Vignir Már hefur æft hlaup síðan um aldarmótin (á þeim tíma voru hlauparar spurðir hvort þeir „kæmust maraþon“). Hann hefur margsinnis farið til Kenía, mekku langhlaupa, í æfingabúðir en fyrr á árinu fór Andrea Kolbeinsdóttir í sína fyrstu ferð sem hluta af undirbúningi fyrir Kaupmannahafnarmaraþonið (það eru 7stk „A“ í þessu orði) þar sem tilraun verður gerð til að slá 26 ára gamalt Íslandsmet Mörthu Ernstsdóttur: 2:35:15.

Umræðuefni:

• Hvernig æfir maður fyrir það að hlaupa á hraðasta maraþontíma Íslandssögunnar?
• Aðstæður í Kenía og hvað gerir Kenísku hlauparana svona góða? (aðstæður, umhverfi, hvatar, gen, lyf?)
• Háfjallaloftið og bætingar
• Eliud Kipchoge er einhversstaðar á bilinu 30-50 ára gamall. Frá því að hlaupa tannlaus á brautinni yfir í hraðasta maraþontíma sögunnar (og milljónir dollara inná bankareikning).
• Samsæriskenningin um dauða Kelvin Kiptum.
• Vignir hefur hlaupið frá aldarmótunum, greining á hlaupasenunni, hvað er að breytast? Hvar liggja vinsældirnar? Er maraþonið að missa virðinguna sem það á skilið? Hvernig hafa æfingar breyst?
• Óhugnaleg heimsmet í götuhlaupum.
• Kolvetni og ofurskór.

Geir Ómars ættu allir úthaldsíþróttamenn að þekkja. Hann byrjaði í þríþraut 35 ára gamall, setti sér 5 ára markmið um að keppa í Ironman og setti Íslandsmet í vegalengdinni ári eftir sinn fyrsta járnkarl. Geir er verkfræðingur að mennt og nálgast íþróttina sem slíkur, hann er járnagaður og skipuleggur hlutina niður í minnstu smáatriði - með góðum árangri enda stendur Íslandsmetið hans frá 2017, 8:39klst, enn þann dag í dag!

Kári Guðmundsson greindist með sykursýki 5 ára gamall. Nýrun í honum gáfust að lokum upp og erfið veikindi tóku við þar sem eina tiltæka orkan var nýtt til að fara fram á baðherbergi, kasta upp og svo aftur uppí rúm. Eitt kvöldið barst símtal þar sem hann var beðinn um að pakka í töskur og koma sér upp á flugvöll, hann væri á leiðinni í bris- og nýrnaígræðslu í Svíþjóð. Kári segir söguna af veikindunum og vegferðina frá því að vanvirða heilsuna yfir í að hlaupa maraþon.

Haukur Ingi Guðnason er sáfræðimenntaður, fyrrum leikmaður Liverpool og kennir íþróttasálfræði við HÍ.

Í þættinum förum við yfir aðferðir sem hægt er að nýta sér til að hámarka eigin árangur, hvort sem það er í íþróttum eða á öðrum sviðum lífsins:

• Hvernig markmið á að setja sér til að ná árangri (frammistöðumarkmið, niðurstöðumarkmið og ferlamarkmið).
• Ef þú veist ekki hvert þú vilt fara skiptir ekki máli hvernig þú kemst þangað.
• Að setja sig í erfiðar og óþægilegar aðstæður til að hraða framförum.
• Gildrurnar sem fylgja árangri og aftra framförum.
• Samkeppni og samanburður.
• Sjálfstal og viðmið.
• Ímyndunaraflið og sjónsköpun (visualization).
• Hvernig gervigreind var þjálfuð til að sigra besta Go spilara í heiminum og hvað þú getur lært af því ferli.

Það er erfitt að blanda saman líkamssamsetningu, tölunni á vigtinni, frammistöðu í keppni, bætingum á æfingum, andlegri líðan og almennri heilsu. Orkuinntaka tengist öllum þessum breytum á einn eða annan hátt og Birna Varðardóttir, doktor í íþrótta- og heilsufræði, mætir í þáttinn til þess að upplýsa okkur um hættur og afleiðingar þess að mæta ekki orkuþörf líkamans.

