Lestin

Lestin

Download on the App Store

All Lestin episodes

  • Björk, Like-takkinn, Listin og listamaðurinn
    Í Lestinni í dag er meðal annars fjallað um Cornucopia-tónleikaröð Bjarkar Guðmundsdóttur sem nú stendur yfir í menningarmiðstöðinni The Shed í New York. Hér er á ferðinni mikið sjónarspil sem vakið hefur mikla athygli, sjálf hefur Björk kallað viðburðinn stafrænt leikhús. Fyrstu tónleikarnir fóru fram fyrir viku en þeir síðustu verða 1. júní. Útsendari Lestarinnar, Freyr Eyjólfsson, var í The Shed á mánudagskvöld, og gefur skýrslu í Lestinni í dag. Í þriðju útgáfa veftímaritsins Flóru er að finna 11 greinar, um brennandi og áleitin málefni, allt frá höfuðklútanotkun yfir í núvitund á tímum loftslagsröskunnar. Er hægt að aðskilja list frá listamanni? heitir ein grein útgáfunnar. Þar skrifar Steinunn Ólína Hafliðadóttir um mörk listaverka og listamanna og veltir því fyrir sér hvort hægt sé að njóta listar án tenginga við bakgrunn og athafnir listamannsins sjálfs. Rætt verður við Steinunni í Lestinni í dag. Og Halldór Armand Ásgeirsson rithöfundur flytur pistil í Lestinni á þriðjudegi og fjallar um like-takkann.
    55 min
  • Joy Division, Hnallþóran, I am the Night, Mælginn
    Hnallþóran er yfirskrift sýningar sem nýlega var opnuð í galleríinu Midpunkt í Kópavogi. Þar vinna þær Sigurrós Guðbjörg Björnsdóttir og Berglind Erna Tryggvadóttir með hina íslensku hnallþóru, sem stundum er kölluð stríðsterta, sem listhlut og reyna að finna henni nýtt hlutverk í síbreytilegu landslagi íslenskrar matarmenningar. Lestin heimsækir Midpunkt í dag og rætt verður við Sigurrós um hina sjónrænu þjóðargersemi, hnallþóruna, í þætti dagsins. Fjörutíu ár verða í júní líðin síðan platan Unknown Pleasures, Óþekktar nautnir, með hljómsveitinni Joy Division kom út. Ian Curtis og félagar áttu aðeins örfá starfsár en náðu þó að hafa mikil áhrif á síðpönkið í Bretlandi og líklega um heim allan. Rýnt verður í merkilega plötu með merkilegri hljómsveit í Lestinni í dag. Rapparinn Mælginn er einn sá gamalreyndasti í reykvísku senunni en hann hefur gefið út tónlist seinustu 17 árin. Hann hefur vakið verðskuldaða athygli í borginni seinustu ár eftir að hafa stigið oft á stokk með hljómsveit sinni Mælginn Big Band. Þórður Ingi Jónsson ræðir í þættinum í dag við Mælginn um rappið, feril hans og hvernig upplifun það var að brjóta ísinn fyrir rappsenuna í Reykjavík, áður en hún varð “kúl“, innan gæsalappa, eitursvöl. Og Áslaug Torfadóttir fjallar í dag um bandarísku sjónvarpsþættina I Am the Night sem veita skemmtilega innsýn í neonlitað lífið í Los Angeles í Bandaríkjunum á sjöunda áratugnum, þótt farið sé ansi frjálslega með fullyrðinguna ,,byggt á sannri sögu."
    55 min
  • Camp, Tangerine Dream, Vampire Weekend
    Síðasta föstudag kom út fjórða breiðskífu bandarísku indísveitarinnar Vampire Weekend, Father of the Bride, sem er jafnframt þeirra fyrsta í sex ár. Platan er leitandi, bæði inn á við í sálarlíf söngvarans Ezra Koenig, en líka út á við í tónlist annarra heimsálfa, og er með allra bestu plötum sem komið hafa út í ár. Davíð Roach Gunnarsson hellir sér ofan hyldjúpan hljóðheim Föðurs Brúðarinnar í Lestinni í dag. Met Gala, viðburðurinn sem er gjarnan kallaður Óskar tískuheimsins, átti sér stað síðasta mánudag. Þemað var að þessu sinni Camp. Í þættinum í dag verður fjallað um viðburðinn og að gefnu tilefni rifjuð upp ritgerð bandarísku fræðikonunnar Susan Sontag um költ hugtakið Camp. Og á dögunum var tilkynnt að ein áhrifamesta raftónlistar-hljómsveit í heimi, þýska hljómsveitin Tangerine Dream, myndi halda tónleika í Gamla-bíói í september. Hljómsveitin var stofnuð árið 1967, hefur sent frá sér ríflega hundrað hljómplötur, samið tónlist við fjölda kvikmynda og tölvuleikja og sjö sinnum verið tilnefnd til Grammy-verðlauna. Fjallað verður um Tangerine Dream í Lestinni í dag, gestir þáttarins verða Ingvar Víkingsson grafískur hönnuður og Árni Matthíasson blaðamaður.
