អគ្គនាយកដ្ឋាន​ការពារ​អ្នកប្រើប្រាស់ ​កិច្ចការ​ប្រកួតប្រជែង ​និង​បង្ក្រាប​ការ​ក្លែងបន្លំ​ «ក.ប.ប.​» ​រយៈពេល៣ថ្ងៃ ​គឺ​ចាប់ពី​ថ្ងៃទី​២៦ ​ដល់​ថ្ងៃ​ទី​២៨ ខែ​វិច្ឆិកា ​ឆ្នាំ​២០២៣ ​នៃ​ព្រះរាជពិធី​បុណ្យអុំទូក​ បណ្តែតប្រទីប ​និង​សំពះព្រះខែ ​អកអំបុក ​បាន​ចុះ​ត្រួតពិនិត្យ​ម្ហូបអាហារ​ ភេសជ្ជៈ ​និង​ផលិតផល​ផ្សេង​ៗ​ទៀត ​តាម​ទីតាំង​នានា​ជុំវិញ​កន្លែង​ប្រារព្ធ​ព្រះរាជពិធី​។ ​ដោយ​បែងចែក​មន្ត្រី​ជា​៣​ក្រុម ​និង​ប្រើប្រាស់​រថយន្ត​ពិសោធន៍​ចល័ត​ លោក ​ហេង មាលី ​ប្រធាន​សាខា ​ក.ប.ប ​រាជធានី​ភ្នំពេញ ​បាន​ថ្លែង​បញ្ជាក់ថា ​ក្រុមការងារ​របស់​លោក​បានរកឃើញ​ករណី​ហាមឃាត់​ចំនួន​ពីរ​ ក្នុងនោះ​ទី​១ ​ករណី​ចាក់ចាហួយ​នៅក្នុង​បង្គារ​ចំនួន​២​គីឡូក្រាម ​និង​មួយទៀត​មានការ​ដាក់ផ្លាក​សញ្ញា​មិនមាន​អនុលោមភាព​នៃ​ផលិតផល​ចំនួន​២០​កញ្ចប់​។ ​ដោយឡែក​ចំពោះ​ភេសជ្ជៈ​ ដែល​ហួស​កាលបរិច្ឆេទ​នៃ​ការប្រើប្រាស់​វិញ ​គឺ​មិនមាន​ផលិតផល​ភេសជ្ជៈ​ណាមួយ ​ដែលត្រូវបាន​រកឃើញ​ទេ​។ ​នេះបើតាម​លោក ​ហេង មាលី​។