តាំងពីដើមអាណត្តិទី៧នៃរដ្ឋាភិបាលថ្មីនាចុងឆ្នាំ២០២៣ ប្រមុខរដ្ឋាភិបាលកម្ពុជា លោក ហ៊ុន ម៉ាណែត បានដាក់ចេញនូវការងារអាទិភាពចំនួន៦ចំណុចដល់ក្រសួងការងារ និងស្ថាប័នពាក់ព័ន្ធផ្សេងៗទៀត។ ការងារអាទិភាពទាំង៦ ចំណុចរួមមានការប្រឹងប្រែងតម្លើងប្រាក់ឈ្នួលអប្បបរមាដល់កម្មករនិយោជិត ដំណើរការរបបសន្តិសុខសង្គម(ប.ស.ស) ដំណើរការបណ្តុះបណ្តាលវិជ្ជាជីវៈដល់យុវជនក្រីក្រ ១,៥លាននាក់ រួមទាំងអនុសាសន៍បន្ថែមដូចជាការបង្កើតទារកដ្ឋាន និងការកែប្រែមធ្យោបាយដឹកកម្មករប្រកបដោយសុវត្ថិភាព។ នៅក្នុងកិច្ចសម្ភាសជាមួយវិទ្យុ RFI នាថ្ងៃទី១០ ខែមីនា ឆ្នាំ២០២៥ នេះ លោក កត្តា អ៊ន អ្នកនាំពាក្យក្រសួងការងារបានអះអាងថា ក្រសួងបានសម្រេចកិច្ចការជាច្រើនក្នុងចំណោមអនុសាសន៍ទាំងអស់ដែលដាក់ចេញដោយប្រមុខរដ្ឋាភិបាល ក្នុងនោះការប្រើប្រាស់ ប.ស.ស មានរហូតដល់ជាង២២លានដងក្នុងឆ្នាំ២០២៤។