កម្មវិធីព័ត៌មានពេលរាត្រី - វីអូអេ podcast - Page 175

June 19, 2020 ព័ត៌មានពេលរាត្រី - មិថុនា 19, 2020

ព័ត៌មានសំខាន់ៗអំពីកម្ពុជាមានដូចជា៖ សាច់ញាតិនិងសមាជិកគ្រួសាររបស់អតីតមន្ត្រីគណបក្សប្រឆាំងដែលត្រូវបានតុលាការចោទប្រកាន់និងឃុំខ្លួន បានចេញតវ៉ាស្វែងរកអន្តរាគមន៍ពីអង្គការសហប្រជាជាតិ។ វេជ្ជបណ្ឌិតប្រយុទ្ធនឹងការឆ្លងរាលដាលនៃវីរុសកូរ៉ូណា ៦នាក់ ចេញមកពីគ្រួសារជនភៀសខ្លួនខ្មែរអាមេរិកាំងមួយ។ នៅក្នុងកម្មវិធី Hello VOA ពិសេស វាគ្មិនរបស់យើងគឺលោក ប្រាក់ សេរីវុឌ្ឍ ពិភាក្សាអំពី «ជនភៀសខ្លួនខ្មែរក្រោមប្រឈមនឹងអនាគតមិនច្បាស់លាស់ក្នុងការស្វែងរកសេរីភាព»។ ព័ត៌មានអន្តរជាតិសំខាន់ៗមានដូចជា៖ តុលាការកំពូលអាមេរិក រារាំងកិច្ចប្រឹងប្រែងលោកប្រធានាធិបតី Trump ដើម្បីបញ្ចប់កម្មវិធីជួយជនអន្តោប្រវេសន៍គ្មានក្រដាសស្នាម។ មន្ត្រីការបរទេសអាមេរិកម្នាក់ ចុះចេញពីតំណែង ដោយសារការឆ្លើយតបរបស់លោក Trump ចំពោះបញ្ហាជាតិសាសន៍។ រដ្ឋមន្ត្រីប្រចាំក្រសួងបង្រួបបង្រូមកូរ៉េខាងត្បូង លាចេញពីតំណែង ក្រោយភាពតានតឹងនៅឧបទ្វីបកូរ៉េ។ ការស្ទង់មតិមួយបង្ហាញថា លោកប្រធានាធិបតី Trump ធ្វើឲ្យមានការបែកបាក់ក្នុងប្រទេស។ ក្រុមសមាជិកសភាអាមេរិកខ្លះ ខឹងសម្បានឹងសកម្មភាពរបស់ប្រធានថ្មីនៃទីភ្នាក់ងារ USAGM ដែលបានបណ្តេញបុគ្គលិកក្នុងថ្នាក់ដឹកនាំខ្លះរបស់ទីភ្នាក់ងារនេះ និងព័ត៌មានអន្តរជាតិផ្សេងៗទៀត៕

