អង្គការអភិរក្សសត្វព្រៃ WCS នៅថ្ងៃសុក្រស្អែកនេះ នឹងរៀបចំការតាំងផលិតផលរូបថតជីវៈចម្រុះដែលមាននៅបឹងទន្លេសាប ដើម្បីចូលរួមអបអរទិវាភពផែនដី។ នៅឆ្នាំនេះ អង្គការអភិរក្សសត្វព្រៃបានរៀបចំទិវាមួយនេះឡើង ដោយកំណត់ប្រធានបទថា «វិនិយោគលើភពផែនដីយើង វិនិយោគលើទន្លេសាបយើង»។ ដូច្នេះក្នុងនាមជាភ្ញៀវប្រចាំរបស់វិទ្យុយើងនារាត្រីនេះ លោក កែន សេរីរដ្ឋា ប្រធានអង្គការ WCS ប្រចាំកម្ពុជា បានបញ្ជាក់ថា ប្រធានបទនេះមានសារៈសំខាន់ សម្រាប់ស្វែងរកកិច្ចគាំពារបឹងទន្លេសាប។ លោកថា នៅឆ្នាំនេះ ជាឱកាសមាសក្នុងការការពារបឹងទន្លេសាប ក្រោយតែរដ្ឋាភិបាលបានបើកយុទ្ធនាការបង្រ្កាបបទល្មើសទន្ទ្រានដីព្រៃលិចទឹកកន្លងមក។