Dilli Dali

ദിലി ദാലിയുടെ പ്രീയപ്പെട്ട ശ്രോതാവേ ,

1990 ലാണ് കേരളത്തിലെ ആദ്യത്തെ ടെക്നോളജി പാർക് സ്ഥാപിതമായത്. കേരളത്തേയും , തിരുവനന്തപുരത്തെ പ്രത്യേകിച്ചും മാറ്റിത്തീർത്ത ഒരു വലിയ വ്യവസായ സംരംഭം നമുക്ക് നൽകുന്ന പാഠങ്ങളെ കുറിച്ച് Technopark ന്റെ ആദ്യ CEO ശ്രീ ജി . വിജയരാഘവൻ വിശദമായി സംസാരിക്കുന്ന പോഡ്കാസ്റ്റ് ആണിത് . അദ്ദേഹം പരാമർശിക്കുന്ന വിഷയങ്ങൾ പ്രധാനമായും ഇനി പറയുന്നവയാണ് :

ടെക്നോപാർക് എന്ന ആശയം ആരുടേത് ?, അന്നത്തെ മുഖ്യമന്ത്രി ഇ കെ നായനാരും വ്യവസായ മന്ത്രി കെ ആർ ഗൗരിയമ്മയുമായി അമേരിക്കയിലെ ആപ്പിൾ ഫാക്റ്ററിയിൽ നടത്തിയ നിർണ്ണായക സന്ദർശനത്തിൽ എന്തുണ്ടായി ? ആരാണ് കേരളത്തിന് കെ പി പി നമ്പ്യാർ ? എന്താണ് കേരളം അദ്ദേഹത്തോടു കാട്ടിയ നന്ദികേട് ? കണ്ണൂരിനെ ജീവനുതുല്യം സ്നേഹിച്ചതിന് അദ്ദേഹത്തിന് കിട്ടിയ പ്രതിഫലം ?, ടെക്നോപാർക് ആദ്യം നയിച്ച പതിനൊന്നു പേർ ?  ആരാണ് ടെക്നോപാർക്കിനെ പച്ച പുതപ്പിച്ചത് ?    മാറി മാറി അധികാരത്തിൽ വന്ന മന്ത്രിസഭകൾ ടെക്‌നോപാർക്കിനെ സ്നേഹിച്ചത് എന്തുകൊണ്ട് ?, എല്ലാ രാഷ്ട്രീയക്കാരിലും നന്മയുണ്ട് ..പക്ഷേ അതെങ്ങനെ കണ്ടെത്താം ?, കേരളവികസനത്തെ  പിന്നോട്ടടിച്ച മന്തിസഭകൾ ഏതൊക്കെ ? Private Economic Zones ഉം IT വികസനവും ?, കേരളത്തിലെ ഉന്നത വിദ്യാഭ്യാസ മേഖല എന്തുകൊണ്ട് അഴിച്ചുപണിയണം ?, നേതാക്കന്മാരും , ഉദ്യോഗസ്ഥരും , ബിസിനസ്സുകാരും എന്തുകൊണ്ട് കുട്ടികളെ കേരളത്തിനു പുറത്ത് പഠിപ്പിക്കുന്നു ? കേരളത്തിൽ എന്തുകൊണ്ട് അടിയന്തിരമായി land reforms കൊണ്ടുവരണം ? ഗൗരിയമ്മ എന്ന ശക്തയായ ഭരണാധികാരിയുടെ സംഭാവനകൾ ? എന്തുകൊണ്ട് എല്ലാ മുന്നണികളും കരുത്തരായ  സ്ത്രീകളെ ഒഴിവാക്കുന്നു ?