1 hr

June 18, 2020 ព័ត៌មានពេលរាត្រី - មិថុនា 18, 2020

ព័ត៌មានសំខាន់ៗអំពីកម្ពុជាមានដូចជា៖ កូនប្រុសច្បងរបស់លោក ហ៊ុន សែន ប្រតិកម្មនឹងការរិះគន់រឿងទិញរថយន្តយោធាពីចិន ដោយអះអាងថា ការបញ្ជាទិញនេះប្រើថវិកាសប្បុរសជន។ ក្រុមការពារសិទ្ធិមនុស្សយល់ថា ស្ថានភាពសិទ្ធិនយោបាយនៅកម្ពុជា បន្តអាប់អួរ ដែលបង្កជាផលវិបាកក្នុងការរក្សាប្រព័ន្ធអនុគ្រោះពន្ធ EBA។ នៅក្នុងកម្មវិធី Hello VOA នាថ្ងៃនេះ លោកវេជ្ជបណ្ឌិត តាំង តេកហុង ពិភាក្សាអំពី «ហានិភ័យនៃការឆ្លងវីរុសកូរ៉ូណា ខណៈប្រទេសបើកសកម្មភាពឡើងវិញ»។ ព័ត៌មានអន្តរជាតិសំខាន់ៗមានដូចជា៖ លោកប្រធានាធិបតី Trump បានចុះហត្ថលេខាលើបទបញ្ជានីតិប្រតិបត្តិស្តីពីកិច្ចការរបស់ប៉ូលិស ខណៈមានការតវ៉ាទាក់ទិននឹងអំពើហិង្សារបស់ប៉ូលិសនៅសហរដ្ឋអាមេរិក។ ការស្ទង់មតិថ្មីដោយទីភ្នាក់ងារព័ត៌មានបង្ហាញថា លោក Joe Biden មានសំឡេងគាំទ្រច្រើនលើសលុប លើលោកប្រធានាធិបតី Donald Trump។ ប្រធានថ្មីនៃទីភ្នាក់ងារ USAGM បញ្ឈប់តំណែងមេដឹកនាំទីភ្នាក់ងារក្រោមបង្គាប់មួយចំនួន។ លោក John Bolton អតីតទីប្រឹក្សាសន្តិសុខជាតិរបស់លោក Trump ថា លោក Trump ប្រឡូកជាមួយមេដឹកនាំពិភពលោកផ្សេងទៀត ដើម្បីផលចំណេញផ្ទាល់ខ្លួន។ ប្រទេសនូវែលហ្សេឡង់បានរកឃើញករណីឆ្លងថ្មីនៃវីរុសកូរ៉ូណាថែមទៀត បន្ទាប់ពីប្រទេសនេះប្រកាសថាមិនមានករណីឆ្លងថ្មី៕

1 hr

June 17, 2020 ព័ត៌មានពេលរាត្រី - មិថុនា 17, 2020

ព័ត៌មានអំពីកម្ពុជាមានដូចជា ក្រុមរដ្ឋមន្រ្តីថា កង្វះថវិកា និងមន្រ្តីជំនាញនៅថ្នាក់ក្រុង ស្រុក ខណ្ឌ ទូទាំងប្រទេស នៅតែជាបញ្ហា។ អ្នកពាក់ព័ន្ធថា ការបន្ធូរបន្ថយលក្ខខណ្ឌ និងការបើកផ្លូវធ្វើដំណើរក្នុងអាស៊ានអាចជួយស្ដារវិស័យទេសចរណ៍របស់កម្ពុជា។ ពលរដ្ឋខ្មែរខ្លះរីករាយនឹងតំបន់អង្គរស្ងប់ស្ងាត់ដែលអស់ក្រុមទេសចរបរទេស ដោយសារវិបត្តិជំងឺកូវីដ១៩។

ព័ត៌មានអន្តរជាតិវិញមាន អ្នកវិទ្យាសាស្រ្តចក្រភពអង់គ្លេសបានប្រកាសថា ប្រភេទថ្នាំ Dexamethasone ដែលមានតម្លៃថោក អាចជួយសង្គ្រោះជីវិតអ្នកជំងឺកូវីដ១៩ ដែលឈឺធ្ងន់បាន។ សភាសហរដ្ឋអាមេរិកនឹងផ្ដោតលើបញ្ហាកំណែទម្រង់ប៉ូលិសនៅថ្ងៃពុធនេះ។ ចិនដាក់ការរឹតត្បិតឡើងវិញ ដើម្បីគ្រប់គ្រងការផ្ទុះឡើងជាថ្មីនូវជំងឺកូវីដ១៩។ កូរ៉េខាងជើងនៅតែបន្តការបង្កហេតុ បន្ទាប់ពីបានបំផ្ទុះការិយាល័យទំនាក់ទំនងជាមួយកូរ៉េខាងត្បូងមក។ ធនាគារកណ្ដាលអាមេរិកថា សេដ្ឋកិច្ចនឹងមិនងើបឡើងវិញទេ បើសាធារណជនជឿថា ជំងឺកូវីដ១៩នៅមិនទាន់អាចគ្រប់គ្រងបាន។ អង្គការសហប្រជាជាតិជំរុញឲ្យមានការអត់ធ្មត់នៅតាមបណ្តោយព្រំដែនរវាងប្រទេសឥណ្ឌានិងចិន ខណៈមានការប្រយុទ្ធគ្នារវាងប្រទេសទាំងពីរ និងព័ត៌មានអន្តរជាតិសំខាន់ៗមួយចំនួនទៀត៕

