អ្នក​នាំ​ពាក្យ​ក្រសួង​ការ​ងារ​លោក​កត្តា អ៊ន​បាន​អះអាង​ថា ​មន្ត្រី​ជំនាញ​នឹង​សើរើ​ឡើង​វិញ​ បើ​រក​ឃើញ​កម្មករខ្លះ​នៅ​រោង​ចក្រ ​អ.ជី ហ៊្វូតវែ​មាន​ប្រើប្រាស់​កិច្ច​សន្យា​មិន​កំណត់​ថេរ​វេលា។​ ការ​បំភ្លឺ​នេះ​ធ្វើឡើង​ក្រោយ​ពីសហជីព​បាន​ថ្លែង​ថា ​មាន​តែ​កម្មករ​ពាក់​កណ្តាល​ប៉ុណ្ណោះ​ក្នុង​ចំណោម​កម្មករ​ជាង​២ពាន់​នាក់​ដែល​យល់ព្រម​ទទួល​យក​ដំ​ណោះស្រាយ​របស់​ក្រសួង​ការងារ​លើ​អត្ថប្រយោជន៍​ចំនួន ​៣​ចំណុច​។ ​ក្នុង​បទ​សម្ភាសជា​មួយ​វិទ្យុ​បារាំង​អន្តរ​ជាតិ ​RFI​ លោក ​កត្តា ​អ៊ន​បាន​ថ្លែង​ថា ​រោង​ចក្រ​ អ.ជី ហ៊្វូតវែ ​ដែល​ត្រូវ​បាន​ភ្លើង​ឆេះ​ទើប​តែ​ដូរ​ឈ្មោះថ្មី​ពី​រោង​ចក្រ​ចាស់​ឈ្មោះ ​រី ជែន​ ។​ តាម​លោក​កត្តា ​អ៊ន​ បើ​កម្មករណា​ដែល​ធ្លាប់​ធ្វើ​ការ​នៅ​រោងចក្រ​ចាស់ ​និង​មិន​ទាន់​ទូទាត់​អត្ថប្រយោជន៍​អស់ គឺ​អាច​សើ​រើ​ឡើង​វិញ​៕