De Döschkassen

By Heiko KrollComedy Society & Culture News News Commentary

De Döschkassen episodes

July 10, 2025 De lange Bank
Wenn man vun Breiholt no Rendsborg an Noord-Ostsee-Kanol langfohrt, denn kümmt man no ‘n Tied an den Moltkesteen vörbi. An den Steen, de för den Generol Moltke opstellt wurr.
Den Generol also, de vun Kaiser Wilhelm II, den Opdrag kreegen hett, de Buuarbeiden vun den Kaiser-Wilhelm-Kanol to beopsichtigen. De Kanol, de intwüschen je Nord-Ostsee-Kanol oder internatschonol Kiel-Kanol heeten deiht.
Un de dorste Kanol, de uns Dithmarschers je tosom mit de Noordsee, de Elv, de Eider un den Gieselau-Kanol to echte Insulaners mokt hett, de dorste Konol hett je recht ‘n poor Besünnerheiten.
Nu is de NOK je jüst stolte 130 Johr old worrn.
Overs – na jo – old warrn geiht je bi jedeneen vun uns nu mol ganz vun alleent. Dorüm kümmt wi to de näste Besünnerheit vun den Kanol.
Un de Besünnerheit hett mit de Streck mang den Moltkesteen un Rendborg to kriegen. To’n een‘ markeert de Moltkesteen ganz genau de Meern vun‘ Kanol mang Brunsbüttel un Kiel.
To’n annern fangt achter den dorsten Steen ‘n Streck an, op de man ‘n ganze Tied blang den Kanol un de Eider ünnerwegens is. Dat gifft dat so blots eenmol in Sleswig-Hulsteen.
Overs denn, wenn man noch ni ganz in Rendsborg is, kann man sehn, wat ick meen: Dor is nömli op unse Sied vun Kanol ‘n ganz lange Bank.
Siet 2014 is de dorste Bank ni ganz 576 Meters lang. Un dormit is dat de längste Bank vun de Welt, de op Duuer anleggt is.
So’n lütt beten schoodt finn ick, dat de Bank in Rendsborg un ni in Borg oder Brunsbüttel steiht. Overs weil se an Kanol is, hebbt wi Dithmarschers je doch ‘n Verbinnung dorto.
Un wat ick an düsse Besünnderheit so interessant finn, dat is dat, wat nu kom‘ deiht:
Wenn man överleggt to heiroden oder wenn man sick mit’n anner bedüüdende Entscheedung afmööht, sick overs doch noch ni würkli seeker is, denn kann man eenfach no Rendsborg an Kanol fohrn un düsse Entscheedung so richti scheun op de „lange Bank“ schuuven…
In düssen Sinn
3 min
July 03, 2025 Klimawannel is anstrengend
Also, ick doh mi je swor dormit över’t Wöller to schrieven. Overs no Middeweeken vun düsse Week, mutt ick doch mol ’n Utnohm moken.
Dor weer ick mit’n Reisebus in Flensborg, un wiel mien Fohrgäste mit ’n Schipp op de Förde ünnerwegens weern, heff ick op ’n Parkplatz stohn, bummeli teihn Kilometers vun Flensborg wech. Dat weer de eenzige Placken den ick finnen kunn, an den weenstern ’n beten Schatten weer, üm dor den Bus ünnertostelln.
So. Un dor heff ick nu stohn. Vun morns Klock teihn bet obends Klock halvi söben.
As ick ankeem weern buten 29 Grod. Hett ni lang duuert dor weern dat 33 Grod. Ick kunn gor ni so veel suupen as ick sweet‘ heff.
