ដំណាក់កាលខ្លះនៃរដូវប្រាំងនៅប្រទេសកម្ពុជាត្រូវបានជំនួសដោយកូនរដូវភ្លៀងតូចៗ ដោយសារតែបញ្ហាប្រែប្រួលអាកាសធាតុ ហើយកម្ពុជាបានរងឥទ្ធិពលពីសម្ពាធបរិយាកាសជាបន្តបន្ទាប់បណ្តាលឲ្យមានភ្លៀងធ្លាក់ទាំងនៅក្នុងរដូវប្រាំង។ លោក ចាន់ យុត្ថា រដ្ឋលេខាធិការ និងជាអ្នកនាំពាក្យក្រសួងធនធានទឹក និងឧត្តុនិយម បានថ្លែងឲ្យដឹងថាឥទ្ធិពលនៃបាតុភូតឡានីញ៉ា ធ្វើឲ្យរដូវប្រាំងនៅកម្ពុជាប្រៀបដូចមិនមែនរដូវប្រាំង។ បាតុភូតធម្មជាតិបែបនេះ ធ្លាប់បានកើតមានក្នុងរយៈពេលរាប់សិបឆ្នាំម្តង ដូចជាករណីមានជំនន់ខែចេត្រកាលពី៥០ឆ្នាំមុននៅឯខេត្តកំពង់ស្ពឺ។