អំឡុងពេលឃោសនារកសម្លេងឆ្នោតរយៈពេល២១ថ្ងៃនេះ គណបក្សខ្មែរតែមួយ បានបង្ហាញនូវគោលនយោបាយរបស់ខ្លួនចំនួន៨ចំណុច ដែលចំណុចទាំងនោះផ្តោតទៅលើប្រព័ន្ធយុត្តិធម៌ ព្រំដែនដីគោក ការសិក្សាអប់រំ សុខមាលភាពប្រជាពលរដ្ឋ វិស័យការងារ វិស័យកសិកម្ម មនុស្សចាស់ជរាគ្មានទីពឹង និងជនពិការ និងចុងក្រោយគឺការបង្កើតច្បាប់ភូមិបាលដើម្បីរារាំងប្រជាពលរដ្ឋកុំឲ្យលក់ដីស្រែ។ គោលនយោបាយចំណុចចុងក្រោយនេះ«កុំលក់ដីស្រែ»នេះ ត្រូវបានលោក គុជ លី ស្ថាបនិក និងជាប្រធានគណបក្សខ្មែរតែមួយយល់ថាជាគោលនយោបាយសំខាន់ជាងគេ ដែលគណបក្សផ្សេងទៀតមិនមាន។ ទាក់ទងទៅនឹងយុទ្ធនាការឃោសនាបោះឆ្នោតរយៈពេល៥ថ្ងៃកន្លងទៅនេះ លោក គុជ លី យល់ឃើញថាអាចទទួលយកបានចំពោះសន្តិសុខសណ្តាប់ធ្នាប់ ក៏ប៉ុន្តែលោកមិនសប្បាយចិត្តចំពោះពេលវេលានៃការឃោសនា ដែលញាំញីទៅដោយទឹកភ្លៀង។