Nomeddags hett dat mol kort ’n beten reegend, overs köhler wurr dat dorvun ook ni. Blots schwül. Intwüschen keem mi al meist de Damp ut de Ohrn. Nu stunn ick je an ’n Steed , vun det ut no vöör un achter fief Kilometer nix keem. Keen Dörp, keen Tanksteed, no de man mol even henloopen kunn. Gor nix. Un wat heff ick mi no ’n Ies sehnt. Vanille, Pistazie oder eenfach blots ’n Woteries – ach wat ’n Ieswürfel harr mi langt. Ick harr al meist Fata Morganas vör mien binnered Oog.
Overs dat Enn vun’t Tööven keem je nähger. Un denn weer’t sowiet. Bus ansmieten, Klimaanlog op Notfall-Vulldamp un af no mien Lüüd, de vun See keem.
Dor seggt de Chef vun de Mannschop doch glatt: „Du harst je ook mit op’t Schipp kom‘ kunnt. Dor weer dat good uttoholn.“ Un dat hett he obends seggt – no dat ganze Tööven in de Hitten. An leevsten harr den dorsten Spooßvogel direkt in de Flensbörger Förde smeeten.
Annerlei. Nu gung dat je in‘ angenehm klimatiseerten Bus weller trüch no Dithmarschen.
Op de halve Streck no Husum wurrn de Wulken overs ümmer dichter un swatt as de Nacht. Un denn keem dat Gewitter un de dicke Reegen. As wi in Dithmarschen ankeem‘ weer dat mit mol 19 Grod kold. Dor stunn mi de Sinn eher no’n anstännigen Grog.
Jungedi. Ganz scheun anstrengend, so’n Klimawannel…

In düssen Sinn
3 min
June 27, 2025 Petri Heil
Mien Madam un ick sünd jüst dorbi ’n Angelschien to moken, ’n Fischerieschien, as dat richti heet.
As ick so twölf, dörteihn Johr jung weer, heff ick af un to je mol so’n lütt beten swatt angelt. Dat gung ook ohne Zeddel, weil mi ’n Fründ wiest hett, wo man dat mokt.
So, un nu schall dat weller losgohn, overs even legol. Dat gifft je veele Lüüd, de den dorsten Schien hebbt. So swor kann dat also gor ni ween, heff ick dacht.
Dor heff ick de Reeken overs ohne den Fischwirt mokt. Jungedi, wat man dor allns weeten mutt, dat heff ick ni ohnt. Fröher hebbt de angohnden Anglers je ’n poor Weekenenn verkloogfiedelt kreegen, wat se för de Prööfung weeten musst hebbt. Intwüschen kann man dat overs ook över’t Internet moken. Dat doht mien Seute un ick ook.
Ick weer toerst mit den Stoff dör. Dor gifft dat de allgemeine Fischkunn‘ mit Krankheiten un Fischfamieljen un all sowat, de Hege- un Gewässerkunn, de Tier-, Natuur- un Ümweltschutz. Denn kümmt de Gerätekunn, de Gesetzeskunn un de spezielle Fischkunn‘ dorto.
Bummeli 50 ünnerscheedliche Fischoarten mutt man ütn’een holn köön‘. Dat is ganz scheun figeliensch, dor kann man düchti in Tüddel kom‘. Un wat för Nooms de Fisch‘ hebbt: Vun Schlammpeitzger, Moderlieschen oder Zährte harr ick vörher noch överhaupt nix heuert.
Un vun Parasiten as den Ergasylus oder de Karpenluus jüst so weni.
Donnerwetter, wenn ick den ganzen Krom op’n Kassen heff, kann ick direkt ’n Praxis as Tierarzt opmoken.
Mi dücht meist, dat mien Busföhrerschien ni so swor ween is.
Dorüm seh‘ ick Anglers intwüschen mit ganz annere Oogen.
Bi de ersten beiden Probeprööfungen an‘ PC bün ick mit Pauken un Trompeten un Blockfleuten dörfulln.
As ick noch swatt angelt heff, kunn ick irgendwie veel beter utwänni lehrn. Mutt an’t Öller liggen.
Dat gifft jedenfalls noch veel to dohn, bet to unsen Prööf-Termin Midde Juli.