    55 min
  • Eurovision, Converse, Nietzsche, Avengers
    Connie Converse er bandarísk tónlistarkoma sem samdi hugljúfa, háðslega og afar persónulega tónlist fyrir miðbik síðustu aldar. Tónlist hennar leit þó ekki dagsins ljós fyrr en rúmum fimmtíu árum eftir upptökur. Er áhugi óx á lífi hennar og list kom í ljós að tónlistarkonan hafi látið sig hverfa árið 1974. Ekkert hefur til hennar spurst síðan. Við skoðum málið nánar hér í þætti dagsins. Eurovision á Þjóðminjasafninu, hvernig hljómar það ágætu hlustendur? Það er ekki fjarstæða heldur staðreynd, Þjóðminjasafnið kemur víða við, það safnar ekki aðeins gömlum munum, heldur líka siðum og hefðum, og horfir í þeim efnum til samtímans. Þjóðminjasafn Íslands leitar nú eftir aðstoð almennings við að safna upplýsingum um Eurovision hefðir. Ágúst Ó. Georgsson sérfræðingur þjóðháttasafns Þjóðminjasafnsins segir frá í Lestinni í dag.
    Marta Sigríður Pétursdóttir fjallar í dag um bandrísku ofurhetjumyndina Avengers: Endgame eftir Anthony Russo og Joe Russo sem slegið hefur rækilega í gegn, en um er að ræða eina dýrustu kvikmynd sem nokkurn tímann hefur verið gerð. Og þýski heimspekingurinn Friedrich Nietzsche og kenning hans um eilífa endurtekningu hins sama er viðfangsefni Karls Ólafs Hallbjörnssonar í pistli dagsins.
    55 min
  • Ingibjörg, leyfðu því að gerast, dýratónlist
    Ingibjörg Þorbergs, tónskáld, söngkona og fyrrverandi dagskrárstjóri Ríkisútvarpsins andaðist í gær, hún var 91s árs að aldri, fædd í Reykjavík 25. október árið 1927. Ingibjörg var brautryðjandi í laga- og textasmíðum og var til dæmis fyrst allra íslenskra kvenna til að syngja eigið lag inn á hljómplötu. Ferill hennar var langur og glæsilegur og framlag hennar til íslensks tónlistarlífs verður seint ofmetið. Lestin minnist Ingibjargar í dag, gestir þáttarins verður tónlistarfólkið Sigríður Thorlacius og Bubbi Morthens. Samkvæmt dýratónvísindum eru það ekki aðeins manneskjur sem framleiða tónlist. Hvalir, fílar, apar, fuglar og skordýr eru líka fær um að senda frá sér margslungin tónverk. Í pistli sínum í dag veltir Tómas Ævar Ólafsson fyrir sér tónlist dýra og hinum hugmyndafræðilega múr sem sagður er liggja á milli manns og náttúru. Og Halldór Armand Ásgeirsson rithöfundur flytur að venju pistil í Lestinni á þriðjudegi, og verður á persónulegu nótunum, yfirskrift Halldórs í dag: Leyfðu því að gerast!
    55 min
  • Stjörnustríð, Vampire Weekend, Babylon, Ramy
    Tvær sólir í heimi nördamenningar röðuðust upp um helgina þegar Alþjóðlegi Stjörnustríðsdagurinn og ókeypis myndasögudagurinn lentu á sömu dagsetningunni, 4. maí. Í ofanálag höfðu þær sorgarfréttir borist úr Stjörnustríðsheiminum að einn úr upprunalegu leikarateyminu, Peter Mayhew, hefði fallið frá 74 ára gamall. Það var við því að búast að mikið yrði um að vera í verslunum Nexus og sú var raunin, Lestin kom þar við og hlustendur heyra meira af þeirri heimsókn í þætti dagsins.
