គណបក្សភ្លើងទៀនកាលពីថ្ងៃម្សិលមិញបានសម្រេចបន្តនីតិវិធីនៃការដាក់ពាក្យសុំចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ សម្រាប់ការបោះឆ្នោតជ្រើសតាំងតំណាងរាស្ត្រនីតិកាលទី៧នេះ។ គណបក្សក៏សម្រេចកោះប្រជុំគណៈកម្មាធិការនាយក និងថ្នាក់ដឹកនាំរាជធានី-ខេត្ត ទូទាំងប្រទេស ដើម្បីពិនិត្យស្ថានការណ៍នយោបាយបច្ចុប្បន្ននៅក្នុងប្រទេសកម្ពុជាផងដែរ។ លោក គីមសួរ ភីរិទ្ធ អ្នកនាំពាក្យគណបក្សភ្លើងទៀនបានថ្លែងឲ្យដឹងថា គណបក្សភ្លើងទៀននឹងបន្តដាក់ឯកសារដែលខ្វះចន្លោះទៅគណៈកម្មាធិការជាតិរៀបចំការបោះឆ្នោត(គ.ជ.ប)ម្តងទៀតនៅថ្ងៃស្អែក និងរង់ចាំការសម្រេចពីគណៈកម្មាធិការនាយកផងដែរនៅថ្ងៃនេះ ទាក់ទងទៅនឹងស្ថានការណ៍នយោបាយបច្ចុប្បន្ននៅកម្ពុជា។