1 hr

June 16, 2020 ព័ត៌មានពេលរាត្រី - មិថុនា 16, 2020

ព័ត៌មានអំពីកម្ពុជាមានដូចជា បុគ្គលិកកាស៊ីណូណាហ្គាវើលស្វះស្វែងរកប្រាក់ឧបត្ថម្ភពីរដ្ឋាភិបាលចំនួន ៤០ ដុល្លារក្នុងមួយខែ ដើម្បីជួយទប់ទល់នឹងជីវភាពប្រចាំថ្ងៃ ក្រោយកាស៊ីណូបានផ្អាកដំណើរការជាង ២ ខែមកនេះ។ ខណៈថៃរង់ចាំការផ្ទៀងផ្ទាត់ព័ត៌មានបាត់ខ្លួនសកម្មជនថៃនៅភ្នំពេញ ប៉ូលិសកម្ពុជាថា រថយន្តដែលថតបាននោះពាក់ស្លាកលេខក្លែងក្លាយ។ លោក សម រង្ស៊ី ថា ការចាប់សកម្មជនរបស់ខ្លួនបង្ហាញពីការភ័យខ្លាចចំពោះការងើបប្រឆាំងរដ្ឋាភិបាល។

ព័ត៌មានអន្តរជាតិវិញមាន នាយិការបស់ VOA លាលែងពីតំណែង។ និយតករសហរដ្ឋអាមេរិកឈប់ឲ្យប្រើឱសថព្យាបាលជំងឺគ្រុនចាញ់សម្រាប់ការព្យាបាលជំងឺកូវីដ១៩។ លោក Trump នឹងចុះហត្ថលេខាលើបទបញ្ជាអំពីការកែទម្រង់មួយចំនួនលើផ្នែកប៉ូលិស។ ក្រុមប្រឹក្សាសិទ្ធិមនុស្សអង្គការសហប្រជាជាតិនឹងបើកកិច្ចប្រជុំបន្ទាន់ផ្ដោតលើបញ្ហាជាតិសាសន៍នៅសហរដ្ឋអាមេរិក។ កូរ៉េខាងជើងកម្ទេចការិយាល័យទំនាក់ទំនងជាមួយកូរ៉េខាងត្បូង និងព័ត៌មានអន្តរជាតិសំខាន់ៗមួយចំនួនទៀត៕

1 hr

June 15, 2020 ព័ត៌មានពេលរាត្រី - មិថុនា 15, 2020

ព័ត៌មានអំពីកម្ពុជាមានដូចជា រដ្ឋាភិបាលកាត់បន្ថយការចំណាយតាមក្រសួងស្ថាប័ន ៣ ឆ្នាំជាប់គ្នា ខណៈការព្យាករណ៍សេដ្ឋកិច្ចធ្លាក់ចុះមកត្រឹម ១,៩%។ កម្មវិធី Hello VOA សំឡេងជំនាន់ថ្មីមានកិច្ចពិភាក្សាអំពី «ការអាននៅកម្ពុជាស្ថិតក្នុងកម្រិតទាប ដែលត្រូវការការជំរុញបន្ថែម»។

