កូរ៉េខាងជើង​កំពុង​ត្រៀមខ្លួន​ប្រារព្ធខួប​៧០ឆ្នាំ​នៃការបិទបញ្ចប់សង្រ្គាមកូរ៉េ ដែលត្រូវ​ប្រព្រឹត្តទៅ នៅថ្ងៃ​ព្រហស្បតិ៍​ខានស្អែក។ តាមទីភ្នាក់ងារព័ត៌មានផ្លូវរដ្ឋកូរ៉េខាងជើង KCNA ថ្នាក់ដឹកនាំ​ជាន់ខ្ពស់​ចិន និង​រដ្ឋមន្រ្តីការពារជាតិ​រុស្ស៊ី ត្រូវ​អញ្ជើញ​ឲ្យ​ចូលរួម ក្នុង​ពិធី​បុណ្យ​ជាតិ​ដែល​របបព្យុងយ៉ាង យក​ចិត្តទុកដាក់​រៀបចំ យ៉ាង​សម្រិតសម្រាំង។ ដើម្បី​ត្រៀម​ប្រារព្ធ​ខួបថ្ងៃ​ជ័យជំនះ កូរ៉េខាងជើង​បាន​បាញ់​គ្រាប់មីស៊ីល​បាលីស្ទិក​២ដើមថែមទៀត នៅយប់ថ្ងៃ​ចន្ទម្សិលមិញ បន្ទាប់ពី​បាញ់​មីស៊ីលបាលីស្ទិក​អន្តរទ្វីប និង​មីស៊ីលបណ្តែត ជាបន្ត​បន្ទាប់គ្នា នៅសប្តាហ៍មុន។ កូរ៉េខាងជើង​បាន​បិទទ្វារ​មិនទទួល​ជនបរទេស ជាង​៣ឆ្នាំមកហើយ ដើម្បីទប់ស្កាត់ជំងឺរាតត្បាត​កូវីដ។