នៅ​ព្រឹក​ថ្ងៃ​ទី​០៦ ខែ​ឧសភា ឆ្នាំ​២០២៥ នេះ អាជ្ញាធរ​ខេត្ត​ព្រះសីហនុ​បាន​ប្រជុំ​ផ្សព្វ​ផ្សាយ និង​ពិគ្រោះ​យោបល់​ស្តីពី​លទ្ធផល​បឋម​នៃ​សេចក្តី​ព្រាង​របាយការណ៍​សិក្សា​វាយ​តម្លៃ​ផល​ប៉ះ​ពាល់​បរិស្ថាន និង​សង្គម​លើ​គម្រោង​បង្កើត​រោង​ចក្រ​កែ​ច្នៃ​អាលុយ​មីញ៉ូម និង​ផលិត​គ្រឿង​បន្ទាប់​បន្សំ​សម្រាប់​បន្ទះ​សូឡា​របស់​ក្រុមហ៊ុន​ឯក​ជន​។ ​ក្នុង​បទ​សម្ភាស​ជា​មួយ​វិទ្យុបារាំង​អន្តរ​ជាតិ ​RFI ​នៅ​ថ្ងៃ​ទី​៦ ឧសភា ​លោក ឡុង ឌីម៉ង់​ អ្នក​នាំពាក្យ​ខេត្ត​ព្រះសីហនុ​បញ្ជាក់​ថា ​គម្រោង​នេះ​ជា​ការ​កែ​ច្នៃ​កាក​សំណល់​រឹង​ដើម្បី​ធ្វើ​ស៊ុម​បន្ទះ​សូឡា​ ពោល​មិន​មែន​ជា​រោង​ចក្រ​ផលិត​បន្ទះ​សូឡា​ទេ​។