នៅ​ព្រឹក​ថ្ងៃ​ទី​២​ ខែ​មិថុនា ឆ្នាំ​២០២៥​ សមាជ​របស់​រដ្ឋ​សភា ​និង​ព្រឹទ្ធ​សភា​កម្ពុជា ​បាន​អនុម័ត​លើ​សេចក្ដី​ថ្លែង​ការណ៍ ​របស់​​នាយក​រដ្ឋ​មន្ត្រី​ លោក​ ហ៊ុន​ ម៉ាណែត ​ក្នុង​ការ​ប្ដឹង​ករណី​ជម្លោះ​ព្រំ​ដែន​រវាង​កម្ពុជា​ និង​ថៃ ​ទៅ​កាន់​តុលាការ​យុត្តិធម៌​អន្តរ​ជាតិ​(ICJ)​នៅ​ប្រទេស​ហូឡង់​។​ នៅ​មុន​ការ​អនុម័ត​នេះ​ ប្រមុខ​រដ្ឋាភិ​បាល​​កម្ពុជា​ បាន​បញ្ជាក់​ថា ​កម្ពុជា​នឹង​ប្តឹង​ករណី​នៅ​ចំណុច​មុំ​បី​ ករណី​ប្រាសាទ​តាមាន់​ធំ​-តាមាន់​តូច ​និង​ករណី​ប្រាសាទ​តាក្រ​បី ​ទៅ​កាន់​តុលាការ​ICJ​ បើ​ទោះជា​ភាគី​ថៃ​មិន​ព្រម​ក៏​ដោយ​។​ អ្នក​នយោបាយ​បក្ស​ប្រ​ឆាំង​ និង​អ្នក​តាម​ដាន​ស្ថាន​ការណ៍​ព្រំ​ដែន​ បាន​គាំ​ទ្រ​គម្រោង​នេះ​ តែ​ពួកគេ​ចង់​ឲ្យ​កម្ពុជា​ដាក់​បញ្ចូល​ទាំង​សំណុំ​រឿង​ព្រំដែន​គោក និង​ព្រំដែន​ទឹក​(កោះគុត)​ទៅជា​មួយ​ផង​៕