ព័ត៌មានអន្តរជាតិវិញមាន មជ្ឈមណ្ឌល CDC នៅសហរដ្ឋអាមេរិក ណែនាំបុគ្គលិកកុំឲ្យឆ្លើយតបជាមួយសំណើសុំយោបល់របស់ VOA។ ប្រធានប៉ូលិសក្រុង Atlanta រដ្ឋ Georgia លាលែងពីតំណែង ក្រោយពីលោក Brooks បានស្លាប់ បន្ទាប់ពីត្រូវបានប៉ូលិសបាញ់។ អ្នកធ្វើកោសលវិច័យផ្នែកវេជ្ជសាស្ត្រថា ការស្លាប់របស់លោក Brooks នេះ ជាអំពើមនុស្សឃាត។ ការទាមទាររបស់បាតុករជំរុញឲ្យមានការជជែកដេញដោលអំពី «ការដកថវិកាស្ថាប័នប៉ូលិស»។ សេតវិមានថា សេដ្ឋកិច្ចរបស់សហរដ្ឋអាមេរិកកំពុងស្ថិតក្នុងដំណាក់កាលងើបឡើងវិញ។ ការឆ្លងជំងឺកូវីដ១៩ ឡើងវិញ ធ្វើឲ្យទីផ្សារភាគហ៊ុនសកលលោកធ្លាក់ចុះនៅថ្ងៃច័ន្ទនេះ។ ប្រទេសនានានៅទ្វីបអឺរ៉ុបបើកព្រំដែនរបស់ខ្លួនឡើងវិញ ក្រោយករណីឆ្លងជំងឺកូវីដ១៩ ថយចុះ។ កូរ៉េខាងត្បូងជំរុញឲ្យកូរ៉េខាងជើងធ្វើតាមកិច្ចព្រមព្រៀង នៅពេលមានការកើនឡើងនូវភាពតានតឹង៕

1 hr

June 14, 2020 ព័ត៌មានពេលរាត្រី - មិថុនា 14, 2020

ព័ត៌មានអំពីកម្ពុជាមានដូចជា អ្នកធ្លាប់កើតជំងឺកូវីដ១៩ បង្ហាញផលវិបាកនៃការកើតជំងឺនេះ។ អង្គការសង់ត្រាល់ថា ក្នុងរយៈពេល ៣ ខែ កម្មករជាង ១ ម៉ឺន នាក់ ចេញមុខតវ៉ារឿងបិទរោងចក្រ និងការណ៍ដែលរោងចក្រមិនគោរពច្បាប់ការងារ។

ព័ត៌មានអន្តរជាតិវិញមាន ពលរដ្ឋខ្មែរអាមេរិកាំងថា ប៉ូលិសនឹងគោរពច្បាប់ជាងមុន ក្រោយការតវ៉ាករណីស្លាប់របស់លោក Floyd ផ្ទុះកំហឹងខ្លាំង។ ការស្ទង់មតិសាធារណជនអាមេរិកាំងបង្ហាញថា លោកប្រធានាធិបតី Trump មានការគាំទ្រតិចជាងលោក Biden នៅក្នុងការបោះឆ្នោតប្រធានាធិបតីនៅខែវិច្ឆិកា។ ស្ថាប័នថ្នាក់ខេត្តក្នុងប្រទេសចិនដើរតួនាទីនាំមុខគេក្នុងការរឹតត្បិតព័ត៌មានលើអ៊ីនធឺណិត។ អវកាសយានិកផ្ដល់ការកម្សាន្ត និងការអប់រំដល់កុមារពីស្ថានីយ៍អវកាសអន្តរជាតិ៕

1 hr

June 13, 2020 ព័ត៌មានពេលរាត្រី - មិថុនា 13, 2020

នេះជាកម្មវិធីផ្សាយប្រចាំថ្ងៃតាមវិទ្យុ ជាភាសាខ្មែរ រយៈពេល ៦០ នាទី ដែលផ្តល់ព័ត៌មានអំពីប្រទេសកម្ពុជានិងពិភពលោក ក៏ដូចជាព័ត៌មានពិពណ៌នា ព័ត៌មានអត្ថាធិប្បាយ កម្មវិធីតន្ត្រី និងបទវិចារណកថា ជូនដល់អ្នកស្តាប់ភាសាខ្មែរនៅទូទាំងប្រទេសកម្ពុជា។

