កាលពីរសៀលថ្ងៃទី១៥ ខែឧសភា ឆ្នាំ២០២៥ មន្ត្រីនគរបាលម្នាក់មានឋានៈជាប្រធានការិយាល័យទទួលបន្ទុកផ្នែកភស្តុភារនៃស្នងការដ្ឋាននគរបាលក្រុងភ្នំពេញបានបើកបររថយន្តក្រោមឥទ្ធិពលនៃជាតិស្រវឹងទៅបុករះយានផ្សេងៗទៀតនៅតាមដងផ្លូវក្នុងក្រុងភ្នំពេញដោយបណ្តាលឲ្យមានមនុស្សម្នាក់ស្លាប់ ២នាក់រងរបួសធ្ងន់ និងខូចខាតសម្ភារៈមួយចំនួន។ ហេតុការណ៍នេះត្រូវបានមហាជនក៏ដូចជាអ្នកតាមដានសង្គមរិះគន់ថា មន្ត្រីដែលជាគំរូ និងជាអ្នកអប់រំពលរដ្ឋបែរជាបានប្រព្រឹត្តល្មើសច្បាប់ទៅវិញ។ ក្នុងន័យនេះពួកគេទទូចឲ្យមានការដាក់ទោសធ្ងន់ធ្ងរដល់មន្ត្រីដែលបំពានច្បាប់ដើម្បីព្រមានដល់មន្ត្រីផ្សេងៗទៀតដែលមិនគោរពច្បាប់។