ថ្ងៃទី០៣ ខែមីនា ឆ្នាំ២០២៥នេះ គឺជាទិវាវប្បធម៌ជាតិលើកទី២៧ ក្រោមប្រធានបទ «យុវជនដើម្បីវប្បធម៌ជាតិ»។ តែពិធីអបអរទិវាវប្បធម៌ជាតិនេះត្រូវបានលើកទៅធ្វើនៅថ្ងៃទី០៥ ខែមីនា ឆ្នាំ២០២៥ វិញ ដោយភ្ជាប់ជាមួយនឹងកម្មវិធីជួបជុំសំណេះសំណាលប្រចាំឆ្នាំរវាងនាយករដ្ឋមន្ត្រី និងអ្នកសិល្បៈ។ នៅក្នុងកិច្ចសម្ភាសជាមួយវិទ្យុបារាំងអន្តរជាតិ RFI នាថ្ងៃទី០៣ ខែមីនា ឆ្នាំ២០២៥នេះ លោក ហេង សុផាឌី សាកលវិទ្យាធិការនៃសាកលវិទ្យាល័យភូមិន្ទវិចិត្រសិល្បៈបានកត់សម្គាល់ឃើញថា ក្នុងរយៈពេលចុងក្រោយនេះ យុវជនខ្មែរបានចូលរួមគាំទ្រ និងលើកស្ទួយយ៉ាងផុលផុសដល់វិស័យសិល្បៈវប្បធម៌ខ្មែរ ពិសេសតាមបណ្តាញសង្គម។