    Á föstudag kom út nýja plata með bandarísku hljómsveitinni Vampire Weekend, sem stofnuð var í New york árið 2006. Platan nefnist Father of the Bride, um er að ræða fjórðu plötu sveitarinnar, og hefur hún hlotið lofsamlega dóma. Breska kvikmyndin Babylon, eftir ítalska leikstjórann Franco Rosso er oft kölluð besta reggí-mynd allra tíma en myndin, sem frumsýnd var árið 1980, fjallar á félagslega raunsæjan hátt um líf innflytjenda frá Jamæka í Lundúnum á Thatcher-tímabilinu og tónlistarkúltúrinn sem þessir innflytjendur fluttu með sér. Myndin er nú loksins sýnd í bíó í Bandaríkjunum, tæpum 40 árum eftir að hún kom fyrst út en Babylon var á sínum tíma afar umdeild. Þórður Ingi Jónsson segir frá í þættinum í dag. Við hugum líka að tónleikum sem fram fara í New York í kvöld, mjög athyglisverðum, þetta er upphaf tónleikaraðar sem stendur yfir næstu fjórar vikurnar eða svo. Fara fram í splúnkunýrri menningarmiðstöð á Manhattan, miðstöð sem opnuð var fyrir mánuði eða svo.
    Og gamanþættir um líf og störf múslima eru ekki á hverju strái en nýju, bandarísku sjónvarpsþættirnir Ramy benda til að hér sé um auðugan garð að gresja. Áslaug Torfadóttir fjallar um þættina í Lestinni í dag.
    55 min
  • Joey Christ, Strandir, Kemistry & Storm
    Joey Christ gaf nýverið út breiðskífuna Joey 2. Joey, sem er hliðarsjálf Jóhanns Kristófers Stefánssonar, vann plötuna í samstarfi við Martein Hjartarson, BNGR BOY, og er þetta fyrsta platan sem hann gefur út hjá útgáfufyrirtækinu Sony. Jóhann Kristófer er gestur Lestarinnar í dag. Vatn gegnir þýðingarmiklu hlutverki í lífi hans - að gefnu tilefni verður hlustendum Lestarinnar boðið í votan göngutúr í rigningunni í þætti dagsins. Breska plötusnúðatvíeykið Kemistry og Storm ruddi brautina fyrir drum & bass tónlistarsenuna á tíunda áratugnum. Senan þróaðist út úr reif-tímabilinu í Bretlandi en þær Kemistry og Storm stofnuðu útgáfuna frægu Metalheadz ásamt Íslandsvininum Goldie. Kemistry lést í hræðilegu bílslysi fyrir 20 árum síðan og hefur raftónlistarheimurinn minnst Kemistry og framlags hennar á undanförnum vikum. Saga Kemistry & Storm er rakin í Lestinni í dag. Einnig er komið við í Þjóðminjasafninu, þar verður opnuð á laugardag ljósmyndasýningin Lífið fyrir umbreytinguna þar sem Yrsa Roca Fannberg sýnir myndir frá Árneshreppi á Ströndum.
    55 min
  • Atlas, þrá, kettir, Beckett
    Atlas, fyrsta breiðskífa tónlistarmannsins Marteins Sindra Jónssonar, kemur út þann 16. maí næstkomandi á stafrænum miðlum og á vínylplötu um miðjan september 2019 samhliða útgáfutónleikum í Iðnó. Platan var um það bil fjögur ár í smíðum og afraksturinn er víðfeðmur hljóðheimur með kjölfestu í einföldum lagasmíðum þar sem gjarnan bregður fyrir ljóðrænum landslagsmyndum sem sveipaðar eru goðsagnakenndum blæ. Marteinn Sindri verður gestur Lestarinnar í dag og segir frá verkinu. Andi írska leikskáldsins Samuels Becketts hefur svifið yfir vötnum undanfarnar vikur í litlu leikhúsi á Garðatorgi í Garðabæ. Stutt leikrit eftir nóbelskáldið hafa þar lifnað þar við í leikstjórn Trausta Ólafssonar sem einnig þýddi verkin. Rætt verður við Trausta um jaðarleikhús á Íslandi, stutt-leikhús og Beckett-bylgjuna í Garðabæ. Til er tónlist fyrir mannfólk, til er tónlist fyrir plöntur og til er tónlist fyrir ketti. Í pistli sínum í dag fjallar Tómas Ævar Ólafsson um tónsmiðinn og sellóleikarann David Teie sem fyrir þremur árum gaf út plötuna Music for Cats, með tónverkum sem eru sérstaklega ætluð köttum. Og Halldór Armand Ásgeirsson rithöfundur flytur pistil í Lestinni á þriðjudegi.