1 hr

June 12, 2020 ព័ត៌មានពេលរាត្រី - មិថុនា 12, 2020

ព័ត៌មានសំខាន់ៗអំពីកម្ពុជាមានដូចជា៖ តុលាការខេត្តសៀមរាបសង្ស័យថា ព្រះអង្គ លួន សុវ៉ាត ដែលជាសកម្មជនសង្ឃមួយរូប ប្រព្រឹត្តបទល្មើស «រំលោភសេពសន្ថវៈ» ខណៈព្រះអង្គបដិសេធការចោទប្រកាន់រឿងសន្ទនាស្នេហា។ មន្ត្រីជាន់ខ្ពស់កម្ពុជាមួយរូប អះអាងថា សកម្មជនថៃឈ្មោះ Wanchalearm Satsaksit ដែលបានបាត់ខ្លួន មិនមែនជាអ្នកស្នាក់នៅខុនដូនៅជ្រោយចង្វារ រាជធានីភ្នំពេញ ដូចការចុះផ្សាយព័ត៌មាននោះទេ។ កម្ពុជារងការគាបសង្កត់ឲ្យធ្វើការស៊ើបអង្កេតឲ្យបានល្អិតល្អន់អំពីការបាត់ខ្លួនរបស់សកម្មជនថៃ។ ព័ត៌មានអន្តរជាតិសំខាន់ៗមានដូចជា៖ អ្នកជំនាញមើលឃើញថា បណ្តាញសង្គមជាច្រើនបានផ្សព្វផ្សាយនូវព័ត៌មានមិនពិត ក្នុងអំឡុងពេលមានបាតុកម្មតវ៉ានៅសហរដ្ឋអាមេរិក។ យោធាចិនចង់ផ្លាស់ប្តូរការយល់ឃើញពីប្រទេសដទៃមកលើខ្លួន តាមរយៈការផ្តល់ជំនួយទៅកាន់បណ្តាប្រទេសដែលប្រជែងយកអធិបតេយ្យភាពដែនសមុទ្រជាមួយចិន។ ពលរដ្ឋហុងកុងតវ៉ាប្រឆាំងផែនការរបស់ចិនដែលឲ្យរដ្ឋាភិបាលហុងកុងប្រើច្បាប់សន្តិសុខថ្មី។ លោកប្រធានាធិបតី Trump នឹងថ្លែងសុន្ទរកថាទទួលយកការតែងតាំងរូបលោកដោយគណៈកម្មាធិការបក្សសាធារណៈរដ្ឋជាបេក្ខជនប្រធានាធិបតីនៅរដ្ឋ Florida៕