Un wenn dat tatsächli henhaut, denn ward uns dat erste „Petri Heil“ wiss mit ’n ganz groote Erleichterung över de Lippen kom‘…
In düssen Sinn
3 min
June 19, 2025 Anner Lüüd Ledder…
Middeweeken keem dör de Medien, dat unsen Ministerpräsident Daniel Günther de Verantwoordung för den Plünnkroom mit de Northvolt-Fabrik bi Heid‘ övernehmt, de nu je ni mehr to Enn buut ward.
Dat finn ick je schier, dat Günther seggt, wat he för de Fehlers insteiht, de dorto föhrt hebbt, dat Sleswig-Hulsteen tosom mit den Bund rund een Milliarde an Stüüergeld ruthaut hett, üm de dorste Fabrik to buun.
Overs wo weer dat noch? In‘ März 2024 keem‘ Günther un Kanzler Scholz, Robert Habeck, de Northvolt-Chef Peter Carlsson, Veronika Wand-Danielsson vun de schwedische Botschop un Christoph Vogler vun Boßelvereen Heid-Rüßdörp tosom um vergnögt den Buubeginn vun de Batterie-Fabrik antoboßeln.
Vörher wurr noch mit Ingelstungen op de Gemeendevertreters vun Noorwöhrn insnackt, dat se jo blots dorvör stimmen wurrn, de Fabrik buun to loten.
Stellt sick vör, dat in Noorwöhrn keen Mehrheit tostann kom‘ weer. De Gemeendevertreters wurrn se nu wohrschienli ’n Dinkmol opstelln.
Annerlei, dat keem, as dat kom‘ is.
Overs wat weer dat denn överhaupt vör’n Firma – Northvolt?
Grünnd‘ worrn is dat schwedische Ünnernehm 2016. Un 2018 gung de Buu vun de Fabriken in Schweden los. Overs de Finanzeerung vun den ganzen Krom weer dormols al recht knupperi. Tosom mit VW schull je ook in Salzgitter ’n Batteriefabrik buut warrn, overs dor hett Volkswogen al 2020 ehr Iesen ut‘ Füüer trocken.
Hmm. Dat is je gediegen. Wenn man in wat investeert, denn doch in ’n Idee, achter de Lüüd stoht, de sick mit dat utkinnt, wat se wüllt.
Overs Auto-Akkus, de tatsächli so funktschoneert as se schulln, sünd bet to de Pleite vun Northvolt ni vun’t Band loopen.
Tscha. Un wenn Daniel Günther nu seggt, dat he dat verbuckt hett, mutt he denn nu kieken, wat he genog Euros in de Knipp hett, üm dat trüch to betohln? Nä, seeker ni.
As Politiker kann man dat Geld vun de Börgers utgeeven as man lusti is.
So is dat ole Spreekwoord doch wohr: Ut anner Lüüd Ledder lött sick good Reemen snieden…

In düssen Sinn
3 min
June 12, 2025 Wokeen hett de Schuld?
Fröher in‘ Geschichsünnerricht in de School kunn ick nix dormit anfang‘, wenn de Schoolmaster seggt hett, dat groote Völker, dat ganze Zivilisatschoon‘ „ünnergohn“ sünd.
De Babyloniers, de Sumerers, de Maya, dat ole Ägypten un ganz besünners dat Römische Riek.
De Römers hebbt vör 2000 Johr al Städte ut Betong buut, un ’n grooten Deel vun Europa un de Gegend rund üm’t Middelmeer mit Strooten tosombröcht. De harrn ’n hoge Kultur un bet op de moderne Technik harrn de al veel vun dat, wat wi hüüt ook hebbt. Annerlei, in Rom gung irgenwann dat Licht ut un Europa is in’t düstere Middelöller fulln.
