ព្រះតេជគុណ សុខ សឹង ព្រះចៅអធិការវត្តគិរីរុក្ខារាមដងរែក (ហៅវត្តគ្រែផុស) ក្នុងស្រុកថ្មពួក ខេត្តបន្ទាយមានជ័យត្រូវបានបណ្តេញចេញពីវត្តកាលពីថ្ងៃទី១៤ កុម្ភៈ ក្រោមហេតុផលថា ព្រះចៅអធិការវត្តអង្គនេះមានពាក់ព័ន្ធនឹងរឿងស្រីញី ការចំណាយលុយវត្តខុសខ្ទង់ និងរឿងនយោបាយជាដើម។ ក្នុងបទសម្ភាសខ្លីជាមួយវិទ្យុបារាំងអន្តរជាតិ RFI នៅថ្ងៃទី២១កុម្ភៈ ព្រះតេជគុណ សុខ សឹង បដិសេធមិនទទួលយកចំណុចចោទប្រកាន់ទាំងនេះទេ ក៏ប៉ុន្តែព្រះតេជគុណអង្គនេះមានសង្ឃដីកាថា ត្រូវតែបង្ខំចិត្តចាកចេញពីវត្ត ព្រោះខ្លាចត្រូវគេចាប់ផ្សឹក។

គួរជម្រាបជូនថា លិខិតរបស់សាលាគណខេត្តបន្ទាយមានជ័យចុះថ្ងៃទី១៥កុម្ភៈ ដែលវិទ្យុបារាំងអន្តរជាតិទើបទទួលបាន នៅថ្ងៃសុក្រនេះបានបញ្ជាក់ថា ព្រះតេជគុណ សុខ ស៊ឹង ពិតជាបានប្រព្រឹត្តខុសវិន័យសង្ឃ និង ពុទ្ធបរិស័ទចំណុះជើងវត្តអស់ទំនុកចិត្តច្រើនលើកច្រើនសា ក្នុងរយៈពេលជាង ៣ឆ្នាំមកនេះ។ សាលាគណខេត្តបន្ទាយមានជ័យបញ្ជាក់ថា មន្ត្រីសង្ឃសាលាអនុគណបានសម្រេចដកសិទ្ធជាព្រះចៅអធិការវត្ត និងនិមន្តលោកឱ្យចាកចេញពីវត្ត ក្រោមការព្រមព្រៀងពីភិក្ខុ សុខ ស៊ឹងផ្ទាល់៕

មជ្ឈមណ្ឌលសកម្មភាពកំចាត់មីនកម្ពុជា(CMAC) កាលពីថ្ងៃទី២០ ខែកុម្ភៈ ឆ្នាំ២០២៥ បានទទួលការបញ្ជាក់ជាផ្លូវការពីក្រសួងការបរទេសអាមេរិក ដែលសម្រេច​អនុញ្ញាតឲ្យគម្រោងសកម្មភាពបោសសម្អាតគ្រាប់មីន និងសំណល់យុទ្ធភណ្ឌសង្គ្រាម ដែលស្ថិតក្រោមជំនួយអាមេរិកដំណើរការឡើងវិញ។ នៅក្នុងកិច្ចសម្ភាសជាមួយវិទ្យុបារាំង RFI នាថ្ងៃទី២១ ខែកុម្ភៈ ឆ្នាំ២០២៥នេះ លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជាបានសម្តែងនូវការសាទរចំពោះការសម្រេចរបស់រដ្ឋាភិបាលអាមេរិក។ បើតាមលោក ហេង រតនា CMACនឹងបន្តស្នើសុំជំនួយពីអាមេរិករយៈពេល៣ឆ្នាំទៀត ខណៈគម្រោងបោសសម្អាតមីនគាំទ្រដោយជំនួយអាមេរិកបច្ចុប្បន្ននឹងត្រូវបញ្ចប់នៅខែតុលា ឆ្នាំ២០២៥នេះ។