1 hr

June 11, 2020 ព័ត៌មានពេលរាត្រី - មិថុនា 11, 2020

ព័ត៌មានសំខាន់ៗអំពីកម្ពុជាមានដូចជា៖ ខណៈសំណុំរឿងដីធ្លីរបស់ពួកគេនៅតុលាការមិនទាន់បញ្ចប់ សកម្មជនដីធ្លីក្នុងខេត្តបន្ទាយមានជ័យ កំពុងប្រឈមនឹងផលវិបាកផ្នែកហិរញ្ញវត្ថុ។ រដ្ឋាភិបាលកម្ពុជាកំណត់តម្លៃធ្វើតេស្តជំងឺកូវីដសម្រាប់ជនបរទេស ខណៈមានការតម្រូវឲ្យពួកគេតម្កល់ប្រាក់៣.០០០ដុល្លារ។ នៅក្នុងកម្មវិធី Hello VOA លោក សាយ មុន្នី នៃវីអូអ បានពិភាក្សាជាមួយវាគ្មិន លោក ប៉ិច ពិសី អំពីការជៀសវាងទំនាស់ផលប្រយោជន៍នៅកន្លែងធ្វើការក្នុងគ្រាវិបត្តិកូវីដ១៩។ រីឯព័ត៌មានអន្តរជាតិសំខាន់ៗមានដូចជា៖ នៅសហរដ្ឋអាមេរិក ករណីឆ្លងវីរុសកូរ៉ូណាបានកើនជិត ២លាននាក់។ លោកប្រធានាធិបតី Donald Trump ពិចារណាចំណាត់ការដើម្បីដោះស្រាយបញ្ហាដែលជំរុញបាតុកម្មតវ៉ាប្រឆាំងទូទាំងប្រទេស ខណៈលោកក៏ត្រៀមចាប់ផ្តើមការជួបជុំនយោបាយឡើងវិញ ដើម្បីធ្វើយុទ្ធនាការឃោសនារកសំឡេងឆ្នោត ដែលកន្លងមកបង្អាក់ដោយវិបត្តិកូវីដ១៩។ ធនាគារកណ្តាលអាមេរិកថា អត្រាការប្រាក់នឹងនៅទាបរហូតដល់ឆ្នាំ ២០២០។ រដ្ឋាភិបាលក្រុង Mexico City នៃប្រទេសម៉ិកស៊ិក ចាប់ផ្តើមយុទ្ធនាការធ្វើតេស្តជំងឺកូវីដ១៩ក្នុងទ្រង់ទ្រាយដ៏ធំមួយ៕

1 hr

June 10, 2020 ព័ត៌មានពេលរាត្រី - មិថុនា 10, 2020

ព័ត៌មានអំពីកម្ពុជាមានដូចជា ព្រះអង្គលួន សុវ៉ាត ដែលសកម្មខាងសិទ្ធិមនុស្ស បដិសេធការចោទប្រកាន់រឿងសន្ទនាស្នេហា ខណៈប៉ូលិសឆែកឆេរផ្ទះរបស់ព្រះអង្គ។ តុលាការខេត្តកោះកុង កោះហៅបងប្អូន ៣ នាក់ ពាក់ព័ន្ធនឹងរឿងកាន់កាប់ដីតំបន់ការពារ ខណៈឪពុករបស់ពួកគេជាប់ពន្ធនាគារ។

ព័ត៌មានអន្តរជាតិវិញមានដូចជា បងប្អូនប្រុសលោក George Floyd នឹងផ្ដល់សក្ខីកម្មដល់សភា ស្របពេលសភាកំពុងពិចារណាលើសំណើច្បាប់កំណែទម្រង់ ក្រោយសពលោកFloyd ត្រូវបានបញ្ចុះនៅទីក្រុង Houston។ លោក Abe ថា ជប៉ុននឹងនាំមុខសម្រាប់ការចេញសេចក្ដីថ្លែងការណ៍អំពីទីក្រុងហុងកុង។ សិង្ហបុរីអាចជាចំណុចភូមិសាស្ត្រដ៏ប្រសើរមួយសម្រាប់ទំនាក់ទំនងចិននៅអាស៊ាន។ ការសិក្សាថ្មីមួយបង្ហាញថា ជំងឺកូវីដ១៩ ផ្ទុះឡើងនៅទីក្រុង Wuhan មុនខែធ្នូឆ្នាំមុនទៅទៀត។ ប្រព័ន្ធប្រតិបត្តិការអាមេរិកាំង នៅតែមានឥទ្ធិពលខ្លាំងលើពួកអ្នកប្រើបច្ចេកវិទ្យាក្នុងប្រទេសចិន។ វិទ្យុនិងទូរទស្សន៍សាធារណៈមួយនៅទីក្រុងហុងកុងបានផ្អាកកម្មវិធីចំអកមួយ ក្រោយមានការស្តីបន្ទោសពីរដ្ឋាភិបាល និងព័ត៌មានអន្តរជាតិសំខាន់ៗមួយចំនួនទៀត៕

1 hr