L'orchesterAcordas da la Scola da musica Surselva ha sunà a Falera. Dapi curt ha la Scola da musica Surselva era in orchester. 18 scolarAs d'instruments a corda dals magisters Oana Camartin, Mathias Kleiböhmer e Christian Barenius emprendan en questa furmaziun da tadlar in sin l'auter, da sunar ensemen, da far musica en il collectiv.

Il resultat han els mussà la sonda dals 16 da zercladur a Falera en la fermata. En quest concert èn era las trais scolaras da clavazin: Mona Senn, Lisa Maria Cabalzar ed Anna Tina Ernst sa preschentadas. E sco osp ha l'Aita Gaudenz da Favugn sunà Chopin. L'Artg porta questas producziuns.

Redacziun: Giusep G. Decurtins

Mario Pacchioli è stà giast en il Kiosque à musiques da RTS. Le Kiosque à musiques è la pli derasada emissiun da musica popular-tradiziunala en la Svizra franzosa. La sonda dals 19 da matg è Mario Pacchioli stà giast.

En quest'emissiun directa da Fribourg ha Mario fatg musica ensemen cun il pianist Gieri Maissen, ils chantauturs Pascal Gamboni e Laurent Brunetti ed el ha chantà ensemen cun La Chanson de Fribourg. Era scolaras e scolars dal Collège Ste-Croix Fribourg han chantà e sunà.

L'Artg musical porta parts da quest Kiosque à musiques deditgà a Mario Pacchioli ed a sias cumposiziuns.

Mintga sis onns envida l'Uniun chantunala da chant a sia festa. La 26avla Festa da chant chantunala dal Grischun ha gì lieu dals 8-10 da zercladur a Chiavenna (Italia). 116 chors dal Grischun, da la Svizra Bassa e da la Lumbardia èn stads presents. En il rom da questa festa han era 6 concerts gì lieu. RTR ha registrà tuttas producziuns da patg ed ils concerts. L Artg musical porta insatgs da dus concerts. Ils interperts: 3 chors da giuvenils da renum: il Chor svizzer da giuvenils (dir. Gonzague Monney), il Coro giovanile Italiano (dir. Carlo Pavese) ed il Chor da giuvenils grischun (dir. Martin Zimmermann).

redacziun: Giusep G. Decurtins

Questa fin d'emna è Chiavenna il lieu ospitant da la 26avla Festa da chant chantunala. 116 chors dal Grischun, da la Svizra Bassa e da la Lumbardia sa participeschan a questa festa. En quatter baselgias vegnan las chanzuns da patg dadas, en auters lieus e sin piazzas vegn chantà liber. D'udir èn era sis concerts da festa.

RTR è da la partida, registrescha las producziuns da patg e rapporta da la festa. Il segund Artg musical spezial da Chiavenna porta impressiuns da la festa, discurs cun chantadurAs ed emprimas chanzuns da patg.

Questa fin d'emna è Chiavenna il lieu ospitant da la 26avla Festa da chant chantunala. Mintga sis onns envida l'Uniun chantunala da chant a sia festa. La 26avla ha lieu dador il cunfin dal Grischun, a Chiavenna (Italia). Sco organisaturs segnan il Cor viril Samedan ed il Coro Eco del Mer (IT). 116 chors dal Grischun, da la Svizra Bassa e da la Lumbardia sa participeschan. Tge spetgan chantadurAs e dirigents da questa festa? En in emprim Artg musical spezial da Chiavenna datti respostas.

Ils 13 da matg è Gion Jäger mort a Savognin en la vegliadetgna da 68 onns. «La voce di Gion è come una Ferrari» Maestro Nicolas Giusti da Roma ha ditg quai 1995 suenter lavur intensiva cun Gion Jäger. Il resultat da questa lavur: in dc intitulà «Jäger canta Verdi». Gion chantadur - pir cun 30 onns è el sa decidì da far il pass en il mund dal chant d'opras. Studis autodidacts e lavur intensiva tar Rina del Monaco, Carlo Bergonzi, Pavel Chaloupka e Nicolas Giusti han furmà el ad in bariton dramatic ideal per l'opera taliana. Gronds success ha el gì ils onns 1994-1996 a l'Opera da Dijon (Nabucco, La Traviata, I Puritani, Il Trovatore e Macbeth). Ils ultims onns ha Gion chantà be sporadicamain en circuls pli stretgs. Ina da las grondas, voluminusas vuschs rumantschas n'è betg pli! L'Artg musical sa regorda da Gion chantadur cun emetter parts d'in concert ed in profil dal 1994.

redsacziun: Giusep G. Decurtins

«Eu sun fich grata ed eir onurada d'avair pudü esser part dal concert da la musica da Tschlin». Per la chantadura Sara-Bigna Janett è quest concert stà «ün sömmi ch'i s'haja accumpli». RTR ha registà il concert la dumengia dals 8 d'avrigl a Tschlin. Sut las batgettas da Duri Janett e Curdin Caviezel ha la musica sunà 15 titels. Tar trais ha Sara-Bigna chantà e fascinà in grond publicum (selecziuns da: Der Vogelhändler (Carl Zeller) e May fair Lady (Frederich Loewe) ed ord: Giuditta «Meine Lippen, si küssen so heiss» (Franz Lehar). Moderatur: Gian Janett. L'Artg musical porta parts da quest concert detg spezial.

A l'11avel Festival europeic a Basilea chantan 18 chors da giuvenils da 10 divers pajais. Dals 9 fin 13-05-2018 ha quest festival europeic gì lieu. RTR ha registrà 5 concerts ed organisà – en num da la SSR SRG – là a Basilea sin il Münsterplatz in inscunter chantic.

La sonda èn sis chors sa participads. Trais esters: Vox aurea Finlanda, Sotto voce Frantscha e Swerdlowsk Russi; lura trais svizzers: Fribourg, Muttenz ed incantanti dal Grischun. Quest'emissiun interregiunala han moderà: Beat Tschümperlin (SRF MW), Olivier Bosia (RSI), Charlène Lebois (RTS) e Hugo Schär (RTR). L'Artg musical porta impressiuns da quest event chantic.

A l'11avel Festival europeic chantan 18 chors da giuvenils da 10 differents pajais. 10 chors d'uffants e da giuvenils da l'Europa (Danemarc, Finlanda, Frantscha, Israel, Portugal, Russia, Svezia, Slovenia, Spagnia ed Ungaria), 7 chors svizzers ed il chor ospitant da l'Africa dal Sid han dà 40 concerts a Basel e conturns.

Dals 09 fin ils 13-05-2018 ha quest festival europeic gì lieu. RTR ha registrà 5 concerts ed organisà – en num da la SSR SRG – là a Basel sin il Münsterplatz inscunters da chant.

L'Artg musical porta impressiuns da quest event chantic da qualitad extraordinaria.

redacziun: Giusep G. Decurtins

L'Artg musical – in magasin cun dus temas: 1. Las Randulinas – trais dunnas che fan ina musica pli speziala: Eva-Maria Boppart, flauta traversa (Luzern); Ruth Suppiger, clarinetta (Turbenthal/ZH) e Sidonia Caviezel, accordeon

(Martina/Engiadina Bassa). Dad ellas trais udin nus registraziuns fatgas da RTR. Giast en l'Artg musical è Sidonia Caviezel.

2. Chant e musica per dis pli chauds: Furmaziuns indigenas dechantan la primavaira. Nus udin: il Chor masdo Surmeir (dir. G.G. Derungs), il Chor viril Lumnezia (dir. Marcus Zarn), il Chor Surselva (dir. Rest G. Tuor) e musica instrumentala.