ថ្ងៃទី២០កុម្ភៈ ជាទិវាយុត្តិធម៌សង្គម ដែលរៀបចំឡើង នៅទូទាំងពិភពលោក។ ទិវានេះត្រូវបានបង្កើតឡើង នៅឆ្នាំ២០០៧ នៅមហាសន្និបាតអង្គការសហប្រជាជាតិ ក្នុងគោលដៅបង្ហាញពីសារៈសំខាន់នៃការដោះស្រាយបញ្ហាសកល ដូចជា ភាពក្រីក្រ អបរិយាបន្នសង្គម ភាពអត់ការងារធ្វើ វិសមភាពយេនឌ័រ និងការរំលោភសិទ្ធិមនុស្ស។ នៅក្នុងបទសម្ភាសជាមួយវិទ្យុបារាំងអន្តរជាតិ នៅថ្ងៃព្រហស្បតិ៍ទី២០កុម្ភៈ លោកបណ្ឌិត ប៉ា ច័ន្ទរឿន ប្រធានវិទ្យាស្ថានប្រជាធិបតេយ្យកម្ពុជា កត់សម្គាល់ថា រដ្ឋនិងអង្គការក្រៅរដ្ឋាភិបាលមិនសូវអើពើពីទិវាអន្តរជាតិមួយនេះទេ។ ម៉េ្លះហើយទើបយុត្តិធម៌សង្គមក្នុងប្រទេសកម្ពុជាតែងស្ថិតក្នុងស្ថានភាពដ៏គួរឲ្យបារម្ភ។ ក្នុងនាមជាអ្នកធ្វើការសង្គម លោកយល់ថា ការពង្រឹងយុត្តិធម៌សង្គមកម្ពុជាអាចល្អប្រសើរទៅបាន លុះត្រាតែរដ្ឋាភិបាលហ៊ានអនុវត្តនូវអភិបាលក្រមទាំង៥ របស់លោកហ៊ុន សែន គឺការ «ឆ្លុះកញ្ចក់ ងូតទឹក ដុសក្អែល ព្យាបាល វះកាត់»។

កងទ័ពកម្ពុជា និងកងទ័ពថៃដែលឈរជើងនៅលើប្រាសាទតាមាន់ធំបានប្រឈមមុខដាក់គ្នាដោយសំដីកាលពីថ្ងៃទី១៣ ខែកុម្ភៈ ឆ្នាំ២០២៥ ក្រោយទាហានថៃបានហាមឃាត់ពលរដ្ឋខ្មែរមួយក្រុមដែលឡើងទៅច្រៀងចម្រៀងជាតិខ្មែរនៅទីនោះ។ នៅក្នុងកិច្ចសម្ភាសជាមួយវិទ្យុបារាំងអន្តរជាតិRFI នាថ្ងៃទី១៩ ខែកុម្ភៈ ឆ្នាំ២០២៥នេះ លោក មាន ចាន់យ៉ាដា អភិបាលខេត្តឧត្តរមានជ័យបានថ្លែងថាហេតុការណ៍យល់ច្រលំគ្នារវាងកងទ័ពកម្ពុជា និងកងទ័ពថៃនៅលើប្រាសាទតាមាន់កាលពីថ្ងៃទី១៣ កុម្ភៈ ត្រូវបានដោះស្រាយគ្នាភ្លាមៗ តាមយន្តការទំនាក់ទំនងនៃគណៈកម្មការព្រំដែនប្រទេសទាំងពីរ។ ដោយអំពាវនាវឲ្យពលរដ្ឋខ្មែរទៅធ្វើទេសចរណ៍នៅទីនោះ លោកអភិបាលខេត្តបញ្ជាក់ថាប្រាសាទតាមាន់បានវិលមករកស្ថានភាពដើមវិញហើយ។

កាលពី​ពេល​ថ្មីៗ​នេះ មាន​ការ​កម្រើក​ឡើង​វិញ​នូវ​ការ​មិន​យល់​គ្នា​រវាង​ទាហាន​ថៃ និង​ទាហាន​កម្ពុជា​ ដែល​កំពុង​ឈរ​ជើង​ប្រចាំ​ការ​នៅ​ប្រាសាទ​តា​មាន់​ធំ​ ក្នុង​ឃុំគោកមន ​ស្រុកបន្ទាយ​អំពិល ​ខេត្ត​ឧត្តរ​មាន​ជ័យ​។ ការ​មិន​យល់​គ្នា​នេះ​ដោយ​សារ​តែ​ទាហាន​ថៃ​បាន​ហាម​ឃាត់​មិន​ឲ្យ​ពលរដ្ឋ​ខ្មែរ​ដែល​ទៅ​លេង​ប្រាសាទតា​មាន់​ច្រៀង​ចម្រៀងជាតិ​នៅ​លើ​ប្រាសាទ​នោះ​។​ ឆ្លើយ​តប​នឹង​ទង្វើ​របស់​ទាហាន​ថៃ​ ភាគី​កម្ពុជា​ដែល​ឈរ​ជើង​នៅ​ទី​នោះ​បាន​បញ្ជាក់​ថា ​កម្ពុជា​ក៏​នឹង​មិន​អនុញ្ញាត​ឲ្យ​ភាគី​ថៃ​ធ្វើ​សកម្មភាព​ដូច​គ្នា​នេះដែរ​ តទៅ​ថ្ងៃ​មុខ​។​ អគ្គ​លេខា​ធិការ​នៃ​រាជ​បណ្ឌិត​សភា​កម្ពុជា លោក​បណ្ឌិត យង់ ពៅ ​បញ្ចេញ​ទស្សនៈ​ថា ​ទាក់​ទង​នឹង​បញ្ហា​ប្រាសាទ​តាមាន់​ធំ​ កម្ពុជា​ត្រូវ​ខិត​ខំ​ចរចា​ជាមួយ​ថៃ​ដោយ​ផ្អែក​លើ​ផែន​ទី​បារាំង-សៀម ​ដើម្បីអាច​បញ្ចប់​ការ​មិន​យល់​គ្នា​៕

