Dilli Dali

Dilli Dali

By S GopalakrishnanSociety & Culture
Download on the App Store

Dilli Dali episodes

  • ഒരു സഹേലി തോടിയും യർവാദ ജയിലും

    സുഹൃത്തേ ,

    ചില വൈയക്തികാനുഭവങ്ങൾ അമൂർത്തമായിരിക്കും. അത് ഒരു പോഡ്കാസ്റ്റ്- ശബ്ദാനുഭവമാക്കുവാൻ പറ്റുമോ എന്ന് തീർച്ചയില്ല. ഇന്നത്തെ ദില്ലി -ദാലി അങ്ങനെയൊന്നാണ് .

    മുരളി കണ്ണമ്പള്ളിയുടെ യർവാദ ജയിൽ സ്മരണകൾ വായിക്കുമ്പോൾ എന്റെ പശ്ചാത്തലത്തിൽ പണ്ഡിറ്റ് കുമാർ ഗന്ധർവ പാടിയ സഹേലി തോടി ഉണർന്നിരുപ്പുണ്ടായിരുന്നു. ബ്രിട്ടീഷുകാർ തൂക്കിക്കൊന്നിട്ടും മരിക്കാൻ കൂട്ടാക്കാഞ്ഞ ഉമാജി ഖോമാണെ എന്ന കലാപകാരിയുടെ ഓർമ്മകൾ ആ ജയിലിൽ ഇന്നും എങ്ങനെ ജീവിക്കുന്നു എന്ന് അദ്ദേഹം എഴുതിയതു വായിച്ചുകൊണ്ടിരിക്കുമ്പോൾ കുമാർ ഗന്ധർവ ഉമാജിയ്ക്കുവേണ്ടി പാടുന്നതുപോലെ എനിക്കു തോന്നി .

    ഇന്നത്തെ പോഡ്‌കാസ്റ്റിൽ മൂന്നുഭാഗങ്ങൾ ചേർത്തു വെച്ചിരിക്കുന്നു. യർവാദ ജയിലിൽ കിടക്കുമ്പോൾ ഗാന്ധി എഴുതിയ രണ്ടു പ്രധാന കത്തുകൾ (ഒന്ന് ആശ്രമത്തിലെ കുഞ്ഞുങ്ങൾക്ക് , രണ്ട് ബ്രിട്ടീഷ് പ്രധാനമന്ത്രിയ്ക്ക്, താൻ മരിയ്ക്കാൻ തീരുമാനിക്കുന്നു എന്നറിയിക്കുന്നത് ), മുരളി കണ്ണമ്പള്ളി അതേ ജയിലിൽ 85 കൊല്ലങ്ങൾക്കു ശേഷം കിടന്ന അനുഭവങ്ങൾ , പിന്നെ പണ്ഡിറ്റ് കുമാർ ഗന്ധർവ ഹൃദയം കൊണ്ടു പാടുന്ന സഹേലി തോടിയും .

    സ്നേഹത്തോടെ

    എസ് . ഗോപാലകൃഷ്ണൻ

    (പോഡ്കാസ്റ്റ് കവറിൽ ഉപയോഗിച്ചിരിക്കുന്ന ഗാന്ധി , റിയാസ് കോമുവിന്റെ കലയാണ് . അദ്ദേഹത്തിന് നന്ദി )

    19 min
  • കാഷായം  അഗ്നിയായിരുന്ന അഗ്നിവേശ്

    സ്വാമി അഗ്നിവേശിനെക്കുറിച്ച് അമൃത് ലാൽ സംസാരിക്കുകയാണ് ഇന്ന് ദില്ലി ദാലിയിൽ.

