Illugi Jökulsson les samantekt sína úr hinum bráðskemmtilegu „Endurminningum ævintýramanns“, æskuminningum Jóns Ólafssonar ritstjóra. Þar koma við sögu frönsk herskip á Fáskrúðsfirði, saltfiskur, draugar, fróðleiksfús grís, og ýmislegt fleira.

Jón Ólafsson ritstjóri sagði um foreldra sína: „Móðurástinni er viðbrugðið og flestir, sem ég þekki, hafa elskað móður sína meira en föður. Mér hefir verið alveg gagnstætt farið; mér var alt af faðir minn svo miklu kærri en móðir mín [...] Hún var ekki stórlynd kona, en sí-aðfinningasöm og nöldursöm. meðan við vorum á ungum aldri. Eftir að við óxum upp, var hún barnaleg [...] Hún þreytti okkur og þreyttist á okkur á víxl.“

Mutesa 1. var konungur í Búganda 1856-1884. Hann var furðulegur og grimmur harðstjóri eins og þeir lýstu, sumir evrópsku landkönnuðirnir sem komu að leita að upptökum Nílar á síðari hluta 19. aldar. Þeir voru nú ekki allir merkilegir pappírar en fyrirbrigði eins og Mutesa höfðu þeir aldrei séð. Umsjón: Illugi Jökulsson.

Árið 1872 vakti gestur frá Bretlandi mikla athygli og var sagt frá honum í blöðum. Þetta var Richard Burton, frægur landkönnuður. Hann skrifaði bókina Ultima Thule sem hann sendi frá sér þremur árum eftir komuna til Íslands. Hann sagði frá ferð sinni í blaðinu Standard og þótti Íslendingum hann fjalla glannalega og ómaklega um land og þjóð og birta skakka og illgjarna dóma um Ísland og Íslendinga.

Illugi Jökulsson gluggar í bókina Gamanþættir af vinum mínum eftir Magnús Á. Árnason listamann, sem var málari og tónskáld, en var líka ágætis söngvari og leikari. Hann les kafla úr bókinni þar sem Magnús segir frá dvöl sinni í Bandaríkjunum.

Illugi Jökulsson les úr frásöng rússneska rithöfundarins Anton Tsékov, sem var læknir og tók starf sitt mjög hátíðlega. Sumarið 1892 var hann héraðslæknir þar sem heitir Melikovo nálægt Moskvu og þangað stefndi ógurlegur kólerufaraldur. Tsékov hóf undirbúning fyrir sóttvarnir og skrifaði vini sínum jafnharðan um allt sem gerðist. Hann harmar að hafa engan tíma til að skrifa.

Illugi Jökulsson les valda kafla úr fjörlegum æskuminningum Flosa Ólafssonar leikara. Meðal annars segir frá því þegar Flosi gekk ungur að árum til liðs við ungliðafylkingu íslenskra nasista.

Illugi Jökulsson fjallar um bartskera og grasalækningar. Hann les samantekt sem Guðmundar bóndi Jónsson á Hoffelli ritaði og fjallar um Hjörleif Jónsson, sem var ýmist kallaður bartskeri eða læknri og var uppi um miðja 19. öld.

Illugi Jökulsson les tvær smásögur eftir Gabriel Garcia Márquez. Hann byrjar á smásögunni Dásamlegur dagur í lífi Baltarsars frá árinu 1955, sem birtist í tímaritinu Svart á hvítu í þýðingu Erlu Sigurðardóttur. Seinni sagan heitir Mjög gamall maður með afar stóra vængi og er frá árinu 1962. Hún birtist í Tímariti Máls og menningar í þýðingu Ingibjargar Haraldsdóttur.

Nikulás á Munkaþverá var íslenskur ábóti sem fór til Rómar um 1150. Til er leiðarlýsing hans og í þættinum er lesið úr henni, fjallað um það sem vitað er um Nikulás og fjölyrt um hvers konar borg Róm var á 12. öld.