Por quinto ano consecutivo, o COMO QUE NON?! celebra un programa especial de case tres horas no que van despedir o 2021 e celebrar o 2022. Carlos Tresandí vai exercer de mestre de cerimonias nun episodio no que as convidadas serán Lucía Veiga e Marita Martínez, ou o que é o mesmo: as Izquierdo Sisters. Van improvisar nun reto moi especial que lles temos preparado. E ademais, tódalas seccións habituais do programa estarán presentes neste especial: Efemérides Aleatorias, Consultorio Capelán Contesta, Museo Mutante, Cinema Paquitof e O Camaleón. O especial é que, os colaboradores vanse INTERCAMBIAR AS SECCIÓNS. Veremos que sección é asignada a Alejandro Martínez "Pini", Fernando RqR, Pepe Capelán, Fran Rodríguez e Dani Lorenzo. O que si prometemos é a estrea da Panxoliña do Nadal 21/22 de Fernando RqR e unha edición ESPECIAL de @s Todólog@s na que todo o equipo do programa e as nosas convidadas van recordar ese momento audiovisual navideño que lles quedou forxado a lume nas cabezas. E como guinda ao pastel, teremos FELICITACIÓNS de máis de 15 artistas que quixeron pasar polo programa para desexarnos un ano novo... Algunha das felicitacións é unha sorpresa gorda! Entramos no 2022 co COMO QUE NON?! nesta 5G!

No Episodio 7 da 5G, recibimos ao noso compañeiro Pedro Pablo Alonso que deixa momentaneamente Ao Contraataque para pasar unha hora connosco. Terá que enfrontarse a unha proba inusual de narración deportiva e por fin saberemos que relación une a Pedro Pablo cos nosos colaboradores Fran Rodríguez e Alejandro Martínez "Pini". Pepe Capelán volve abrir un novo Consultorio Capelán Contesta contestando unha pregunta que nos chega desde Uruguai. Ademais, Fernando RqR chegará a tempo para despedir o programa, Carlos Tresandí recomendará un novo xogo de mesa e Dani Lorenzo estará preparado para coller o micro a pé de campo. E para rematar o programa, recibimos a Ari Magritte que ven interpretarnos un tema do seu último traballo Oráculo titulado "Luna y Sol ".

No Episodio 6 da 5G, despedimos a Alberto Cunha, que nos vai acompañar na nosa sección de debate "@s Todólog@s", onde o tema a discutir é seleccionado ao chou entre os moitos que nos propón a audiencia. Ademais, volve Dani Lorenzo cunha nova edición de Cinema Paquitof e Fernando RqR volverá sorprendernos co segundo pase do 'Camaleón'. Carlos Tresandí recomenda hoxe o Dixit Oddisey como proposta de xogo de mesa da semana. Fran Rodríguez e Pepe Capelán apuntarán o que sexa preciso durante o transcurso do episodio e The Three Roosters conclúen o seu periplo polo programa interpretando en rigoroso directo o seu tema 'End of the reason'.

Neste Episodio 5 da 5G, Fran Rodríguez volve abrir o seu Museo Mutante para amosarnos unha peza de colección que toma os martinis axitados, non revoltos. Ademais Alberto Cunha vai tentar superar os 31 puntos de María Xosé Rodríguez no Concurso 5G . Como é habitual, volven as Efemérides Aleatorias de Pini, Carlos Tresandí volve recomendarnos un xogo de mesa, neste caso o UGHA BUGHA. Dani Lorenzo e Pepe Capelán estarán atentos a todo o que aconteza no programa e The Three Roosters interpretarannos en directo o tema "Get Side"

No Episodio 4 desta 5G recibimos no programa a Alberto Cunha, que ademais de falar connosco da súa carreira vai participar no concurso "A túa cara non me soa pero a túa voz case que si, creo... ou algo". Ademais, Carlos Tresandí volverá recomendar un novo xogo de mesa, Pepe Capelán ten nova consulta no CCC desta vez do outro lado do charco... E ten que ver con Fernando RqR... Alejandro Martínez "Pini" continúa analizando Efemérides Aleatorias. Acompáñannos os habituais Fran Rodríguez e Dani Lorenzo e no apartado musical recibimos ao trío The Three Roosters (Gilberto Misa:guitarra, Bruno F. Fresco: voz e armónica, Fran Sánchez: baixo) que hoxe nos interpretan un tema propio titulado "Our summer go"

No terceiro episodio da 5G do Como Que Non?! Carlos Tresandí despide o paso de María Xosé Rodríguez, non sen antes convidala a formar parte do novo Debate ao Chou do programa no que participará todo o equipo. Será unha jam session na que se enfrontarán a un tema escollido ao chou entre moitos dos propostos pola audiencia. Ademais, volve Fernando Rqr coa súa nova sección: O Camaleón. E si, vai cantar... En Cinema Paquitof con Dani Lorenzo analizaremos como titularon grandes clásicos do celuloide noutros países nunha sección na que ides sorprendervos. Teremos Efemérides Aleatorias con Alejandro Martínez "Pini". Pepe Capelán e Fran Rodríguez estarán quecendo por se teñen que saír e, para rematar, Los EP (Alberto & Andrés Cunha e Chus Dasilva), interpretarannos EN DIRECTO unha magnífica versión dos míticos Lone Star: `Comprensión´.

Neste segundo episodio da 5G, a nosa convidada María Xosé Rodríguez enfróntase ao novo concurso do programa: o CONCURSO 5G (ao xefe non se lle ocorreu un título mellor). E si, amigos e amigas, unha tempada máis Carlos Tresandí ten que explicar a mecánica sufrindo o escarnio e maldicer dos colaboradores habituais: Fernando RqR, Pepe Capelán e Dani Lorenzo. Ademais inauguramos o Museo Mutante de Fran Rodríguez que nesta ocasión vai ofrecernos dúas pezas da súa colección bizarra; adiantamos que son peluches terroríficos. Alejandro Martínez "Pini" volverá enfrontarse a unhas efemérides aleatorias e no apartado musical, Los EP (Alberto & Andrés Cunha e Chus Dasilva) vannos interpretar EN RIGOROSO DIRECTO unha versión do tema `Massachusetts´ dos míticos Bee Gees."

Chegou o momento! POR FIN volve o COMO QUE NON?! cunha convidada de luxo e que non nos visitaba desde a Sison 3: María Xosé Rodríguez. Ela e Carlos Tresandí recordarán vellos tempos. Ademais volve o CCC de Pepe Capelán que seguirá atendendo as consultas dos oíntes, coma a dun oínte galego que vén de retornar de Madrid. Está de volta o noso director de contidos Fran Rodríguez despois de varios meses en Honduras. Dani Lorenzo incorpórase á nómina de colaboradores. Alejandro Martínez "Pini" continúa aos mandos da dirección técnica e este ano terá que enfrontarse a Efemérides Aleatorias. Fernando RqR está chegando e continúa por quinta tempada consecutiva no programa. Hai chamada telefónica que atende Carlos Tresandí e música en directo con Los EP (Alberto Cunha, Andrés Cunha e Chus Dasilva) versionando un tema de Los Brincos: "Tú me dijiste adiós".