កិច្ចពិភាក្សាស្តីពីការផ្លាស់ប្តូររថយន្តប្រភេទដឹកទំនិញ ដែលដឹកកម្មករឈរ មកជារថយន្តប្រភេទដឹកអ្នកដំណើរ ឬកែច្នៃឱ្យមានកៅអីអង្គុយត្រូវបានធ្វើឡើងជាបន្តបន្ទាប់ ក៏ប៉ុន្តែមិនទាន់ចេញជាលទ្ធផលយ៉ាងណានៅឡើយ។ តាមគម្រោង យន្តការផ្លាស់ប្តូរការធ្វើដំណើររបស់កម្មករ និយោជិតពីរថយន្តដឹកទំនិញ ទៅជារថយន្តមានសុវត្ថិភាព ត្រូវធ្វើឲ្យចេញជាលទ្ធផលនៅឆ្នាំ២០២៧ខាងមុខ។ នៅក្នុងកិច្ចសម្ភាសជាមួយវិទ្យុបារាំងអន្តរជាតិ RFI លោក ហ្វា សាលី ប្រធានសម្ព័ន្ធសហជីពជាតិបានឲ្យដឹងថាគម្រោងផ្លាស់ប្តូររថយន្តធ្វើដំណើររបស់កម្មករនិយោជិតប្រកបដោយសុវត្ថិភាពគួរតែត្រូវបានបញ្ចប់មុនកាលកំណត់ ព្រោះថា កម្មករនិយោជិតនៅតែបន្តជួបគ្រោះថ្នាក់ជាបន្តបន្ទាប់ ដោយសារការធ្វើដំណើរដោយឈរនៅលើរថយន្តដឹកទំនិញ។

ត្រឹមរយៈពេលតែ ១ខែ១០ថ្ងៃ នៃដើមឆ្នាំ២០២៥នេះ អគ្គិភ័យបានកើតឡើងច្រើនធៀបនឹងរយៈពេលដូចគ្នាក្នុងឆ្នាំ២០២៤ ដែលបានធ្វើឲ្យបាត់បង់ជីវិតមនុស្ស ៩នាក់ និងបំផ្លិចបំផ្លាញទ្រព្យសម្បត្តិពលរដ្ឋអស់ជាច្រើន។ នៅក្នុងកិច្ចសម្ភាសជាមួយវិទ្យុបារាំងអន្តរជាតិ RFI នាថ្ងៃទី១៤ ខែកុម្ភៈ ឆ្នាំ២០២៥ នេះ លោកឧត្តមសេនីយ៍ទោ សឿ រិទ្ធី អនុប្រធាន និងជាអ្នកនាំពាក្យនៃនាយកដ្ឋាននគរបាលបង្ការ ពន្លត់អគ្គិភ័យ និងសង្គ្រោះនៃអគ្គស្នងការនគរបាលជាតិក្រសួងមហាផ្ទៃបានថ្លែងថា អង្គភាពរបស់លោក ក៏ដូចជាថ្នាក់ដឹកនាំអគ្គស្នងការ និងក្រសួងមហាផ្ទៃមានការព្រួយបារម្ភចំពោះកំណើនអគ្គិភ័យនៅដើមឆ្នាំ ២០២៥ នេះ។