Hafsteinn fór á tvenna Ólympíuleika í siglingum og hóf síðan keppnisferil í hjólreiðum. Reynslan drýpur af honum eftir rúmlega tvo áratugi af keppnisíþróttum á hæsta stigi og það er mikið hægt að læra af 45 ára íþróttamanni sem er að eiga sín bestu ár á ferlinum. Haffi fer yfir hvernig áherslan hans fór af árangri og yfir á leiðina að árangrinum, hvernig keppnisstressið hvarf, tilraunir á lágkolvetna- og hákolvetnamataræði, bætingar í úthaldsíþróttaheiminum, fjögurra daga gravel keppni í Sahara (á móti fyrrverandi Tour de France keppnishetjum), hvernig honum hefur tekist að brenna út á miðju keppnistímabili en líka ná því besta úr sér á meðan hann sinnir 100% vinnu og fjölskyldu.

Gunnar hefur hlaupið 62 maraþon, hann er með sub3 undir beltinu og á þriðja besta tíma Íslendings í 100km hlaupi þrátt fyrir að hafa nokkrum árum áður fengið að vita að hann eigi nokkrar vikur eftir ólifað. Gunnar lánaði Krabbameinsfélaginu slagorðið sitt „Ég hleyp af því ég get það,” en þó hann skilgreini sig ekki sem sjúkling þá marka veikindi stóran hluta af hans lífi. Veikindi, áföll og ástvinamissir hafa mótað aðdáunarvert og fallegt hugarfar sem Gunnar notar í lífinu og þar spila hlaupin stóra rullu - svo stóra að hann íhugaði að gerast atvinnuhlaupari eftir að hafa bæði greinst sjálfur með blóðkrabbamein og misst konuna sína úr leghálskrabbameini. Það er erfitt að komast ekki við þegar maður hlustar á Gunnar og sagan hans fær mann til að kunna betur að meta litlu hlutina í lífinu, sem og lífið sjálft.

“Menn eiga kannski einhverjar afrekaskrár í félögunum en það var bara verið að lesa heimsafrekaskrána, það var ekkert öðruvísi. Menn bara litu á hver er bestur í heiminum? Þangað ætlum við að stefna.”

Gunnar Páll Jóakimsson þjálfaði Mörthu Ernst, Kára Stein og Anítu Hinriks og fór með þau öll á Ólympíuleikana. Þar með má titla hann sem árangursríkasta hlaupaþjálfara landsins og einstaklega hæfan til að gefa innsýn inní einkenni sem góður hlaupari þarf að hafa til að ná langt - hratt. Hann á sjálfur feril og fjölda Íslandsmeistaratitla sem 800m hlaupari og lítur hér yfir hugarfar og æfingaaðferðir þeirra tíma og hvernig sú reynsla og þekking sem hann hefur sópað að sér yfir áratugina hefur breyst og bæst. 

Gunnlaugur fór frá því að að vera reykjandi skrifstofumaður yfir í að ryðja braut ultrahlaupa á Íslandi. Vegferð hans er tilviljunum háð en Gunnlaugur hljóp ekki sitt fyrsta maraþon fyrr en hann var 48 ára gamall. Þar hófst mikil vinna, agi og markmiðasetning sem tók hann gegnum m.a. 400km keppnishlaup þegar hann var kominn á sjötugsaldurinn.

Gunnlaugur var járnagaður í sínum undirbúningi og deilir hér ýmsum hindrunum og aðferðum sem hann nýtti sér til að herða hausinn. Hann hljóp sem dæmi maraþon kl. 05:30 alla laugardagsmorgna en á sunnudögum svaf hann út og hljóp ekki fyrr en 06:30.

Hér er mikill innblástur og fróðleikur á ferðinni.

Arnar Pétursson: brautarhlauparinn, götuhlauparinn, ultrahlauparinn, hlaupaþjálfarinn og faðirinn (með kennsluréttindi). Hér ræðum við bætingar þvert á allar keppnisvegalengdir, erfiðustu keppnisvegalengdirnar, háfjallaloft, árangur og æfingaaðferðir, framþróun hlaupara og heimsmet Noregs og Keníu.