ഭാവിയിലേക്ക് കരുതിവെക്കേണ്ട ഒരഭിമുഖം. ശ്രീ ജി . വിജയരാഘവന് നന്ദി

സ്നേഹപൂർവ്വം

എസ് . ഗോപാലകൃഷ്ണൻ

ഈ ഗാനം ആഗസ്ത് 5 നും മതേതര ഇന്ത്യയ്ക്കും

35 വയസ്സുണ്ടായിരുന്ന പണ്ഡിറ്റ് ജസ്‌രാജ്‌ ഒരു ദിവസം ഭൈരവ് രാഗം അഭ്യസിക്കുകയായിരുന്നു . പെട്ടെന്ന് അദ്ദേഹം കൈകൾ മുകളിലേക്കുയർത്തി 'അള്ളാ' എന്നു വിളിച്ചു . ആധുനിക ഹിന്ദുസ്ഥാനി സംഗീതത്തിലെ ഒരു മനോഹരഗാനം പിറക്കുകയായിരുന്നു . അലിയും ഹുസൈനും പ്രവാചകനും അള്ളായും മഹാശിവനും കടന്നുവരുന്ന ഗാനം ...ഓം പൂർണമദ പൂർണ്ണമിദം (അതും പൂർണം ഇതും പൂർണം ) എന്ന ശാന്തിമന്ത്രം കടന്നുവരുന്ന ഗാനം ...നമ്മുടെ ആധുനിക മതേതര ജനാധിപത്യ റിപ്പബ്ലിക്കിനും 2020 ഓഗസ്റ്റ് അഞ്ചാം തീയതി എന്ന ഒരു ദിവസത്തിനുമായി  ഈ ഗാനം ദില്ലി-ദാലി പ്രക്ഷേപണം ചെയ്യുന്നു

ഇതിഹാസമേ , വിട ! ഇബ്രാഹിം അൽകാസിയ്ക്ക് ഒരു പോഡ്കാസ്റ്റ് ആദരം

ജനനം : 18 October 1925, മരണം :  4 August 2020

ആധുനിക ഇന്ത്യൻ നാടക വേദിയ്ക്ക് ഏറ്റവും വലിയ സംഭാവനകൾ നൽകിയ ഒരാൾ വിടവാങ്ങുമ്പോൾ.  ഡൽഹിയിലെ National School of Drama യിലെ അദ്ധ്യാപകനും നാടക പ്രവർത്തകനുമായ  അഭിലാഷ് പിള്ള നടത്തുന്ന അനുസ്മരണം . അൽകാസി എന്ന സെക്കുലർ ദീപസ്തംഭം. നാടകവേദിയിൽ അദ്ദേഹം നടത്തിയ ഏഷ്യൻ പ്രകാശനം , ഇന്ത്യയെ സ്വാധീനിച്ച വിവിധ സംസ്കാരങ്ങളുടെ സമന്വയം 'അന്ധായുഗി' ന്റെ  പുരാന കിലയിലെ അവതരണത്തിൽ കൊണ്ടുവന്നത്,   National School of Drama ക്ക് നൽകിയ സംഭാവന , നാടകകലയ്ക്ക് ഉണ്ടാക്കിയ സാമൂഹ്യാദരം , അസാമാന്യരായ ശിഷ്യർ , എല്ലാം അഭിലാഷ് പിള്ള സംസാരിക്കുന്നു. 

പോഡ്‌കാസ്റ്റിലേക്ക് സ്വാഗതം ,

സ്നേഹത്തോടെ

എസ് . ഗോപാലകൃഷ്ണൻ

സ്റ്റാലിനെതിരെ ഒസിപ് മന്ദേൽസ്റ്റം എഴുതിയ കവിത അദ്ദേഹത്തെ സൈബീരിയായിലെ തടങ്കൽ പാളയത്തിലും മരണത്തിലും എത്തിച്ചു . എന്നാൽ ആ കവിത ഇന്നും അനശ്വരമായി തുടരുന്നു . ഓമനയായ കുഞ്ഞായിരുന്ന കാലത്ത് എടുത്ത ഹിറ്റ്ലറുടെ മനോഹരമായ ഫോട്ടോയെ നോക്കി  പോളീഷ് കവി വിസ്‌ലാവ സിംബോർസ്‌ക ചോദിച്ചു എങ്ങനെയാണ് ഈ കുഞ്ഞിന് ഇത്ര അധികാരപ്രമത്തനായ സ്വേച്ഛാധികാരിയാകാൻ കഴിഞ്ഞത് !

റഷ്യൻ എഴുത്തുകാരനായിരുന്ന പാസ്റ്റർനാക്കിനെ നോബൽ സമ്മാനം വാങ്ങാൻ ഭരണകൂടം അനുവദിച്ചില്ല .വേദനയിലും വിഷാദത്തിലും അദ്ദേഹം ഒരു കവിത എഴുതി : നോബൽ സമ്മാനം .

സ്വാതന്ത്ര്യത്തിനു വേണ്ടി എഴുതപ്പെട്ട മൂന്ന് ലോകോത്തര കവിതകൾ ആത്മാരാമൻ വിവർത്തനം ചെയ്ത് പാരായണം ചെയ്യുകയാണ് ഈ ലക്കം ദില്ലി - ദാലിയിൽ.

