កិច្ចប្រជុំកំពូលអាស៊ានលើកទី៤៣ នាទីក្រុងហ្សាការតា ប្រទេសឥណ្ឌូនេស៊ី ពីថ្ងៃទី៤ដល់ថ្ងៃទី៧កញ្ញា បានបញ្ចប់។ ក្រោមវត្តមានរបស់បណ្តាមេដឹកនាំអាស៊ាន និងមេដឹកនាំប្រទេសធំៗជាច្រើន ដែលបានចូលរួមនោះ ត្រូវបានគេកត់សម្គាល់ថា លោក ហ៊ុន ម៉ាណែត ជាប្រមុខមេដឹកនាំដែលមានវ័យក្មេងជាងគេ នៅក្នុងព្រឹត្តិការណ៍អាស៊ានលើកទី៤៣នេះ។ លោក ពុយ គា អ្នកសារព័ត៌មានកម្ពុជាដែលតាមដានព្រឹត្តិការណ៍អាស៊ាន លើកឡើងថា លោកនាយករដ្ឋមន្ត្រី​ ហ៊ុន ម៉ាណែត ទទួលបានការគោរពស្មើភាពគ្នា ពីបណ្តាមេដឹកនាំនានាលើឆាកអាស៊ាន។ បើតាមលោក ពុយ គា គឺមេដឹកនាំនានាបានស្វាគមន៍លោកនាយករដ្ឋមន្ត្រី ហ៊ុន ម៉ាណែត ដោយមិនគិតថា ចាស់ ឬក្មេង។