មុន​កិច្ច​ប្រជុំ​គណៈ​កម្មា​ធិ​ការ​បេតិ​ក​ភណ្ឌ​ពិភព​លោក​ដែល​ធ្វើ​នៅទី​ក្រុង​រីយ៉ាដ ​ប្រទេស ​អារ៉ាប៊ី​សាអូឌីត​ ពី​ថ្ងៃ​ទី ​១០​ ដល់​ ២៥​ ខែ​កញ្ញា​ ​អង្គ​ការ​លើក​លែង​ទោស​អន្តរ​ជាតិ ​បាន​ជំរុញ​ឲ្យ​មាន​ការ​ពិភាក្សា​ពី​«ការ​បណ្តេញ​ពលរដ្ឋ​ចេញ​ពី​តំបន់​អង្គរ»​។​ ប៉ុន្តែ​បើតាម​អាជ្ញាធរ​កម្ពុជា​ គឺ​ពលរដ្ឋ​ទាំង​នោះព្រម​ចាក​ចេញ​ដោយ​ស្ម័គ្រ​ចិត្ត​ ហើយ​អះ​អាង​ថា​ទី​តាំង​ថ្មី​ បាន​និង​កំពុង​អភិវឌ្ឍន៍​ហេដ្ឋា​រចនា​សម្ព័ន្ធ ​។ ​លោក ​ឡុង ​កុសល ​អគ្គនា​យក​រង​អាជ្ញាធរ​ជាតិ​អប្សរា​ ថ្លែងថា ​អ្នក​ជំនាញ​គណៈ​កម្មា​ធិការ​ICC​ អង្គរ​បាន​ចុះទៅ​ដល់​ទី​តាំង​ថ្មី​ផ្ទាល់​ និង​បាន​ទទួល​ស្គាល់​ចំពោះ​ការ​រៀប​ចំ​នេះ​។ ​លើស​ពី​នេះ ​លោក ​អះអាង​ថា ​គណៈ​កម្មា​ធិការ​ICC​ អង្គរ ​នេះក៏​ត្រូវ​បាន​អង្គ​ប្រ​ជុំ​នៅ​ទី​ក្រុង​រីយ៉ាដ​ យល់​ស្រប​ថា​ «ជាគំរូ»​ ក្នុង​ការ​យក​ទៅ​អនុវត្ត​តាម ​សម្រាប់​ធ្វើ​ការ​អភិរក្ស​ និង​អភិវឌ្ឍន៍​តំបន់​បេតិ​ក​ភណ្ឌ​ពិភព​លោក​។​