മനോഹരമായ ഈ മൊഴിമാറ്റത്തിന് അദ്ദേഹത്തിനോട് നന്ദി പറയുന്നു

സ്നേഹത്തോടെ

എസ് . ഗോപാലകൃഷ്ണൻ

ബാലഗംഗാധര തിലകൻ ചരമശതാബ്ദിദിനചിന്തകൾ : August 1, 2020

തിലകന്റെ ഹിന്ദുവിൽ നിന്നും രണ്ടു വ്യത്യസ്ത ഹിന്ദുക്കൾ ആധുനിക ഇന്ത്യൻ രാഷ്ട്രീയത്തിൽ ഉണ്ടായി ഒന്ന് ഗാന്ധി , രണ്ട് സവർക്കർ .  ഒരാളുടെ രാമൻ ആത്മത്യാഗങ്ങളുടെ പ്രതിനിധിയായിരുന്നു , മറ്റൊരാളുടേത് രാവണനെ കൊന്ന രാമനും .

മുസ്‌ലിം എന്നും മുസ്‌ലിം മാത്രമാണെന്നും ഒരിക്കലും ഇന്ത്യാക്കാരൻ അല്ലെന്നും സവർക്കർ പറഞ്ഞപ്പോൾ മൗലാനാ അബുൽ കലാം ആസാദിന്റെ തോളിൽ കയ്യിട്ട് ഗാന്ധി ചോദിച്ചു , " ഈ തൊപ്പിക്കാരൻ ഇന്ത്യക്കാരനല്ല എങ്കിൽ പിന്നെയാരാണ് ഇന്ത്യാക്കാരൻ ?"

തിലകൻ മരിച്ചതിനുശേഷം ഇന്ത്യയിൽ മൂന്നു ദേശീയതാവാദങ്ങൾ ഉണ്ടായത് ഏതൊക്കെ ? അതിൽ ഏതിന്റെ ബാക്കിയാണ് നമ്മുടെ ഭരണഘടന ?

ഈ പോഡ്കാസ്റ്റ് കേട്ടാലും

സ്നേഹത്തോടെ

എസ് . ഗോപാലകൃഷ്ണൻ

കേന്ദ്ര സർക്കാർ കഴിഞ്ഞ ദിവസം അംഗീകരിച്ച പുതിയ ദേശീയ വിദ്യാഭാസ നയത്തെ വിശകലനം ചെയ്യുകയാണ് ഈ ലക്കം ദില്ലി ദാലി യിൽ പ്രൊഫസ്സർ എം വി നാരായണൻ .

ജനാധിപത്യ ഇന്ത്യ എന്ന ആശയവും പുത്തൻ നയവും യോജിച്ചുപോകുന്നുണ്ടോ എന്ന് അദ്ദേഹം അന്വേഷിക്കുന്നു. അധികാരകേന്ദ്രീകരണവും വിദ്യാഭ്യാസവും, ചർച്ചകൾ ഇല്ലാതാകുന്ന കാലത്തെ  നയരൂപീകരണങ്ങൾ , മൂന്നുഭാഷാ

നയം, ദേശീയ തലത്തിൽ വരാൻ പോകുന്ന common entrance test , വലതുപക്ഷ, ദേശീയതാരാഷ്ട്രീയവും വിദ്യാഭ്യാസത്തിന്റെ കമ്പോളവൽക്കരണവും എങ്ങനെ കൈകോർക്കുന്നു, നമ്മുടെ മുഖ്യധാരാ മാധ്യമങ്ങൾ ഈ വിഷയങ്ങളെ എങ്ങനെ കൈകാര്യം ചെയ്യുന്നു , ഒരു രാഷ്ട്രം - ഒരു വിദ്യാഭാസം എന്ന നയമാണോ ഇത് ? ഉത്തർ പ്രദേശിലെ കുട്ടിയും കേരളത്തിലെ കുട്ടിയും ഒരേ കാര്യമാണോ പഠിക്കേണ്ടത് ? സംസ്കൃതം പഠിക്കുന്നതും സംസ്കൃതം ഒരു നയരൂപീകരണത്തിന്റെ ഭാഗമാകുന്നതും തമ്മിലുള്ള വ്യത്യാസം എന്താണ് ? ഇന്ത്യയിലെ സ്വാശ്രയ സ്വകാര്യ സർവകലാശാലയിലെ autonomy അക്കാദമിക കാര്യങ്ങളിൽ എത്രമാത്രം പ്രസക്തമാണ്   തുടങ്ങി വിവിധ വിഷയങ്ങൾ പ്രൊഫസ്സർ നാരായണൻ സംസാരിക്കുന്നു.

