ក្រុមអ្នកជំនាញបច្ចេកទេសខ្មែរ និងបារាំងពីសាលាបារាំងចុងបូព៌ា បាននិងកំពុង​ដំឡើង​និងជួសជុល​រូប​ព្រះសិវៈរាំ ពី​បំណែកថ្មតូចធំជាង១ម៉ឺនដុំ ដែលមានប្រភពមកពីតួ​ប្រាសាទក្រហមនៅកោះកេរ នាសតវត្ស​ទី១០។ ក្នុងបទសម្ភាសជាមួយវិទ្យុបារាំងនៅថ្ងៃទី​៥កុម្ភៈ ឆ្នាំ២០២៤​ ​លោក ឆាន់ ចំរើន អនុប្រធាននាយកដ្ឋានគាំពារ និងអភិរក្សសំណង់បុរាណនៃក្រសួងវប្បធម៌នៅអភិរក្សដ្ឋានអង្គរ ឱ្យដឹងថា ​រយៈពេល៦ឆ្នាំមកនេះ ការ​ផ្គុំថ្មនិងការ​​ដំឡើងរូបបដិមារធំជាងគេនៅអាស៊ីនេះ ​បានសម្រេច​៨០%​ហើយ ខណៈផ្នែក​សេសសល់​២០%ទៀត អ្នកជំនាញ​​នឹង​បន្តជួសជុល​ និងបំពេញដោយ​​ការប្រើល្បាយ​ថ្មថ្មី​ជំនួសឱ្យថ្មដែលផ្គុំមិនបាន។ តាម​បុរាណវិទូរូបនេះ ​រូបព្រះសិវៈរាំនឹងមានរូបរាងតាមទម្រង់ដើមវិញនៅឆ្នាំ២០២៥ខាងមុខ និងបើតាមគម្រោងរូបបដិមាដ៏ល្អល្អះនេះនឹងត្រូវដាក់តាំងបង្ហាញជាថ្មី ក្នុង​ទីតាំងណាមួយក្បែរ​​ប្រាសាទក្រហម នៅ​កោះកេរដដែល។ ​