Nu weer mi klor, dat all de grooten Rieke ni ut ’n Överraschungsei keem‘. De hebbt ehr Stootsgebiet „erobert“. De hebbt Krieg föhrt, wenn de Lüüd ut ’n Gegend sick ni friewilli an’t niede Riek anslüüten wulln.
De Reeken weer ganz eenfach: Wokeen de stärkste Armee mit de besten Waffen harr, de hett dat Seggen hatt.
Liekers kunn ick in mien Schooltied ni verstohn, worüm so’n Riek, dat sick so möhsom no boben prügelt hett, toletzt opholn hett to existeern.
Worüm – heff ick dormols dacht – weern de ni so kloog as wi un unse Welt in unsen Stoot, in den allns so scheun blifft, as dat is?
Tscha, dat heff ick an’t Enn vun Koln Krieg dacht. Denn is de Ieserne Vörhang fulln un zack, weern de DDR un de Sowjetunion ni mehr dor. Mitmol weer allns anners. Un dat hett bet hüüt ni opholn anners to warrn.
Un worüm is dat so? Worüm köönt wi dat ni eenfach mol so loten, wenn dat good is? Dat weer doch veel klööger. Na jo, een Minsch kann kloog un plietsch ween, overs veele Minschen sünd as de Lemminge. Wat de Chef seggt, dat ward mokt.
Ook wenn de dorste Chef in een‘ Tour Rietsteeken in den Heuhuupen smitt op den wi all tosom sitten doht. Ook wenn de Chef Putin oder Trump heet.
Un dorüm is mi intwüschen klor, worüm ganze Zivilisatschoon ünnergohn köönt.
Overs to’n Glück gifft dat je Lüüd as Trump un Putin. So kann man an’t Enn weenstern op ehr wiesen un seggen, de sünd dat ween…
In düssen Sinn
3 min
June 05, 2025 Losloten
Jungedi, is dat anstreng’d: Je öller ick warr, je mehr mutt mutt ick mi marken. Ick mutt mi all dat marken, wat ick mi vörher al markt heff: Wo ick heet; wonehm ick wohn; wokeen dor noch wohnt; wo de heet, de dor noch wohnt; wat mien Arbeid is, wann ick dor hen mutt - un denn je ook noch all den annern Krom:
Wat twee mol söben is; wat de Ünnerscheed mang Nominativ un Akkusativ is; wo de Hauptstädte vun etliche Länner heet; de wo veelte Planet Uranus in’t Sünn’süsteem is un all so’n Snurrkrom. Bi veele Sooken weet ick gor ni, worüm ick ehr weet.
Annerlei. Op jeden Fall kümmt je all dat dorto, wat ick mi jeden Dag frisch marken mutt: Wann un wonehm ick to’n Gebuurtsdag inlod‘ bün; dat ick mi noch ’n elektrischen Schaltplon för mien Motorrad besorgen will; dat ick ennli dat Paket no de Post bring, dat ick dor al länger henbring‘ will un so wieder. Bi all dat Marken vergeet ick overs ook mol wat. Tomeist vergeet ick overs ni, wat twee mol söben is un so. Ick vergeet eher Sooken, de ick noch erledigen wull. Un richti slimm is dat, wenn man weet, dat man wat vergeeten hett, overs ni mehr, wat dat weer.
In de Psüchologie heet dat je, dat man losloten schall, wat een belasten deiht. Dat mok ick in so’n Fall mitünner ook.
Jo, un in so’n Oogenblick in den ick eenfach loslot, wat ick vergeeten heff, in den ick so richti mark, wo de letzte Zippel an den ick dat fastholn heff, as so’n afreeten Tampen regelrecht in‘ Nebel verschwinn’d – in den Oogenblick kümmt verscheedene Geföhle in mi hoch.