នៅថ្ងៃអង្គារ ទី១១ កុម្ភៈ អង្គការតម្លាភាពកម្ពុជាបានចេញផ្សាយរបាយការណ៍ស្តីពីការយល់ឃើញអំពើពុករលួយប្រចាំឆ្នាំ២០២៤។ តាមរបាយការណ៍ កម្ពុជាបន្តស្ថិតដូចឆ្នាំ ២០២៣ នៅលេខរៀងទី១៥៣ក្នុងចំណោម១៨០ប្រទេសក្នុងនាមជារដ្ឋដែលមានអំពើពុករលួយគួរឲ្យកត់សម្គាល់។ នៅក្នុងបទសម្ភាសជាមួយវិទ្យុបារាំងអន្តរជាតិ RFI នាថ្ងៃព្រហស្បតិ៍ទី១៣ កុម្ភៈ នេះ លោក សយ ច័ន្ទវិចិត្រ អ្នកនាំពាក្យអង្គភាពប្រឆាំងអំពើពុករលួយ ACU បញ្ជាក់ថា ACU គ្មានអ្វីត្រូវធ្វើអត្ថាធិប្បាយលើរបាយការណ៍របស់អង្គការតម្លាភាពកម្ពុជា តែទទួលយកត្រឹមជាព័ត៌មានដើម្បីសិក្សាបន្ថែម។

មួយរយៈចុងក្រោយនេះ សត្វស្វានៅក្នុងបរិវេណប្រាសាទអង្គរវត្តបានបង្កគ្រោះថ្នាក់ដល់ភ្ញៀវទេសចរជារៀងរាល់ថ្ងៃ រួមទាំងមានចរិកបំផ្លិចបំផ្លាញសម្ភារៈផ្សេងៗនៅតំបន់រមណីយដ្ឋានប្រវត្តិសាស្ត្រមួយនេះ។ នៅក្នុងកិច្ចសម្ភាសជាមួយវិទ្យុបារាំងអន្តរជាតិ RFI នាថ្ងៃទី១២ ខែកុម្ភៈ ឆ្នាំ២០២៥ នេះ លោក ឡុង កុសល អគ្គនាយករង និងជាអ្នកនាំពាក្យអាជ្ញាធរជាតិអប្សរាបានបញ្ជាក់ថា កំណើនសត្វស្វានៅក្នុងតំបន់អង្គរ គឺជាការព្រួយបារម្ភមួយ ដែលអាជ្ញាធរជាតិអប្សរាត្រូវមានដំណោះស្រាយបន្ទាន់ តាមរយៈវិធានការសមរម្យ និងមិនហួសហេតុពេក។

លោក Elon Musk រដ្ឋ​មន្ត្រី​ក្រសួង​ប្រសិទ្ធិ​ភាព​នៃ​រដ្ឋ​បាល​ ​លោក ដូណាល់ ត្រាំ ​បាន​ប្រកាស​ពី​ផែន​ការ​កាត់​ផ្តាច់​ជំនួយ​របស់​សហ​រដ្ឋ​អាមេរិក​ពី​ទី​ភ្នាក់​ងារ​សហ​រដ្ឋ​អាមេរិក​សម្រាប់​ប្រព័ន្ធ​ផ្សព្វ​ផ្សាយ​សាកល​ហៅកាត់​ USAGM។​ ទីភ្នាក់​ងារ​មួយ​នេះ​ជា​អ្នក​ផ្តល់​ជំនួយ​ទៅ​ឲ្យ​វិទ្យុ​សំឡេង​សហរដ្ឋ​អាមេរិក​ (VOA)​ វិទ្យុ​អឺរ៉ុប​សេរី​ (RFE) និង​វិទ្យុ​អាស៊ីសេរី​(RFA)​។​ ក្នុង​បទ​សម្ភាស​ជា​មួយ​វិទ្យុ​បារាំង​អន្តរ​ជាតិ​ RFI​ នៅ​ថ្ងៃ​ទី​១១ ​ខែ​កុម្ភៈ ​លោក​ ណុប ​វី​ នាយក​ប្រតិ​បត្តិ​សមាគម​សម្ព័ន្ធ​អ្នក​សារព័ត៌​មាន​កម្ពុជា​ (ខាមបូចារ) លើក​ឡើង​ថា បើ​ផែន​ការ​នេះ​ក្លាយ​ជា​ការ​ពិត​មែន​ នោះ​វានឹង​ធ្វើ​ឲ្យប៉ះ​ពាល់​ខ្លាំង​ដល់​សិទ្ធិ​ទទួល​បាន​ព័ត៌​មាន​របស់​ពល​រដ្ឋ​ខ្មែរ​៕