Dapi l'atun passà sa preschenta il Tatort da SRF cun in nov team, in team feminin. Entant han las cumissarias Isabelle Grandjean e Tessa Ott gia schlià dus cas e la terz'episoda è en producziun.

Las duas cumissarias da la televisiun san spert, co che la victima è vegnida mazzada: cun in sajet or da curta distanza. Senza esser en possess da l'arma da delict san ellas ers precisar, da tge tip d'arma ch'il projectil deriva. È quai realistic? Quai ha la Marella vulì savair ed ha analisà cun trais collavuraturs da la polizia criminala dal Grischun in pèr scenas da l'emprima episoda dal Tatort che gioga a Turitg.

Repetiziun da l'october 2020. Durant la stad preschenta la Marella er quest onn inquala perla radiofonica ord noss archiv.