    ഹിന്ദുത്വ രാഷ്ട്രീയക്കാരുടെ ശാരീരികാക്രമണങ്ങൾ ഏറ്റവും കൂടുതൽ ഏറ്റുവാങ്ങിയ  ഹിന്ദു സന്ന്യാസി. വേദം പോലെ പ്രധാനമാണ് ഇന്ത്യൻ ഭരണഘടന എന്ന് വിശ്വസിച്ച സന്ന്യാസി. സുഹൃത്തായിരുന്ന അടൽ ബിഹാരി വാജ്‌പേയിയുടെ മൃതദേഹം കാണാൻ ചെന്നപ്പോഴും ആക്രമിക്കപ്പെട്ട മനുഷ്യൻ . തോട്ടിപ്പണി ചെയ്യുന്ന ദളിത് യുവതിയുടെ കാൽ തൊട്ടു വന്ദിച്ചതിന് ബാഹ്മണശ്രേഷ്ഠരുടെ ക്രോധം ഏറ്റുവാങ്ങിയ ജന്മനാൽ ബ്രാഹ്മണൻ.

    ആധുനിക ഇന്ത്യയിലെ തൊഴിലിടങ്ങളിലെ അടിമപ്പണിക്കെതിരെ കുരിശുയുദ്ധം നടത്തിയ നേതാവ് ...അടിയന്തിരാവസ്ഥയെയും , അഴിമതിയെയും , മതവർഗ്ഗീയതയേയും എതിർത്ത അഗ്നിവേശ്.

    എന്തായിരുന്നു അദ്ദേഹത്തിന് ആര്യസമാജ് ?...നിതാന്ത പ്രതിപക്ഷ സന്ന്യാസിയ്ക്ക് ആദരം നൽകുന്ന പോഡ്‌കാസ്റ്റാണ് അമൃത് ലാലുമായുള്ള ഈ അഭിമുഖം . കേട്ടാലും

    22 min
  • കപ്പിത്താനും കടലും

    റൊദാന് (Auguste Rodin ) ബൽസാക്കിനെ മനസ്സിലായിരുന്നു , ഒരു കപ്പിത്താന് തുറന്ന കടലിനെ എന്ന പോലെ.

    1891 മുതൽ ഏഴുകൊല്ലക്കാലങ്ങൾ ബൽസാക്കിനെ മനസ്സിലാക്കുവാൻ ശില്പിയായ  റൊദാൻ ശ്രമിച്ചു. ഏതോ അപരിചിത ഭൂഖണ്ഡത്തിൽ ഉണ്ടെന്നു കേട്ട ബുദ്ധന്റെ പല്ല് അന്വേഷിച്ചുനടന്ന ഫാഹിയാനെ പോലെ .

    പ്രതിമ സമിതി ശിൽപമാതൃക നിരസിച്ചു . ശിൽപിയുടെ മരണത്തിന് 22 വർഷങ്ങൾ കഴിഞ്ഞാണ് ആ പ്രതിമ അനാച്ഛാദനം ചെയ്യപ്പെട്ടത് .

    റൊദാന്റെ 'ബൽസാക്' പ്രതിമ കണ്ടതിന്റെ ഓർമ്മയാണ് ഈ ലക്കം ദില്ലി -ദാലി .

    കേൾക്കുമല്ലോ .

    സ്നേഹപൂർവ്വം

    എസ് . ഗോപാലകൃഷ്ണൻ

    10 min
  • കേശവാനന്ദ ഭാരതിയും സാമൂഹ്യപാഠവും

    സുഹൃത്തേ ,

    പുതിയ ലക്കം ദില്ലി - ദാലിയിലേക്ക് സ്വാഗതം .

    ഇന്നലെ സമാധിയായ സ്വാമി കേശവാനന്ദ ഭാരതി ഇന്ത്യൻ ഭരണഘടനയോടുള്ള ഭരണകൂടങ്ങളുടെ സമീപനങ്ങൾക്ക് നൽകിയ സന്ദേശം എന്തായിരുന്നു ? അതിന്റെ ഇന്നത്തെ പ്രസക്തി എന്താണ് ?

