«បច្ចុប្បន្នគ្រាប់នៅតែបន្តបាញ់ និងផ្ទុះបន្លឺសំឡេងខ្លាំងៗ ធ្វើឲ្យបន្ទប់រង្គើខ្លាំង»នេះគឺជាអ្វីដែលនិស្សិត​ខ្មែរ​មួយ​ចំនួន​​កំពុង​ជាប់​ផុង​នៅ​ប្រទេស​អ៊ីស្រាអែល​ ប្រាប់វិទ្យុបារាំងអន្តរជាតិRFI នៅរសៀលថ្ងៃនេះ។ ​ កញ្ញា ​ឌូ ​ស៊ូជិន​ គឺ​ជា​និស្សិត​កសិកម្ម​ម្នាក់​នៅ​ខេត្ត​បន្ទាយ​មានជ័យ​ដែល​ទើប​បាន​ទៅ​ដល់​ប្រទេស​នេះ​បាន​ជាង​កន្លះ​ខែ​ប៉ុណ្ណោះ។​ នៅ​កន្លែង​ស្នាក់​នៅ​របស់​កញ្ញា​មាន​និស្សិត​ខ្មែរ​៨​នាក់​ ដែល​មាន​ស្បៀង​បម្រុង​ត្រឹម​តែ​ជិត​មួយ​សប្តាហ៍​។​ កញ្ញា​អះអាងថា ​និស្សិត​ខ្មែរ​ពេល​នេះ ​ចង់​វិល​មក​ប្រទេស​កម្ពុជា​វិញ​ ខណៈ​រដ្ឋាភិបាល​ថៃ​បញ្ជួន​យន្ត​ហោះ​ទៅដឹក​ជន​ជន​ជាតិ​ថៃ​ដែល​ទៅធ្វើ​​ការ​នៅ​ទី​នោះ ​កំពុង​ស្នាក់​នៅ​ក្បែរ​កន្លែង​ស្នាក់​នៅ​របស់​និស្សិត​ខ្មែរ​ដែរ​។