កាលពីសប្ដាហ៍មុន សហរដ្ឋ​អាមេរិក​ដឹក​នាំ​ដោយ​លោក​ប្រធានាធិបតី ចូ បៃដិន បាន​រៀបចំ​វេទិកា​កំពូល​ដើម្បី​ប្រជាធិបតេយ្យ ដោយ​អញ្ជើញ​​ប្រទេស​ជាង​១០០​ចូល​រួម​តាម​ប្រព័ន្ធ​វីដេអូ​។ ជា​ការ​កត់​សម្គាល់ នៅ​ក្នុង​ចំណោម​ប្រទេស​ទាំង​អស់​នោះ អាមេរិក​មិន​បាន​អញ្ជើញ​ប្រទេស​កម្ពុជា​ចូល​រួម​ឡើយ បើ​ទោះ​បី​ជា​កម្ពុជា​ជា​ប្រទេស​ប្រកាន់​យក​របប​ប្រជាធិបតេយ្យ​សេរីពហុបក្ស និង​បាន​អនុវត្ត​របប​នេះ​ជាប់​រហូត​មក​តាំង​ពី​ឆ្នាំ​១៩៩៣​ហើយ​ក៏​ដោយ​។ ការ​មិន​អញ្ជើញ​កម្ពុជា​ឲ្យ​ចូល​រួម​នៅ​ក្នុង​វេទិកា​ដ៏​មាន​សារៈសំខាន់​នេះ តិច​ឬ​ច្រើន បាន​ឆ្លុះ​បញ្ចាំង​ឲ្យ​ឃើញ​ពី​ការ​វាយ​តម្លៃ​របស់​អាមេរិក​មក​លើ​ស្តង់ដារ​ប្រជាធិបតេយ្យ​កម្ពុជា​។ ស្តង់ដារ​ប្រជាធិបតេយ្យ​កម្ពុជា ដែល​អាមេរិក និង​ប្រទេស​លោក​ខាង​លិច​មួយ​ចំនួន​ចាត់​ទុក​ថា «មិន​ទាន់​មាន​លក្ខណៈពេញ​លេញ»។