ថ្មី​ៗ​នេះ អតីត​អ្នក​នយោបាយ​នៃ​គណបក្ស​ប្រឆាំង​បាន​ចេញ​មុខ​សុំ​សិទ្ធិ​ធ្វើ​នយោបាយ​ឡើង​វិញ​ជា​បន្ត​បន្ទាប់​។ ការ​សុំ​សិទ្ធិ​ធ្វើ​នយោបាយ​ឡើង​វិញ​នេះ ត្រូវ​បាន​ពួក​គេ​អះអាង​ថា ធ្វើ​ឡើង​ដើម្បី​រួបរួម «អ្នក​ប្រជាធិបតេយ្យ» ឡើង​វិញ​។ ជាការ​ពិត ចរន្ត «អ្នក​ប្រជាធិបតេយ្យ» មិន​មែន​ជា​រឿង​ថ្មី​អ្វី​ទេ​នៅ​កម្ពុជា​។ ពាក្យ​ថា «ប្រជាធិបតេយ្យ ឬ​អ្នក​ប្រជាធិបតេយ្យ» គឺ​ជា​អ្វី​ដែល​អ្នក​នយោបាយ​នៅ​កម្ពុជា តែង​តែ​លើក​ឡើង​ដើម្បី​ទាក់ទាញ​ការ​គាំទ្រ​ពីសំណាក់​ប្រជាពលរដ្ឋ​។ ប៉ុន្តែក្នុង​ការ​អនុវត្ត​ជាក់​ស្ដែងនា​រយៈ​ពេល​ជាង​៣​ទសវត្ស​ចុង​ក្រោយ​នេះ គេ​សង្កេត​ឃើញ​ថា អ្នក​នយោបាយ​ទាំង​នោះ ពុំ​ទាន់​បាន​អនុវត្ត​គោលការណ៍​ប្រជាធិបតេយ្យ​ឲ្យ​បាន​ពេញ​លេញ​នៅ​ឡើយ​ទេ​។