ភ្ញៀវប្រចាំថ្ងៃរបស់វិទ្យុបារាំងអន្ដរជាតិ RFI នាថ្ងៃនេះ គឺលោក ចន ណារិទ្ធ អនុរដ្ឋលេខាធិការក្រសួងសេដ្ឋកិច្ច និង ហិរញ្ញវត្ថុ និងជាអគ្គលេខាធិការក្រុមប្រឹក្សាជាតិគាំពារសង្គម។ តាមរយៈក្រុមប្រឹក្សាជាតិគាំពារសង្គម រដ្ឋាភិបាលកម្ពុជា បានចំណាយទឹកប្រាក់ជាង៦០០លានដុល្លារ ដើម្បីឧបត្ថម្ភជូនគ្រួសារក្រីក្រនិងងាយរងគ្រោះ ក្នុងអំឡុងពេលប្រយុទ្ធប្រឆាំងនឹងជំងឺកូវីដ១៩។ បច្ចុប្បន្ននេះ បើតាមលោក ចន ណារិទ្ធ បើទោះបីជាស្ថានភាពជំងឺកូវីដ១៩នៅកម្ពុជាហាក់មានសភាពធូរស្រាលជាងមុន ចំណែកសេដ្ឋកិច្ចជាតិក៏កំពុងតែកម្រើកឡើងវិញក៏ដោយ ក៏រដ្ឋាភិបាលបានសម្រេចជាគោលការណ៍រួចហើយថា នឹងបន្តផ្ដល់ប្រាក់ឧបត្ថម្ភដល់ពលរដ្ឋក្រីក្រនិងងាយរងគ្រោះ រហូតដល់ខែកញ្ញាឆ្នាំ២០២២។ និងថា រដ្ឋាភិបាលមានមហិច្ឆតាផ្ដល់ការគាំពារសង្គមដល់ពលរដ្ឋគ្រប់ៗគ្នា នៅទូទាំងប្រទេស នាពេលអនាគត។