    55 min
  • Laxnessverðlaun, Homecoming, The Act, podcast
    Það var tilkynnt í síðustu viku að breski rithöfundurinn Ian McEwan hlyti Bókmenntaverðlaun Halldórs Laxness, en þetta er í fyrsta sinn sem verðlaunin eru veitt. Þessi verðlaun verða veitt annað hvert ár en tilefnið er að hundrað er eru liðin frá því að Halldór Laxness gaf út sína fyrstu skáldsögu, Barn náttúrunnar. Verðlaunin nema 15.000 evrum og þau eru veitt alþjóðlega þekktum rithöfundi sem stuðlað hefur að endurnýjun sagnalistar með verkum sínum. Nokkur umræða hefur orðið um valið á Ian McEwan á samfélagsmiðlum, málið verður rætt í Lestinni í dag, gestir þáttarins verða þau Fríða Björk Ingvarsdóttir rektor Listaháskóla Íslands og Kristján B. Jónasson, bókaútgefandi. Marta Sigríður Pétursdóttir fjallar í dag um kvikmyndina Yuli sem sýnd er í BíóParadís um þessar mundir. Myndin er eftir spænska kvikmyndaleikstjórann Icíar Bollain, og byggir á ævi kúbverska ballettdansarans og stórstjörnunnar Carlosar Costa, en myndin byggir á sjálfsævisögu Costa, Now Way home, engin leið heim, frá árinu 2007, þar sem hann greinir frá erfiðri bernsku í Havana og því hvernig hann dansaði sig upp á stærstu svið Vesturlanda og varð að goðsögn í dansheiminum. Marta fjallar einnig um kvikmyndina Homecoming sem er nýjasta gjöf ofurstjörnunnar Beyoncé til aðdáenda sinna, um er ræða tónleika- og heimildamynd sem fjallar um sögulega stjórtónleika hennar á Coachella-tónlistarhátíðinni í fyrra, myndin var frumsýnd þann 17. apríl síðastliðinn og samhliða kom út tónleikaplata sem er aðgengileg á spotify. Beyoncé leikstýrir myndinni sjálf, sem er óður til fjölskyldu, samfélags og réttindabaráttu svartra í Bandaríkjunum. Eitt vinsælasta hlaðvarp heimsins er bandaríski þátturinn Last Podcast on the Left. Þetta kallast sakamálagrín eða “true crime comedy“ en í þættinum er fjallað á glettinn hátt um allt hið dökka og dimma í lífinu svo sem hrylling, raðmorðingja, sértrúarsöfnuði og samsæriskenningar. Heilinn á bak við þáttinn er útvarpsmaðurinn Marcus Parks, rætt verður við Parks í Lestinni í dag um aukinn áhuga almennings á sönnum sakamálum og rugluðum samsæriskenningum. Saga Blanchard-mæðgna er svo sannarlega ótrúleg en bandarísku sjónvarpsþættirnir The Act dansa eigi að síður á línunni milli þess að vera skemmtiefni og óskammfeilin tilraun til þess að velta sér upp úr eymd annarra. Áslaug Torfadóttir segir frá þáttunum í þætti dagsins.
    55 min
  • Setning bókmenntahátíðar
    Eftir fréttir klukkan fjögur hófst bein útsending frá Ráðhúsi Reykjavíkur þar sem Bókmenntahátíð í Reykjavík var sett. Umsjónarmenn Víðsjár og Lestarinnar tóku þar á móti góðum gestum í tilefni dagsins, og eftir fréttir klukkan fimm var setningarathöfninni útvarpað. Á meðal gesta í Ráðhúsinu voru Stella Soffía Jóhannesdóttir, framkvæmdastjóri Bókmenntahátíðar í Reykjavík, bókaútgefendurnir María Rán Guðjónsdóttir og Páll Valsson, Fríða Ísberg rithöfundur og Gauti Kristmannsson prófessor í þýðingafræðum við Háskóla Íslands og bókmenntagagnrýnandi. Einnig var rætt við Óttar Proppé verslunarstjóra í Bóksölu stúdenta.
    55 min