កម្មវិធីព័ត៌មានពេលរាត្រី - វីអូអេ

By វីអូអេNews

កម្មវិធីព័ត៌មានពេលរាត្រី - វីអូអេ episodes

June 29, 2020 ព័ត៌មានពេលរាត្រី - មិថុនា 29, 2020
ព័ត៌មានអំពីកម្ពុជាមានដូចជា របាយការណ៍បង្ហាញថា ការបណ្តេញចេញនៅទីក្រុងភ្នំពេញនៅតែជាបញ្ហា ពុំមានការពិភាក្សា និងផ្តល់សំណងត្រឹមត្រូវ។ អង្គភាពប្រឆាំងអំពើពុករលួយចាប់ខ្លួនឧកញ៉ាម្នាក់ រីឯអភិបាលស្រុកមួយរូបបាត់បង់តំណែងក្នុងរឿងដីធ្លី។ គណនីហ្វេសប៊ុក ២ ដែលពាក់ព័ន្ធនឹងការចោទប្រកាន់ព្រះអង្គ លួន សុវ៉ាត លែងដំណើរការ។ កម្មវិធី Hello VOA មានកិច្ចពិភាក្សាអំពី «អំពើជួញដូរមនុស្សនៅកម្ពុជា និងវិធានការទប់ស្កាត់»។
ព័ត៌មានអន្តរជាតិវិញមានដូចជា ប្រទេសមួយចំនួនចាប់ផ្ដើមបិទសកម្មភាពសេដ្ឋកិច្ចនិងសង្គមឡើងវិញ ដោយសារករណីឆ្លងជំងឺកូវីដ១៩ នៅទូទាំងពិភពលោកកើនឡើងរហូតដល់ជាង ១០ លានករណី។ ប្រទេសអ៊ីរ៉ង់តម្រូវឲ្យពលរដ្ឋពាក់ម៉ាស់ ពេលជួបជុំគ្នាក្នុងទីធ្លាឯកជន។ លោក Donald Trump ថា លោកមិនដឹងអំពីសេចក្ដីរាយការណ៍ដែលថា រុស្ស៊ីផ្ដល់រង្វាន់ដល់ក្រុមតាលីបង់ឲ្យសម្លាប់ទាហានអាមេរិកនៅអាហ្វហ្គានីស្ថាន។ អ្នកជំនាញអាមេរិកថា អ៊ីរ៉ង់នឹងក្លាយជាជម្រើសនៃប្រទេសជួញដូរអាវុធសម្រាប់ពួកភេរវជន បើការដាក់ទណ្ឌកម្មរបស់អង្គការសហប្រជាជាតិផុតកំណត់៕
1 hr
June 28, 2020 ព័ត៌មានពេលរាត្រី - មិថុនា 28, 2020
ព័ត៌មានសំខាន់ៗអំពីកម្ពុជាមានដូចជា៖ សិស្សថ្នាក់ទី១២ បង្ហាញក្តីកង្វល់ចំពោះការប្រឡងបាក់ឌុបនាពេលខាងមុខ ខណៈសាលារៀនបិទនិងការសិក្សាត្រូវបានធ្វើឡើងតាមអនឡាញ។ ព័ត៌មានសំខាន់ៗអំពីតំបន់អាស៊ីមានដូចជា៖ ឥណ្ឌូណេស៊ី និងម៉ាឡេស៊ីដែលជាសេ្តចនាំចេញដូងប្រេង បាត់បង់ព្រៃឈើតិចសម្រាប់ឆ្នាំ២០១៩។ វិភាគ៖ តើវិបត្តិជំងឺកូវីដ១៩ កំពុងផ្លាស់ប្តូររបៀបវារៈរបស់វៀតណាមក្នុងនាមជាប្រធានសមាគមប្រជាជាតិអាស៊ីអាគ្នេយ៍ (អាស៊ាន) អំពីបញ្ហាជម្លោះនៅសមុទ្រចិនខាងត្បូងយ៉ាងដូចម្តេច? ចិនដែលជាប្រទេសផ្តល់កម្ចីច្រើនជាងគេនៅលើពិភពលោក បានសម្រេចពន្យារពេលសងបំណុលដល់ប្រទេសចំនួន ៧៧ ដែលបានទទួលកម្ចីពីខ្លួន។ ព័ត៌មានអន្តរជាតិសំខាន់ៗមានដូចជា៖ កំណើនជនភៀសខ្លួនធ្វើឲ្យមានការព្រួយបារម្ភកាន់តែកើនឡើងអំពីការឆ្លងរាលដាលនៃជំងឺកូវីដ១៩នៅជុំវិញពិភពលោក៕
