ភ្លៀងរយៈពេល២សប្តាហ៍កន្លងទៅនេះ បានធ្វើឲ្យស្រុកចំនួន៤ នៅខេត្តសៀមរាប និងស្រុកមួយចំនួនទៀតនៃបណ្តាខេត្តនៅជាប់ព្រំដែនកម្ពុជាថៃរងការជន់លិចដោយជំនន់ទឹកភ្លៀង។ ដើម្បីការពារការខូចខាតហេដ្ឋារចនាសម្ព័ន្ធផ្លូវថ្នល់រដ្ឋបាលខេត្តសៀមរាប បានសម្រេចបិទចរាចរណ៍រថយន្តដឹកទំនិញធុនធ្ងន់គ្រប់ប្រភេទ លើកំណាត់ផ្លូវក្នុងភូមិសាស្ត្រខេត្តសៀមរាប ជាបណ្តោះអាសន្ន។ លោក លី សំរិទ្ធ អភិបាលរង និងជាអ្នកនាំពាក្យសាលាខេត្តសៀមរាបបានថ្លែងថា ថ្វីត្បិតតែស្ថានភាពទឹកមិនទាន់មានការគម្រាមកំហែងដូចជាករណីព្យុះកេតសាណាកាលពីឆ្នាំ២០១១ក៏ពិតមែន ក៏ប៉ុន្តែអាជ្ញាធរខេត្ត និងក្រុមការងារគ្រប់គ្រងគ្រោះមហន្តរាយបានត្រៀមលក្ខណៈជាប្រចាំ ដើម្បីបញ្ចៀសស្ថានការណ៍អាក្រក់ណាមួយជាយថាហេតុ ដែលបណ្តាលមកពីគ្រោះធម្មជាតិនេះ។