គិតត្រឹម​ថ្ងៃទី​១៤ ​ខែ​ឧសភា ​ឆ្នាំ​២០២៤​នេះ ​ក្រសួងការងារ​បាន​បញ្ចូន​ពលការិនី​ខ្មែរ​ចំនួន ​៥២រូប​ក្នុងចំណោម​ពលការិនី​សរុប ​៩០រូប​ ដែលចាញ់បោក​មេខ្យល់​នាំទៅ​ធ្វើការ​នៅ​ប្រទេស​អារ៉ាប៊ី សាអូឌីត​។ ​នៅក្នុងកិច្ចសម្ភាសន៍​ជាមួយ​វិទ្យុបារាំង​អន្តរជាតិ ​RFI ​នៅថ្ងៃ​អង្គារ ​ទី​១៤ ​ខែ​ឧសភានេះ ​លោក ​កត្តា អ៊ន​ ប្រធានក្រុម​អ្នក​នាំពាក្យ​ក្រសួងការងារ​ និង​បណ្តុះបណ្តាល​វិជ្ជាជីវៈ​បានបញ្ជាក់ថា ​ពលការិនី​ខ្មែរ​ទាំង​៩០នាក់​នឹងត្រូវ​ធ្វើមាតុភូមិនិវត្តន៍​មកកម្ពុជា​ទាំងអស់​នៅពេល​ឆាប់ៗ​ខាងមុខនេះ​។ តាម​ លោក​ កត្តា អ៊ន ​ក្រសួង​ការងារ​ក៏កំពុង​ដំណើរការ​នីតិវិធី​ស៊ើបអង្កេត​ដំណាលគ្នា​ដែរ​លើ​ក្រុមហ៊ុន ​និង​បុគ្គល​ដែល​ជាមេខ្យល់​បោកប្រាស់​នាំ​ពលការិនី​ទៅធ្វើការ​នៅ​អារ៉ាបី សាអូឌីត​។