ចាប់ពីថ្ងៃស្អែកនេះ រហូតដល់ថ្ងៃទី៣០​ ខែកញ្ញា កម្ពុជានឹងរងនូវឥទ្ធិពលព្យុះទី១៦ ឈ្មោះ ណូរុ (NORU) ដែលអាចនឹងធ្វើឲ្យខេត្តមួយចំនួនបន្តរងជំនន់ទឹកភ្លៀង(Flash flood)។ ព្យុះនេះ កំពុងតែមានឥទ្ធិពលលើប្រទេសមួយចំនួន នៅក្នុងតំបន់អាស៊ីអាគ្នេយ៍ ហើយត្រូវបានចាត់ទុកថាជាព្យុះ កំណាចប្រចាំឆ្នាំ។ លោក ចាន់ យុត្ថា រដ្ឋលេខាធិការ និងជាអ្នកនាំពាក្យក្រសួងធនធានទឹក និងឧតុនិយម បញ្ជាក់ប្រាប់វិទ្យុបារាំងអន្តរជាតិថា ព្យុះនេះមិនបក់កាត់ចំពីលើប្រទេសកម្ពុជានោះទេ ពោលគឺវាស្ថិតនៅខាងជើងជួរភ្នំដងរែក ដូច្នេះកម្ពុជាទទួលឥទ្ធិពលដោយប្រយោល ប៉ុន្តែបើព្យុះនេះចុះមកកៀកភ្នំដងរែក​ នោះឥទ្ធិពលប្រយោលនឹងមានកាន់តែខ្លាំង។ ទោះបីជាយ៉ាងណា តិច ឬច្រើន របាយទឹកភ្លៀងប្រាកដជាមានគួរសម សម្រាប់បណ្តាខេត្តមួយចំនួនក្នុងប្រទេសកម្ពុជា។