    അഡ്വക്കേറ്റ് ഹരീഷ് വാസുദേവനുമായി അഭിമുഖം :

    ഹരീഷ് പരാമശിക്കുന്ന കാര്യങ്ങൾ :

    ഒന്ന് : കേരളത്തിലെ ഭൂപരിഷ്കരണ നിയമത്തിലെ ഏത് കാര്യമാണ് കേശവാനന്ദ ഭാരതി ചോദ്യം ചെയ്തത് ?, രണ്ട് : സർക്കാരും കേശവാനന്ദ ഭാരതിയും തോൽക്കുകയും ഇന്ത്യൻ ഭരണഘടന ജയിക്കുകയും ചെയ്തോ ?, മൂന്ന് : നാനി പാൽക്കിവാലയെ വാദിക്കുവാൻ കൊണ്ടുവരാൻ ആര് പണം നൽകി ?, നാല് : പൗരന്റെ മൗലികാവകാശവും നമ്മുടെ പാർലമെന്റിന്റെ പരിമിതിയും, അഞ്ച് : അധികാരം നീതിപീഠത്തെ സ്വാധീനിച്ച 1970 കളും ഇന്നത്തെ കാലവും, ആറ് : പാൽക്കിവാല സുപ്രീം കോടതി practice നിർത്തി ലണ്ടനിൽ പോയതെന്തുകൊണ്ട് ?, ഏഴ് : കേരളത്തിന്റെ ഭൂപരിഷ്കരണനിയമത്തിലെ സാമൂഹ്യനീതിയെ സ്വാമി ചോദ്യം ചെയ്തോ ?

    ഹരീഷ് വാസുദേവന്റെ അനുസ്മരണത്തിലേക്ക് സ്വാഗതം

    സ്നേഹത്തോടെ

    എസ് . ഗോപാലകൃഷ്ണൻ

    20 min
  • മരണത്തിന്റെ ബഹുമാനങ്ങൾ

    സുഹൃത്തേ ,

    ചത്തുപോയി എന്ന ഭാഷാപ്രയോഗം   കഴിഞ്ഞ ദിവസം ഒരു ടി വി വാർത്താചാനൽ ചർച്ച വഴി സജീവമായി . ഒരു ഭാഷ മരണത്തെ സ്വാംശീകരിക്കുന്നത് എങ്ങനെയാണ് ? ഒരാളേയും മരിക്കാൻ അനുവദിക്കാത്ത വാശിയല്ലേ  ജീവിച്ചിരിക്കുന്നവരുടെ ഭാഷയ്ക്ക്? ചിത്തത്തിൽ കൂറിയിന്നവരെ കുമാരനാശാൻ ചത്തുപോകാൻ അനുവദിച്ചതെങ്ങിനെ ? ഇ.എം.എസ് അന്തരിച്ചു എന്നു പറയുമ്പോൾ ആ ഭൗതികവാദിയെ മരിക്കാൻ ഭാഷ അനുവദിച്ചോ ? തിരുമേനി കാലം ചെയ്യുകയും ആന ചെരിയുകയും സാധാരണക്കാരൻ നിര്യാതനാകുകയും ചെയ്യുന്നതെന്തുകൊണ്ട് ?

    മലയാളത്തിലെ 'മരണ' വർത്തമാനങ്ങളെ കുറിച്ച് ഒരു പോഡ്കാസ്റ്റ് .

    സ്നേഹത്തോടെ

    എസ് . ഗോപാലകൃഷ്ണൻ

    12 min
  • ചിക്കിച്ചിതറിയ ചരിത്രം

    പ്രിയ സുഹൃത്തേ

    നാളെ സെപ്റ്റംബർ അഞ്ചാണ് . 2017 ൽ ഈ ദിവസമാണ്

    ഏഴു വെടിയുണ്ടകൾ ഏറ്റ് ഗൗരി ലങ്കേഷ് കൊല്ലപ്പെട്ടത്. കൊലയാളികൾക്ക് എന്നിട്ടും ഗൗരി ഉയർത്തിയ ചോദ്യങ്ങളെ കൊല്ലാൻ കഴിഞ്ഞില്ല . നാം ചരിത്രം ചിക്കിച്ചികയുമ്പോൾ ആ ചോദ്യങ്ങൾ വീണ്ടും മണ്ണിൽ ഉയരുന്നു .

    പി എൻ ഗോപീകൃഷ്ണൻ ഈ ഓണക്കാലത്ത് എഴുതിയ അതിശക്തമായ ഒരു കവിത ദില്ലി -ദാലി സെപ്റ്റംബർ അഞ്ചിന്റെ സ്മരണയ്ക്കായി അവതരിപ്പിക്കുകയാണ് , കവിയുടെ ശബ്ദത്തിൽ.