Toerst so’n Oart Bammel: „Oh Gott, ick heff dat losloten.“ Denn kümmt de Moot, den ick mi sülms tospreek: „Ick wull dat losloten, ick heff dat losloten, dat heff ick richti mokt.“ Denn kümmt för so’n poor Millisekunnen dat groote Geföhl vun Frieheit. Dor kann ick so richti dörpusten. Dat duuert overs ni lang. Un denn is weller allns ganz normol.
So lang, bet ick to’n Bispeel no Huus kom un mien Madam to mi seggt: „Hallo mien Schatz. Hest du doran dacht, Botter mittobringen?“
In so’n Momang dink ick: Dat mit dat Losloten kannst echt vergeeten…

In düssen Sinn
3 min
May 30, 2025 Richti schier
Kinnt Ju noch Teekessel speeln ut de School, dor wo twee Lüüd datsülbige Woord hebbt, dat overs twee ünnerscheedliche Bedüüdung‘ hett?
Ball un Ball to’n Bispeel: „Op mien Teekessel kann man danzen.“ – „Mit mien Teekessel kann man speeln.“
Wurr ick dat hüüt nochmol speeln, op Platt, denn wurr ick ’n Woord nehm‘, dat veel mehr as blots twee Bedüüdung‘ hett. Un dat Woord is: „Schier!“ Dor kann man sick glieks mit vief Kollegen opstelln, all hebbt Schier in‘ Sinn un all meent se wat anners dormit.
Geiht man to’n Bispeel no’n Slachter un will ’n Stück Fleesch hebben, in dat keen Knooken sünd, denn will man Fleesch hebben, dat „schier“ is. Overs ook Fleesch, an dat meist keen Fett sitt, is schier.
Mokt man den Goorn schmuck, mit Unkruut hacken un Beete harken un Wege trech moken, denn is de Goorn an’t Enn „schier“. Schier is also fettfrie un ohne Knoken un schmuck un sauber.
Överdrievt man dat mit dat Kleihn in Goorn, is man in‘ Dutt vun de Arbeid, denn is man „schier“ mit Jack un Büx. Schier is also, fettfrie, ohne Knoken, schmuck, sauber un kaputt.
Kümmt ’n Kind mit ’n Een in de Klassenarbeit vun de School no Huus, denn finnd de Öllern dat ganz seeker „schier“. Schier is also, fettfrie, ohne Knoken, schmuck, sauber, kaputt un würkli good.
Dat gifft noch ’n ganzen Schwung mehr Beüüdung‘ vun Schier, dat is vun Region to Region ook ’n beten anners. Dor heuert „’n beten“ to un probleemlos un toart (zart) un verwunnert. Overs de Bedüüdung‘ kinn ick un unse Gegend ni.
Op jeden Fall kunn man för Schier al meist ’n eegen’d Wöörbook anleggen. In Winter kann man sogor den Barg dohlfohrn, wenn man „Schier“ hett. Och nä, de dorsten Dingers ward anners schreeven.
Overs vertellt man een, dat man jüst doröver nodinkt, wat dat Woord Schier allns heeten kann, denn kriegt man bilütten to heuern: „Du büst je ni ganz ‚schier‘!“. Schier is also, fettfrie, ohne Knoken, schmuck, sauber, kaputt, würkli good un ni ganz dicht. Un dorüm finn ick Schier richti schier…
In düssen Sinn
3 min
May 23, 2025 Völkerverstännigung
Man belevt je ’n Barg, wenn man as Busfohrer ünnerwegens is, ne.
Annerletzt heff ick Lüüd mit’n Reisebus vun Kieler Hoben, vun’t Krüüzfohrtschipp, no Hamborg fohrt, no ’n Floogplatz. Achteran gung dat denn mit anner Lüüd weller no Kiel.
Ick keem mi op de Tourn vör as in’t antike Babylon, dor weern Lüüd ut Spanien, Japan, Norwegen, England un noch ’n poor annere Länners an Bord. Un all weern se an sabbeln.
Op de A7 no Kiel, kort no de Affohrt Hennstedt-Ulzborg, keem denn een vun de Fohrgäste no mi. „Mi scusi, signore“, hett he seggt.