1 hr
June 27, 2020 ព័ត៌មានពេលរាត្រី - មិថុនា 27, 2020
ព័ត៌មានសំខាន់ៗអំពីកម្ពុជាមានដូចជា ក្រុមមេដឹកនាំសហជីពនៅកម្ពុជាជំទាស់នឹងសំណើរបស់ថោកែរោងចក្រដែលសុំផ្អាកការចរចាប្រាក់ឈ្នួលកម្មករ។ ព័ត៌មានអន្តរជាតិសំខាន់ៗអំពីតំបន់អាស៊ី និងពិភពលោកមានដូចជា ការបិទហាងកាហ្វេដ៏ល្បីឈ្មោះមួយនៅម៉ាឡេស៊ី បង្ហាញឲ្យឃើញពីបញ្ហាប្រឈមរបស់អាជីវកម្មខ្នាតតូច ក្នុងគ្រាវិបត្តិសុខភាពកូវីដ១៩។ របាយការណ៍មួយព្រមានពីគ្រោះថ្នាក់ពីការរុករករ៉ែនៅបាតសមុទ្រជ្រៅ។ វិភាគ៖ តើជំងឺកូវីដ១៩ អាចធ្វើឲ្យតំបន់អាស៊ីអាគ្នេយ៍ក្លាយជាដៃគូពាណិជ្ជកម្មធំបំផុតមួយរបស់ចិនដោយរបៀបណា? ចិនប្រើប្រាស់ស្ពៃក្តោបដើម្បីបង្កើនការទាមទាររបស់ខ្លួននៅសមុទ្រចិនខាងត្បូងដែលមានជម្លោះ។ ខណៈភាពតានតឹងរវាងកូរ៉េខាងជើងនិងកូរ៉េខាងត្បូងបានកើតមានឡើង មេដឹកនាំកូរ៉េខាងជើងលោក Kim Jong Un រក្សាភាពស្ងៀមស្ងាត់។ ក្រុមវេជ្ជបណ្ឌិតសង្ឃឹមថា អង់ទីគ័រដែលត្រូវបានបង្កើតឡើងនៅក្នុងមន្ទីរពិសោធន៍ អាចព្យាបាលជំងឺកូវីដ១៩បាន៕
1 hr
June 26, 2020 ព័ត៌មានពេលរាត្រី - មិថុនា 26, 2020
ព័ត៌មានសំខាន់ៗអំពីកម្ពុជាមានដូចជា ក្រុមគ្រួសាររបស់សកម្មជនគណបក្សសង្គ្រោះជាតិដែលត្រូវបានជាប់ឃុំខ្លួន កំពុងស្វែងរកអន្តរាគមន៍ពីសហរដ្ឋអាមេរិក ខណៈពួកគេហៅការឃុំខ្លួននិងបទចោទប្រកាន់ថា «ជារឿងនយោបាយ»។ របាយការណ៍មួយរបស់អឺរ៉ុបរកឃើញថា ព្រៃឡង់នៅកម្ពុជាកំពុងបន្តបាត់បង់គួរឲ្យព្រួយបារម្ភ ខណៈការកាប់ព្រៃឈើកើនឡើងជាង៧០ភាគរយនៅឆ្នាំ២០១៩។ ការរៀនតាមអនឡាញបង្កជាក្តីព្រួយបារម្ភថា សិស្សដែលមិនមានលទ្ធភាព ត្រូវបាត់បង់ឱកាសរៀន។ ព័ត៌មានអន្តរជាតិសំខាន់ៗមានដូចជា ក្នុងគ្រារោគរាតត្បាតកូវីដ១៩ ពលករចំណាកស្រុកនៅប្រទេសថៃប្រឈមការលំបាកដើម្បីតម្រូវតាមលក្ខខណ្ឌដើម្បីទទួលបានជំនួយពីរដ្ឋាភិបាលថៃ។ វិភាគ៖ ហេតុអ្វីបានជាវៀតណាមដែលជាប្រទេសមានប្រជាជនច្រើន គ្មានករណីស្លាប់ដោយសារជំងឺកូវីដ១៩? លោក John Bolton អតីតទីប្រឹក្សាសន្តិសុខរបស់លោកប្រធានាធិបតី Trump បានចាត់ទុកលោក Trump ជាមេដឹកនាំមិនប្រាកដប្រជា និងជាមេដឹកនាំដ៏គ្រោះថ្នាក់ នៅក្នុងបទសម្ភាសន៍ជាមួយ VOA។ បារំាងនិងអាល្លឺម៉ង់ បានសម្តែងការគាំទ្រខាងនយោបាយនិងហិរញ្ញវត្ថុដល់អង្គការសុខភាពពិភពលោក។ លោក Trump ជំរុញឲ្យបញ្ចប់ច្បាប់ធានារ៉ាប់រងសុខភាពដែលមានតម្លៃទាប។ ករណីឆ្លងវីរុសកូរ៉ូណានៅសហរដ្ឋអាមេរិកកើនឡើងខ្លាំង និងព័ត៌មានអន្តរជាតិផ្សេងៗទៀត៕
1 hr
June 25, 2020 ព័ត៌មានពេលរាត្រី - មិថុនា 25, 2020
ព័ត៌មានសំខាន់ៗអំពីកម្ពុជាមានដូចជា ៣សប្តាហ៍នៃការបាត់ខ្លួនសកម្មជនថៃលោក Wanchalearm Satsaksit នៅរាជធានីភ្នំពេញ ប៉ូលិសកម្ពុជាមិនទាន់អាចផ្ទៀងផ្ទាត់ព័ត៌មាន ខណៈភាគីថៃបន្តស្ងាត់ស្ងៀម។ នៅក្នុងកម្មវិធី Hello VOA វាគ្មិនរបស់យើងនឹងពិភាក្សាអំពី «ស្ថានភាពលំបាករបស់ពលករចំណាកស្រុកនិងជនភៀសខ្លួននយោបាយ ក្នុងគ្រាវិបត្តិកូវីដ១៩»។ ព័ត៌មានអន្តរជាតិសំខាន់ៗមានដូចជា៖ ក្រុមអ្នកកែទម្រង់ដាក់សម្ពាធលើលោក Biden បេក្ខជនប្រធានាធិបតីមកពីគណបក្សប្រជាធិបតេយ្យ ឲ្យបង្កើតគោលនយោបាយដែលនាំមកនូវការផ្លាស់ប្តូរស៊ីជម្រៅ។ ការបន្តធ្វើតេស្តជំងឺកូវីដ១៩កាន់តែច្រើនឡើងនៅសហរដ្ឋអាមេរិក បង្កឲ្យមានការជជែកដេញដោលកាន់តែច្រើនរវាងអ្នកនយោបាយអាមេរិក ខណៈករណីឆ្លងកំពុងកើនឡើងក្នុងរដ្ឋមួយចំនួន។ មូលនិធិរូបិយវត្ថុអន្តរជាតិ (IMF) ទស្សន៍ទាយថា សេដ្ឋកិច្ចនៅទូទាំងពិភពលោកនឹងប្រឈមកំណើនលូតលាស់អវិជ្ជមានជាលើកដំបូងក្នុងប្រវត្តិសាស្ត្រ។ ទីប្រឹក្សាសន្តិសុខជាតិអាមេរិក អំពាវនាវឲ្យសហរដ្ឋអាមេរិកប្រកាន់ជំហរតឹងរ៉ឹងប្រឆាំងនឹងចិន។ សន្និបាតតែងតាំងលោក Joe Biden ជាបេក្ខជនប្រធានាធិបតីប្រចាំគណបក្សប្រជាធិបតេយ្យ នឹងធ្វើឡើងតាមអនឡាញ។ ប្រទេសអាហ្រ្វិកខាងត្បូង ធ្វើការសាកល្បងវ៉ាក់សាំងបង្ការជំងឺកូវីដ១៩ លើមនុស្សជាលើកដំបូង។ កូរ៉េខាងត្បូងប្រារព្ធខួប៧០ឆ្នាំនៃសង្គ្រាមក្នុងឧបទ្វីបកូរ៉េ និងព័ត៌មានអន្តរជាតិផ្សេងៗទៀត៕