    " ഇങ്ങനെയാണ് കോഴികളെപ്പോലെ
    ചരിത്രം ചിക്കിപ്പരത്തി
    നാം മണ്ണിര തിന്നുന്നത്
    അതിനാൽ
    എന്റെ ചങ്ങാതീ ,വാവരാണ് അയ്യപ്പനെ ചതിച്ചു
    കൊന്നത്
    എന്ന മട്ടിലുള്ള
    വടക്കൻ പാട്ടുമായി
    ഈ പടി കടക്കരുതേ "

    6 min
  • 'ആത്മോപദേശശതക'ത്തിന് കുമാരനാശാൻ എഴുതിയ വ്യാഖ്യാനം

    പ്രിയ സുഹൃത്തേ ,

    ദില്ലി -ദാലിയുടെ ചതയദിന പോഡ്‌കാസ്റ്റിലേക്ക് സ്വാഗതം.

    1903 ൽ കുമാരനാശാൻ ആത്മോപദേശശതകത്തിന്റെ ആദ്യ മൂന്ന് ശ്ലോകങ്ങൾക്ക് എഴുതിയ വ്യാഖ്യാനമാണ്‌ ഇന്ന് ഗുരുവിനും ശിഷ്യനുമുള്ള ആദരമായി സമർപ്പിക്കുന്നത് . ഇത് പ്രക്ഷേപണം ചെയ്യാൻ സാധിച്ചത് ഒരു മഹാഭാഗ്യവും ആഹ്ലാദപ്രദമായ ദാർശനികാനുഭവവുമായി കരുതുന്നു. ഗുരുവിന്റെ കവിതയോ ദർശനാഗാധതയോ  മാത്രമല്ല നമ്മെ അത്ഭുതപ്പെടുത്തുന്നത് , കുമാരനാശാൻ സ്വന്തമാക്കിയിരുന്ന  അപാരമായ അറിവിന്റെ വെളിച്ചം കൂടിയാണ് .

    ദില്ലി -ദാലി കേൾക്കുന്ന ഓരോരുത്തർക്കും നന്ദി . സുഹൃത്തുക്കളുമായി ഈ ഗുരു -കുമാരനാശാൻ അനുഭവം പങ്കുവെയ്ക്കണമെന്ന് അഭ്യർത്ഥിക്കുന്നു .

    സ്നേഹപൂർവ്വം

    എസ് . ഗോപാലകൃഷ്ണൻ

    21 min
  • ഓണം 1942 വരെ : ഒരു ചരിത്ര വായന

    പ്രീയപ്പെട്ട സുഹൃത്തുക്കളേ ,

    ദില്ലി -ദാലിയുടെ ഓരോ ശ്രോതാവിനും തിരുവോണാശംസകൾ .

    ഇന്ന് ഈ പോഡ്‌കാസ്റ്റിൽ ഒരു ചരിത്രവായനയാണ് . കഴിഞ്ഞ നൂറ്റാണ്ടിൽ കേരളത്തിലെ ഓണം എങ്ങനെയായിരുന്നു ? പി . ഭാസ്കരനുണ്ണി എഴുതിയ 'പത്തൊൻപതാം നൂറ്റാണ്ടിലെ കേരളം' എന്ന പുസ്തകത്തിൽ ഓണത്തെക്കുറിച്ച് വിശദവിവരങ്ങൾ ഇല്ല. കൊച്ചീരാജ്യത്തെ അത്തച്ചമയാഘോഷത്തെ കുറിച്ച് പറയുന്നുണ്ട് . ആ ഭാഗമാണ് ഇന്ന് ഈ പോഡ്‌കാസ്റ്റിൽ ഉൾപ്പെടുത്തിയിരിക്കുന്നത് . ആ ആചാരത്തിൽ ഏതൊക്കെ ജാതികളിൽ പെട്ടവർക്ക് എവിടം വരെ പോകാമായിരുന്നു ? ദാസിയാട്ടം ഉണ്ടായിരുന്നോ ? ആരായിരുന്നു കക്കാട്ടു കാരണവപ്പാട് ? മഹാരാജാവ് തിരുമനസ് ഊണുകഴിച്ചുകഴിഞ്ഞാൽ ആ എച്ചിലില എടുക്കാൻ അണിഞ്ഞൊരുങ്ങി എത്തുന്ന നായർ സ്ത്രീയുടെ അവകാശങ്ങൾ , പീപ്പീവാദനത്തിനെത്തുന്ന മുസ്ലീങ്ങൾ കോട്ടയ്ക്കകത്ത് കയറാത്തത് ...1942 ൽ നിലച്ചുപോയ ആചാരങ്ങൾ കേട്ടാലും .