കോഴിക്കോട് സർവകലാശാലയിൽ ഇംഗ്ലീഷ് പ്രൊഫസറായ എം വി നാരായണൻ ഡോക്ടറേറ്റ് നേടിയത് ഇംഗ്ലണ്ടിലെ  University of Exeterൽ നിന്നാണ് . സിംലയിലെ Indian Institute of Advanced Studies ൽ ഫെല്ലോ ആയിരുന്ന പ്രൊഫസ്സർ നാരായണൻ അവതരണകലകളിൽ പ്രത്യേകിച്ച് കൂടിയാട്ടത്തിൽ ആഴത്തിലുള്ള പഠനങ്ങൾ നടത്തിയിട്ടുണ്ട് . മുൻപ് ജപ്പാനിലെ മിയസാക്കി International University യിലും ഷാർജാ യൂണിവേഴ്സിറ്റിയിലും പഠിപ്പിച്ചിട്ടുണ്ട്.

ഒട്ടും സന്തോഷകരമല്ലാത്ത ഒരു പോഡ്കാസ്റ്റ് .

കവി പി എൻ ഗോപീകൃഷ്ണൻ അന്തരിച്ച കവി ലൂയിസ് പീറ്ററിനെ അനുസ്മരിക്കുന്നു .

നാം നിഷ്കളങ്കമെന്നു വിചാരിക്കുന്ന 'നമ്മൾ' എന്ന നിർമ്മിതിയിലെ സിമന്റും മണലും നമുക്ക് കാട്ടി തന്ന ഒരാളെ കുറിച്ച് .

അയാൾ തന്നെയായിരുന്നു അയാളുടെ കവിതാസമാഹാരം .

മരിക്കുന്നതിനു തലേന്നും കവി ഗോപീകൃഷ്ണനെ വിളിച്ചിരുന്നു .

ഹൃദയസ്പർക്കായ ഒരു സ്നേഹസന്ദേശം , കൂടെ ലൂയിസ് പീറ്ററിന്റെ ശബ്ദത്തിൽ അദ്ദേഹത്തിൻറെ ഒരു കവിതയും ..

"എങ്കിലും ഇന്നെനിക്കെന്റെ നോവിനെ

ഒരു നുണയുടെ മാറിൽ നിന്നും പറിച്ചെടുക്കണം.

തെളിയാൻ തുടങ്ങും വിഭാതത്തെ എന്ന പോൽ

അതിനെ മാത്രം കണ്ടുകണ്ടിരിക്കുവാൻ

എനിക്കെന്റെ മിഴികൾ അടയ്ക്കണം

ഉണരാതെയുറങ്ങണം"

സത്യജിത്ത് റേ ജന്മശതാബ്ദി പോഡ്കാസ്റ്റ് പരമ്പരയിലെ മൂന്നാം ഭാഗമാണിത്. റേ യുടെ ശബ്ദലോകത്തെ കുറിച്ച് അവഗാഹത്തോടെ സംസാരിക്കുന്നത് ചലച്ചിത്ര ചരിത്രകാരനായ ശ്രീ ഐ ഷൺമുഖദാസ് ആണ് . സത്യജിത്ത് റേ തന്നെ ഒരിക്കൽ പറഞ്ഞിട്ടുണ്ട് സിനിമ കേൾവിയുടെ കൂടി മാധ്യമം ആണെന്ന് . പഥേർ പാഞ്ചാലി മുതൽ അഗാന്തുക് വരെയുള്ള അദ്ദേഹത്തിൻറെ  ഫീച്ചർ- ഡോക്യുമെന്ററി സിനിമകളെ സസൂക്ഷ്മം വിശകലനം ചെയ്ത് അദ്ദേഹം സിനിമകളിൽ സംഗീതേതര - സംഭാഷണേതര ശബ്ദത്തെ എങ്ങനെ സമീപിച്ചു എന്ന് അന്വേഷിക്കുകയാണ് ഈ പോഡ്കാസ്റ്റ് . ഇന്ന് വിൻസെന്റ് വൻഹോഹ് ചരമദിനമാണ് . അദ്ദേഹം  അവസാന ചിത്രത്തിൽ വരച്ചത്  വേരുകളാണ്. വേരുകളെ ഏറ്റവും സ്മരിക്കേണ്ട ഒരു കാലത്ത് നമുക്ക് സത്യജിത്ത് റേയുടെ ശബ്ദലോകത്തെ സ്മരിക്കാം . പോഡ്‌കാസ്റ്റിലേക്ക് സ്വാഗതം .