1 hr
June 24, 2020 ព័ត៌មានពេលរាត្រី - មិថុនា 24, 2020
ព័ត៌មានអំពីកម្ពុជាមានដូចជា រដ្ឋាភិបាលសម្រេចបញ្ចេញថវិកាជួយដល់អ្នកក្រីក្រជាងកន្លះលានគ្រួសារ ដែលមានទាំងអ្នករងគ្រោះដោយសារជំងឺកូវីដ១៩។ ក្រុមមេដឹកនាំសហជីពជំទាស់យ៉ាងខ្លាំងក្លានឹងសំណើរបស់ថៅកែរោងចក្រ ដែលសុំឲ្យផ្អាកចរចាប្រាក់ឈ្នួលកម្មករ។
ព័ត៌មានអន្តរជាតិវិញមានដូចជា សមាជិកសភាសហរដ្ឋអាមេរិកដ៏សំខាន់ម្នាក់បានអំពាវនាវឲ្យលោក Michael Pack នាយកប្រតិបត្តិថ្មីនៃទីភ្នាក់ងារ USAGM ផ្តល់សក្ខីកម្មនៅខែក្រោយអំពី ហេតុអ្វីដែលលោកបណ្តេញបណ្ដាមន្រ្តីជំនាញជាន់ខ្ពស់ជាច្រើននាក់របស់ USAGM ចេញពីតំណែង។ អង្គការសុខភាពពិភពលោកថា ការរាតត្បាតនៃជំងឺកូវីដ១៩ កំពុងកើនឡើង។ សមាជិកគណបក្សប្រជាធិបតេយ្យសំខាន់ៗនៅសហរដ្ឋអាមេរិក ប្រឈមនឹងការបាត់បង់អាសនៈក្នុងការបោះឆ្នោតសភា។ លោក Biden ហៅបទបញ្ជាថ្មីរបស់លោក Trump អំពីបញ្ហាអន្តោប្រវេសន៍ ថាជាការបង្វែរចំណាប់អារម្មណ៍។ ក្រុមអ្នកជំនាញថា ការបញ្ឈប់ទិដ្ឋាការ H1B នឹងធ្វើឲ្យនិស្សិតបរទេសរអែងមកសិក្សានៅសហរដ្ឋអាមេរិក។ លោក Trump សរសើរជញ្ជាំងព្រំដែនជាប់ប្រទេសម៉ិកស៊ិក ក្រោយពីធ្វើទស្សនកិច្ចទៅទីនោះ។ លោក Kim Jong Un ផ្អាក «សកម្មភាពយោធា» ប្រឆាំងកូរ៉េខាងត្បូង និងព័ត៌មានសំខាន់ៗមួយចំនួនទៀត៕
1 hr
June 23, 2020 ព័ត៌មានពេលរាត្រី - មិថុនា 23, 2020
ព័ត៌មានអំពីកម្ពុជាមានដូចជា ស្រ្តីម្នាក់បដិសេធមិនមានទំនាក់ទំនងសេ្នហាជាមួយព្រះអង្គ លួន សុវ៉ាត ដូចឃ្លីបវីដេអូបង្ហោះលើហ្វេសប៊ុកនោះទេ។ កម្ពុជារកឃើញជំងឺកូវីដ១៩មួយករណីទៀតលើបុរសខ្មែរអាមេរិកាំងទើបមកពីអាមេរិក។ សិស្សថ្នាក់ទី១២បង្ហាញក្តីកង្វល់ចំពោះការប្រឡងបាក់ឌុបនាពេលខាងមុខ។
