តម្លៃប្រេងឥន្ធនៈនៅក្នុងប្រទេសកម្ពុជាបានឡើងដល់កំរិតមួយជិតមួយដុល្លារកន្លះសម្រាប់សាំងធម្មតាគឺ ៥ ៥៥០រៀល ហើយប្រេងម៉ាស៊ូតឡើងដល់ ៥ ៨០០រៀល ក្នុង១លីត្រ និងឡើងលើសមួយដុល្លារកន្លះ សម្រាប់សាំងស៊ុបពែរ ពោលគឺឡើងជាង៦ពាន់រៀល ក្នុង១លីត្រ។ លោក ជឹម វឿន ប្រធានសមាគមអ្នកដឹកជញ្ជូនរថយន្តធុនធ្ងន់ឲ្យដឹងថាអាជីវកម្មដឹកជញ្ជូនបានរងផលប៉ះពាល់យ៉ាងខ្លាំងពីការឡើងថ្លៃប្រេងឥន្ធនៈ ដែលកាន់តែខ្ពស់ទៅៗ។ តាមលោក ជឹម វឿន ម្ចាស់រថយន្តដឹកជញ្ជូនមួយចំនួនបានផ្អាកអាជីវកម្មរបស់ខ្លួន ហើយមួយចំនួនទៀតនៅបន្តយ៉ាងលំបាក ដើម្បីសងបំណុលធនាគារ បើទោះណាជាចំណូលរបស់ពួកគេធ្លាក់ទាបជាងមុនខ្លាំងក៏ដោយ។