Un denn fung he op Italiensch dat Rappeln an, dat mi meist schwummeri wurr dorvun.
An’t Enn vun sien Vördrag gung sien Stimm‘ no boben. Dat weer also anschiend ’n Froog.
Overs wat schull ick moken, ick heff blots mit de Schullern zuckt un seggt: „Ick verstoh di leider ni.“ Denn keem de näste Törn Italiensch. Noch länger overs ook noch hektischer.
„Du ju spiek Ingelsch“, heff ick em foogt. He: „No, no, no“, un denn gung dat wieder mit sien Rappeln. Jungedi, de arme Kirl hett sick ook würkli een afmöht. Mitmol säh he denn meist al ’n beten stolt „Wåter“, mit so’n O as in Shaw. Dor kunn ick verstohn, un ick heff no den Deckel vun’t Köhlschapp wiest. De Mann harr dörst! Dat harr he doch glieks seggen kunnt.
Overs he keek mi ganz misstruuisch an, as he dat Köhlschapp blang dat Armatuurnbrett, mit de Klapp no boben opmokt hett.
„No, Wåter“, säh he. Ick heff em mit Hannen un Fööt wiest, dat he sick dor doch ’n Buddel Selter, ’n Buddel Wåter, rutnehm schull. He schüddel blots den Kopp un fung weller an Italiensch to snacken as’n Wåterfall.
Denn keem ennli ’n Fruu ut Frankriek dorto, de Italiensch un Düütsch kunn.
„Der Mann sucht ein Toilett“, hett se översett. Ick kunn mi dat Lachen jüst noch so verkniepen.
Se hett den Italiener denn översett, wo he no Tant‘ Meier achter in Bus kümmt. Un denn weern wi beide glückli: He doröver, dat he ut de Büx kunn un ick doröver, dat he sick ni op mien Köhlschapp sett hett, üm sien Geschäft to moken…

In düssen Sinn
3 min
May 15, 2025 Buon appetito
Wenn mol ni so veel Tied to’n Eeten moken is, denn kann man sick je wat ut‘ Iesschapp in’t Backrohr schuuven. So’n Deepköhl-Pizza to’n Bispeel.
Nu hett de Mafia-Torte ut de Fabrik je ni veel mit dat to kriegen, wat man in’n anstänniged italienisched Restaurang bestelln kann.
To de Ünnerscheede heuert, dat op de Pizza ut‘ de Köhlung oftmols keen echten Kees is. De nöömt sick „Analog“-Kees. Un de dorste Krom hett nix mit echten Kees to kriegen. Dor is ni mol Melk bin.
De Smeerkrom is ut Planten-Fett, Proteine, Stärke, Gewürze un Glutamat mokt. Overs wat hett dat „Analog“ in Analog-Kees eegentli to bedüüden? Hüüt kinnt man analog tomeist as dat Gegedeel vun digital. Fröher geev dat to’n Bispeel blots Klocken – de mit de Wiesers an. Siet dat overs de Klocken gifft, bi de de Tied blots noch as Tohln anwiest ward, also Digital-Klocken, heet de annern Analog-Klocken. Jo, so is dat.
Nu steiht bi analog in’t Nokixel overs „ähnli, entspreekend, vergliekbor, stufenlos, kontinuierli“ un intwüschen even ook de Afgrenzung to digital.
Kümmt wi to den Kees trüch. De dorste Analog-Kees vun de Köhlschapp-Pizza hett also nix mit echten Kees ut Melk to kriegen. Dat is wat anners. De smeckt ook ni würkli no Kees. De beiden Sooken sünd also gor ni vergliekbor. Na jo, an un för sick kann man je allns mit’neen verglieken. Katten un Tomaten to’n Bispeel. Overs blots, weil man dat verglieken deiht, ward ut Tomaten je keen Analog-Katten.
