អស់​រយៈពេល​១សប្តាហ៍​ចុងក្រោយ​នេះ​ ភ្លៀង​បាន​ធ្លាក់​នៅក្នុង​កំរិត​មួយ​ខ្ពស់​ ជាពិសេស​នៅលើ​ភូមិសាស្ត្រ​ខេត្ត​កំពង់ស្ពឺ ​ខណៈ​ដែល​ប្រទេស​កម្ពុជា​ពេលនេះ​ កំពុង​ស្ថិត​នៅក្នុង​ដំណាក់កាល​នៃរដូវប្រាំង។​ ការ​ធ្លាក់ភ្លៀង​យ៉ាង​គំហុក​រហូត​ទៅដល់​កំរិត​ ៣០០មីលីម៉ែត្រ​នេះ ​ធ្វើឲ្យតំបន់​១​ចំនួន​នៃខេត្ត​កំពង់ស្ពឺ ​ខេត្ត​កណ្តាល ​និង​ជាយក្រុង​ភ្នំពេញ​ខ្លះ ​រងនូវ​ការ​លិចលង់​ ដែល​មិន​ដែល​ធ្លាប់មាន។​ លោក ​ម៉ៅ ហាក់​ អនុប្រធាន​អាជ្ញាធរ​ទន្លេសាប​ និង​ជាអ្នក​ជំនាញ​ផ្នែកឧត្តុនិយម​ និង​ធនធាន​ទឹក​បាន​កត់​សម្គាល់​ថា ​ជំនន់​រដូវប្រាំង​នេះ ​មាន​លក្ខណៈ​ចំលែក​ ខុសរដូវ​ ដែល​លោក​សន្និដ្ឋានថា​ វា​បណ្តាល​មកពី​កត្តា​នៃការ​ប្រែប្រួល​អាកាស​ធាតុ ​ការឡើង​កំដៅ​នៃភពផែនដី ​ទើប​បង្ក​ឲ្យមាន​ភ្លៀង​ធ្លាក់​ដូច្នេះ។ ​លោក​ថា​បាតុភូត​នេះ ​ទំនង​មិនមែន​ជាវដ្ត​ដូច​ជា​រដូវ​វស្សានោះ​ទេ ​ខណៈទសវត្សរ៍​ឆ្នាំ៥០​ ខេត្ត​កំពង់ស្ពឺ​ធ្លាប់​មាន​ជំនន់​រដូវប្រាំង​ម្តង។​