នៅថ្ងៃ​ទី​០៤ ខែវិច្ឆិកា ឆ្នាំ​២០២៤នេះ ទឹកជំនន់​បានជន់លិចស្រុក​ចំនួន២ ក្នុងខេត្តកំពង់ស្ពឺ​ គឺស្រុកគងពិសី និង​ស្រុកបសេដ្ឋ។ ​ក្រៅពីនេះ ​ទឹកជំនន់​បានពន្លិច​ផ្លូវជាតិ​លេខ៣​ មួយចំហៀង​ប៉ែក​កំពង់ស្ពឺ​ចំនួន២​កំណាត់ ​ដែលធ្វើឲ្យ​ចរាចរណ៍​រថយន្តដឹកទំនិញ​ធុនធ្ងន់ត្រូវបាន​ផ្អាក​ជាបណ្តោះអាសន្ន​នៅថ្ងៃទី​០៤ ​វិច្ឆិកានេះ​។ នៅក្នុង​កិច្ចសម្ភាសន៍​ជាមួយ​វិទ្យុបារាំង RFI ​នាថ្ងៃទី០៤ ​ខែវិច្ឆិកា ​ឆ្នាំ​២០២៤នេះ ​លោក ហន ពិសិដ្ឋ ​អភិបាលស្រុក​គងពិសី​បានថ្លែងថា ​ការជន់លិច​ស្រុក​គងពិសី និង​ស្រុកបសេដ្ឋ​បណ្តាលមកពី​មូលហេតុ​ចំនួនពីរ​គឺ ទី១​ ពលរដ្ឋ​មួយចំនួន​បានចាក់ដី​លុបប្រឡាយ​ និងទី២ ​ប្រឡាយ​ដែលកំពុងស្តារ​នៅមិនទាន់​បើកទូលំទូលាយ​នៅឡើយ​។