Dor kann man al eher richti würzigen Kees un Stinke-Fööt verglieken, denn de Bakterien, de för’t Stinken sorgt, sünd an de Fööt de glieken as in‘ so Kees. Dat is ni besünners appetitli, overs tatsächli wohr. Liekers seggt man normolerwies je ni Analog-Sweetfööt to so’n oln Tilsiter oder to Esrom oder wat dat sünst noch an Kees gifft, för den man al meist ’n Waffenschien moken mutt.
Un dorüm bün ick dorför, dat de dorste Smeerkrom op de Pizza ni mehr Analog-Kees heet sünnern eher Kees-Ersatz oder wat in de Oart.
Tscha. Över all dat dinkt man mol no, wenn Ju sick dat näste Mol ’n Frost-Pizza warm mokt…
In düssen Sinn
3 min
May 08, 2025 Konklave in Reichsdag
Jungedi, dat weer je ’n Opreeger an Dingsdag in Reichsdag, wa? Witten Rook is bi veele no’n ersten Wohlgang blots ut ’n Kopp kom‘. Overs erst bi’n nästen Anloop hett dat heeten „habemus Kanzler“.
Un nu? Is unsen Kanzler nu tweete Wohl? Tscha. Schimpt ward bi uns je al vun veele Ecken un Kanten. Dat is je so düütsch, ne.
Kiekt man sick de Geschicht vun de Papstwohln mol an, denn is Merz richti good wechkom‘. De Wohl vun Papst Gregor X. hett vun 1268 an meist dree Johr duuert. Erst as man de Kardinols bi Woter un Brot insloten un op’t Letzt‘ dat Doken vun ehrn Palast reeten hett, keem Bewegung in de Sook.
Un bet hüüt geev dat keen eenzigen Papst, de glieks bi’n ersten Wohlgang wählt worrn is. Ook dütmol ni. Dat is dor ganz normol. Mehr noch: Dat is faszineernd un geheemnisvull un all sowat. Jedet Mol, wenn swatten Rook ut’n Scho’steen vun de Sixtinische Kapell kümmt, stiggt de Spannung.
Jo. Dor geiht dat. Bi uns ni.
Weer Konrad Adenauer erst bi’t tweeten Wohlgang Bunnesanzler worrn, denn weer ook nu allns in Ordnung. Overs so is dat bi uns: „Dat hebbt wi jümmers al so mokt, dat hebbt wi noch nie so mokt, dor kann je jeder kom‘.“
Jo nu. Wi harrn ook noch ni eenmol in de Bunnesrepublik so’n dösiged Ergeevnis bi ’n Bunnesdagswohl. Corona speelt ook ’n Rull, mennige Ministers sünd kiebig, dat se nu ni mehr mitspeeln dörft un so wieder. De halve Welt steiht Kopp, overs bi uns mutt allns no’t Handbook loopen.
Un wenn in’t Utland över unse Kanzlerwohl unkt ward, den lot ehr doch unken. Bi de Novers, de an düllsten op een schimpt, is in de Reegel ook ni allns würkli astrein. Un so’n verdreihte Regeerung as man sick dat nu in Russland, in China, in de Türkei, de USA un wat weet ick wonehm noch bekieken kann, hebbt wi bi uns siet 1949 noch ni hatt. Un mi dücht, sowat ward wi ook nu ni kriegen. Ick wurr seggen: Lot de niede Mannschop man erstmol ehr ersten 100 Doog moken. Denn seht wi wieder. Un dat gifft no mien Meenung keen Grund, al no fief Minuten dat Quarken antofang‘…
In düssen Sinn
3 min

About De Döschkassen

From the publisher's feed

Seit Jahren hat sie einen festen Platz in den Tageszeitungen von Boyens Medien: die Platt-Kolumne „De Döschkassen“. Mit dem etwas anderen Blick auf die Themen, die die Menschen bewegen, aber auch für…