlist, hún samdi sjálf lög og í tilefni af aldarafmælinu er þátturinn helgaður henni. Flutt eru lög eftir Selmu og rætt verður við dóttur hennar, Margréti Kaldalóns. Einnig verða flutt brot úr viðtali sem Pétur Pétursson tók við Selmu árið 1976. Umsjón með þættinum hefur Una Margrét Jónsdóttir og lesari er Ragnhildur Thorlacius.

Tónlist eftir Leopold Mozart, föður hins fræga tónskálds Wolfgangs Amadeusar Mozart er leikin í þættinum. Leopold fæddist 1719 og lést 1787. Flutt verður kammersinfónía hans í D-dúr og þættir úr Leikfangasinfóníu hans og trompetkonsert. Einnig verður leikin fyrsta sinfónía Wolfgangs Amadeusar Mozart sem hann samdi 8 ára gamall. Hann samdi verkið haustið 1764 þegar faðir hans var veikur og ekki mátti leika á hljóðfæri vegna þess að sjúklingurinn þurfti að hafa næði. Umsjón með þættinum hefur Una Margrét Jónsdóttir.

Í tilefni af 100 ára ártíð Jóhanns Sigurjónssonar skálds verður flutt tónlist við ljóð hans og texta. Af þekktum lögum við ljóð Jóhanns má nefna þjóðlagið "Sofðu, unga ástin mín" og lög Markúsar Kristjánssonar og Eyþórs Stefánssonar við ljóðið "Bikarinn", en einnig verða flutt minna þekkt lög, eins og til dæmis "Hvíslar mér hlynur" eftir Jón Ásgeirsson. Þá verður flutt lag sem eitt frægasta tónskáld Dana, Carl Nielsen, samdi fyrir frumsýningu á leikriti Jóhanns "Mörður Valgarðsson" hjá Konunglega leikhúsinu í Kaupmannahöfn árið 1918. Lesarar í þættinum eru Leifur Hauksson og Vera Illugadóttir. Umsjón með þættinum hefur Una Margrét Jónsdóttir.

Flutt verða tónverk sem Franz Schubert samdi árið sem hann lést, 1828, en hann var þá 31 árs að aldri. Meðal annars verður leikinn kafli úr strengjakvintett hans í C-dúr D.956, en það var síðasta kammerverk Schuberts og þykir vera eitt besta kammerverk tónlistarsögunnar fyrr og síðar. Einnig verður flutt verkið „Auf dem Strom“ fyrir söngrödd, píanó og horn. Þá verða flutt ýmis sönglög frá árinu 1828, þar á meðal tvö sem voru gefin út eftir dauða Schuberts í söngvaflokknum „Svanasöng“. Umsjón með þættinum hefur Una Margrét Jónsdóttir.

Það hefur víst ekki farið fram hjá mörgum Íslendingum að á síðasta áratug hefur erlend hátíð numið land á Íslandi, „Hrekkjavaka“ sem er haldin 31. október. Fluttar verða tónsmíðar sem tengjast hrekkjavöku, meðal annars „Halloween“ eftir Charles Ives og tónlist eftir Conrad Salinger og Roger Edens við hrekkjavökuatriði kvikmyndarinnar „Meet me in St. Louis“ frá 1944. Þó að hátíðin sé ný hér á Íslandi er til íslensk hrekkjavökusaga sem var skrifuð á árunum 1919-20 og í þættinum verða lesnir kaflar úr henni. Hún er eftir vestur-íslenska rithöfundinn Jóhann Magnús Bjarnason, en Vestur-Íslendingar kynntust hrekkjavöku snemma í hinum nýju heimkynnum sínum vestra og héldu jafnvel upp á hana sjálfir. Lesari í þættinum er Jóhannes Ólafsson og umsjónarmðaur Una Margrét Jónsdóttir.

Fyrir skömmu var Víkingur Heiðar Ólafsson píanóleikari útnefndur listamaður ársins af breska tónlistartímaritinu Gramophone. Þetta eru ein virtustu tónlistarverðlaun sem um er að ræða. Leiknar verða hljóðritanir með öðrum tónlistarmönnum sem hafa hlotið titilinn "listamaður ársins" hjá Gramophone. Má þar nefna Luciano Pavarotti, Pierre Boulez, Anne Sofie von Otter og Hilary Hahn. Umsjón með þættinum hefur Una Margrét Jónsdóttir.

Fjallað er um Clöru Schumann, en á þessu ára eru 200 ár frá fæðingu hennar. Clara var eiginkona tónskáldsins Roberts Schumann og hann tileinkaði henni mörg af verkum sínum. Hún var líka tónskáld sjálf og einn besti píanóleikari 19. aldar. Í þættinum verða leikin verk eftir Clöru og sagt verður frá ævi hennar sem var afar viðburðarík. Una Margrét Jónsdóttir hefur umsjón með þættinum og lesarar eru Björn Þór Sigbjörnsson og Anna Marsibil Clausen.