ព័ត៌មានអន្តរជាតិវិញមានដូចជា ក្រុមមន្រ្តីសុខាភិបាលសហរដ្ឋអាមេរិកផ្តល់សក្ខីកម្មអំពីការឆ្លើយតបរបស់សេតវិមានទៅលើវីរុសកូរ៉ូណា ខណៈសេតវិមានហាក់ចាត់ទុកអត្រាកើនឡើងនៃការឆ្លងជំងឺកូវីដ១៩ នៅសហរដ្ឋអាមេរិក ថាមិនសូវសំខាន់។ រដ្ឋបាលរបស់លោកប្រធានាធិបតី ដូណាល់ ត្រាំ ផ្អាកផ្តល់ទិដ្ឋាការអន្តោប្រវេសន៍ដល់ជនបរទេសសម្រាប់ធ្វើការស្របច្បាប់ក្នុងសហរដ្ឋអាមេរិករហូតដល់ចុងឆ្នាំនេះ។ វ៉ាក់សាំងរបេង កញ្ជ្រឹល និងស្វិតដៃជើង ប្រហែលជាអាចទប់ទល់នឹងជំងឺកូវីដ១៩ បាន។ ចិនគំរាមតបតនឹងសហរដ្ឋអាមេរិក រឿងបង្ក្រាបលើប្រព័ន្ធផ្សព្វផ្សាយ។ ចិន និងឥណ្ឌាឯកភាពគ្នាកាត់បន្ថយភាពតានតឹងនៅព្រំដែន ក្រោយពីមានការប្រយុទ្ធគ្នាដ៏ប្រល័យ និងព័ត៌មានអន្តរជាតិសំខាន់ៗមួយចំនួនទៀត៕
1 hr
June 22, 2020 ព័ត៌មានពេលរាត្រី - មិថុនា 22, 2020
ព័ត៌មានអំពីកម្ពុជាមានដូចជា ក្រុមកម្មករសំណង់រំឭកឡើងវិញនូវហេតុការណ៍បាក់អគារក្នុងខេត្តព្រះសីហនុកាលពីឆ្នាំមុន។ កម្មវិធី Hello VOA មានកិច្ចពិភាក្សាអំពី«រដ្ឋាភិបាលបង្ហាញបញ្ហាប្រឈមក្នុងការពង្រឹងរដ្ឋបាលឯកភាពថ្នាក់ស្រុក»។
ព័ត៌មានអន្តរជាតិវិញមាន អង្គការសុខភាពពិភពលោករាយការណ៍ពីការកើនឡើង យ៉ាងខ្លាំងនៃការឆ្លងជំងឺកូវីដ១៩នៅទូទាំងពិភពលោក។ ក្រុមអ្នកជំនាញច្រានចោលការលើកឡើងពីការផ្ទុះឡើងលើកទី២នៃជំងឺកូវីដ១៩ ដោយថា ការផ្ទុះឡើងលើកទីមួយមិនទាន់ផុតនៅឡើយទេ។ យុទ្ធនាការបោះឆ្នោតរបស់លោក Trump ច្រានចោលសេចក្ដីរាយការណ៍ដែលថាអ្នកចូលរួមមានចំនួនតិច។ ពលករចំណាកស្រុកថៃមិនមានគ្រប់លក្ខខណ្ឌដើម្បីបានទទួលជំនួយរដ្ឋ ពេលមានជំងឺឆ្លងរាតត្បាតកូវីដ១៩។ សហរដ្ឋអាមេរិកនិងរុស្ស៊ី ចាប់ផ្តើមចរចានុយក្លែអ៊ែរនៅប្រទេសអូទ្រីស។ រលកកម្ដៅឡើងក្តៅខ្លាំងក្នុងតំបន់ស៊ីបេរីនៃប្រទេសរុស្ស៊ី។ កូរ៉េខាងជើងថា ខ្លួនត្រៀមបញ្ជូនខិត្តប័ណ្ណឃោសនារាប់លានសន្លឹកចូលកូរ៉េខាងត្បូង។ ក្រុង Camden រដ្ឋ New Jersey ជាគំរូនៃស្ថាប័នប៉ូលិសនៅសហគមន៍៕
1 hr