അശ്ലീലമാണ് തെറ്റുതിരുത്താൻ തയ്യാറാകാത്ത നമ്മുടെ ധർമ്മസങ്കടങ്ങൾ . വൃത്തികേടാണിത് .

lockdown ഒരു ആഗോള വ്യവസ്ഥാ തകർച്ചയിലേക്ക് വിരൽ ചൂണ്ടിയില്ലേ ? അടിസ്ഥാനപരമായ ചോദ്യങ്ങൾ ചോദിക്കാതെ ഏത് അരക്ഷിതഭാവിയിലേക്കാണ് നാം നമ്മുടെ കുഞ്ഞുങ്ങളെ തള്ളിവിടുന്നത് ?

സാധാരണനിലയിലേക്ക് പോകാൻ ലോകനേതാക്കൾക്കും സാമ്പത്തികശക്തികൾക്കും ധൃതിയാണ് ...പക്ഷേ , ആരുടെ സാധാരണനില ? അതാണ് ജനങ്ങൾ സ്വയം ചോദിക്കേണ്ട ചോദ്യം .

ഇംഗ്ലണ്ടിൽ ഒരു ഹിതപരിശോധന പറഞ്ഞത് വെറും പന്ത്രണ്ടു ശതമാനമാണ് കോവിഡിന് മുൻപേയുള്ള നില വീണ്ടും ആഗ്രഹിക്കുന്നത് എന്നാണ് ...പക്ഷേ നമുക്കും നമ്മെ ഭരിക്കാൻ നാം ഏൽപ്പിച്ചവർക്കും ഇടയിൽ ഒരു സാമൂഹ്യ അകലം ഇല്ലേ ? ലോകത്തെവിടെയും ?

നമ്മുടെ കുഞ്ഞുങ്ങൾക്കായി ഒരു പോഡ്കാസ്റ്റ്

ആധുനിക ഇന്ത്യയിലെ   നൃത്തത്തിന്റെ നൂറുകൊല്ലത്തെ ചരിത്രത്തിലേക്ക് ഒരു  വിശദ വീക്ഷണമാണ് ഈ ലക്കം ദില്ലി -ദാലി .

കഴിഞ്ഞ ദിവസം കൊൽക്കത്തയിൽ നൂറ്റിയൊന്നാം വയസ്സിൽ അന്തരിച്ച അമല ശങ്കറിന്റെ വിയോഗത്തോടെ അസ്തമിച്ച ഒരു കാലഘട്ടത്തെ കുറിച്ച് ആധികാരികമായി സംസാരിക്കുന്നത് പ്രശസ്ത കലാനിരൂപകനായ ശ്രീ സദാനന്ദ് മേനോനാണ് .

ദേശീയ പ്രസ്ഥാനവും , കലാരംഗവും , 1920 -1930 കളിൽ ലോകനൃത്തരംഗം , ഉദയ് ശങ്കർ സംഘത്തിന്റെ ആവിർഭാവം , ഇന്ത്യ എന്ന ആശയവും ലാവണ്യലോകവും , ഓറിയന്റലിസവും ഇന്ത്യൻ നൃത്തവും , Marius Petipa , Nijinsky, Ruth St Denis, Alice Boner, Anna Pavlova തുടങ്ങിയവർ , വള്ളത്തോളും ആലീസ് ബോണറും , ടാഗോറും നൃത്തവും , 1948 ലെ കൽപ്പന എന്ന ചലച്ചിത്രം , എങ്ങനെ ഇന്ത്യൻ നൃത്തരംഗം പിന്നോട്ടു പോയി ...45 മിനിറ്റ് ദൈർഘ്യമുള്ള പോഡ്കാസ്റ്റ് . ഒരു കാലഘട്ടത്തിലേക്ക് തിരിച്ചുവെച്ച കണ്ണാടി