    സ്നേഹത്തോടെ

    എസ് . ഗോപാലകൃഷ്ണൻ

    13 min
  • സത്യജിത്ത് റായ് എന്ന എഴുത്തുകാരൻ

    പ്രീയപ്പെട്ട സുഹൃത്തേ ,

    സത്യജിത്ത് റായ് ജന്മശതാബ്ദി പോഡ്കാസ്റ്റ് പരമ്പരയിലെ നാലാമത്തെ ലക്കമാണിത്. റായ് എന്ന എഴുത്തുകാരനെ കുറിച്ച് ആഴത്തിലുള്ള അവലോകനമാണ് രാഹുൽ രാധാകൃഷ്ണൻ നടത്തുന്നത് . ഏകാന്തരായ മനുഷ്യരെ മനസ്സിലാക്കിയ എഴുത്തുകാരൻ. ശാസ്ത്രവും ഗണിതവും ചരിത്രവും നന്നായറിയാവുന്ന കഥാപാത്രങ്ങൾ , അതിൽ അധ്യാപകരും , കള്ളന്മാരും , അഭിനേതാക്കളും , അപകർഷതാബോധമുള്ളവരും അന്തർമുഖരും ഉണ്ട് . റായ് യുടെ എഴുത്തിന്റെ സവിശേഷതകൾ എന്തായിരുന്നു ? ഈ പോഡ്കാസ്റ്റ് പ്രക്ഷേപണം ചെയ്യാൻ സാധിച്ചതിൽ ദില്ലി -ദാലിയ്ക്ക് അതിയായ സന്തോഷമുണ്ട് . സത്യജിത്ത് റായ് എന്ന എഴുത്തുകാരനെ കുറിച്ച് മലയാളത്തിൽ ഇത്ര സമഗ്രമായ ഒരവലോകനം ഇതാദ്യമാണ് .

    കേട്ടാലും

    സ്നേഹപൂർവ്വം

    എസ് . ഗോപാലകൃഷ്ണൻ

    27 min
  • പ്രാർത്ഥിക്കുന്നെങ്കിൽ ഇങ്ങനെ

    ജീവിതത്തിലേക്ക് താളബോധ്യങ്ങൾ വന്ന കാലങ്ങളെ  ഓർമ്മിപ്പിക്കുന്ന പുതിയ ആഫ്രിക്കൻ ഗാനമാണ് 'ജെറുസലേമ', ആ ഗാനത്തിന്റെ ചടുല താളത്തിൽ ആഫ്രിക്ക നൃത്തം ചെയ്യുകയാണിപ്പോൾ.  Master KG( Kgaogelo Moagi) യുടെ ഗാനവും ആ ഗാനം ഉണർത്തിയ ചിന്തകളും .

    സ്നേഹപൂർവ്വം

    എസ്‌ . ഗോപാലകൃഷ്ണൻ

    www.dillidalipodcast.com

    If you wish to support this podcast :

    https://www.patreon.com/dillidalipodcast

    https://www.buymeacoffee.com/dillidali

     

    10 min

About Dilli Dali

From the publisher's feed

Dilli Dali is a podcast initiative from Delhi, India on contemporary society and culture

More shows like Dilli Dali

MALAYALAM NEWS by G Ravi

MALAYALAM NEWS

0 Listeners

Truecopy THINK - Malayalam Podcasts by Truecopythink

Truecopy THINK - Malayalam Podcasts

2 Listeners

Empire: World History by Goalhanger

Empire: World History

2,413 Listeners

Out Of Focus - MediaOne by Mediaone

Out Of Focus - MediaOne

3 Listeners

Professional Malayali by Vinod Narayan

Professional Malayali

2 Listeners