June 21, 2020 ព័ត៌មានពេលរាត្រី - មិថុនា 21, 2020
ព័ត៌មានសំខាន់ៗអំពីកម្ពុជាមានដូចជា៖ វេជ្ជបណ្ឌិតប្រយុទ្ធនឹងការឆ្លងរាតត្បាតរបស់វីរុសកូរ៉ូណា ៦នាក់ចេញមកពីគ្រួសារជនភៀសខ្លួនខ្មែរអាមេរិកាំងមួយ។ ពលរដ្ឋខ្មែរខ្លះរីករាយនឹងស្ថានភាពស្ងប់ស្ងាត់នៅតំបន់ប្រាសាទអង្គរវត្ត ដែលអស់ក្រុមទេសចរបរទេស។ ព័ត៌មានអន្តរជាតិផ្សេងៗមានដូចជា៖ លោកវេជ្ជបណ្ឌិត Anthony Fauci បានសុំឲ្យក្រុមបាតុករពាក់ម៉ាស់ ខណៈលោកបង្ហាញសុទិដ្ឋិនិយមអំពីការផលិតថ្នាំវ៉ាក់សាំងបង្ការជំងឺកូវីដ១៩។ វិធីសាស្ត្រការទូតបែប «ចចកចម្បាំង» របស់ចិនបង្កឲ្យមានប្រតិកម្មខ្លាំងក្លាពីអន្តរជាតិ៕
1 hr
June 20, 2020 ព័ត៌មានពេលរាត្រី - មិថុនា 20, 2020
ព័ត៌មានសំខាន់ៗអំពីកម្ពុជាមានដូចជា៖ តំណាងសហគមន៍ខ្មែរអាមេរិកាំងដែលជាអតីតជនភៀសខ្លួន បានសម្តែងការដឹងគុណដល់អង្គការសហប្រជាជាតិ និងសហរដ្ឋអាមេរិក ក្នុងទិវាជនភៀសខ្លួនពិភពលោក។ មន្ត្រីអង្គការសហប្រជាជាតិបង្ហាញក្តីបារម្ភអំពីសេរីភាពបញ្ចេញមតិនៅកម្ពូជា ក្រោយមានការចាប់ខ្លួនជាបន្តបន្ទាប់។ រដ្ឋាភិបាលកម្ពុជាស្នើក្រុមហ៊ុនបញ្ជាទិញជួយវិស័យកាត់ដេរដែលកំពុងជួបវិបត្តិកូវីដ១៩។ ព័ត៌មានអន្តរជាតិសំខាន់ៗមានដូចជា៖ សភាអាមេរិកនឹងបោះឆ្នោតសម្រេចលើសេចក្តីព្រាងច្បាប់ពីរស្តីពីកំណែទម្រង់ស្ថាប័នប៉ូលិសនៅសប្តាហ៍ក្រោយ។ ការបិទសកម្មភាពសេដ្ឋកិច្ចនៅប្រទេសថៃដោយសារជំងឺរាតត្បាតកូវីដ១៩ បង្កផលប៉ះពាល់ខ្លាំងដល់សេវាផ្លូវភេទដែលធ្លាប់តែរីកចម្រើន។ នៅសហរដ្ឋអាមេរិក មានការទាមទារកាន់តែច្រើនឡើង ឲ្យដកបដិមានិងកន្លែងអនុស្សាវរីយ៍របស់សម្ព័ន្ធរដ្ឋភាគខាងត្បូងសម័យសង្គ្រាម Confederate៕
1 hr

About កម្មវិធីព័ត៌មានពេលរាត្រី - វីអូអេ

From the publisher's feed

កម្មវិធីព័ត៌មានពេលរាត្រីប្រចាំថ្ងៃរយៈពេល ៣០នាទីរបស់វីអូអេ នៅម៉ោង ៨:៣០យប់ ដែលផ្សាយផ្ទាល់ពីរដ្ឋធានីវ៉ាស៊ីនតោន នាំមកជូនអស់លោកអ្នកនាងនូវព័ត៌មានអំពី សហរដ្ឋអាមេរិក កម្ពុជានិងអន្តរជាតិ។…