គិតត្រឹមឆមាសទី១ ដើមឆ្នាំ២០២៥ នេះ អគ្គិភ័យបានកើតឡើងចំនួន ២៦៦លើក ពោលថយចុះចំនួន ៣១លើកធៀបនឹងរយៈពេលដូចគ្នាក្នុងឆ្នាំ ២០២៤។ តែចំនួនអ្នកស្លាប់ដោយសារអគ្គិភ័យមានចំនួន១៤នាក់ ពោលកើនឡើងចំនួន ៧នាក់ធៀបនឹងរយៈពេលដូចគ្នាក្នុងឆ្នាំ២០២៤។ រីឯចំនួនផ្ទះ និងតូបដែលបានឆេះមានការថយចុះច្រើន។ នៅក្នុងកិច្ចសម្ភាសជាមួយវិទ្យុបារាំងអន្តរជាតិ RFI នាថ្ងៃទី១៤ ខែឧសភា ឆ្នាំ២០២៥ នេះ លោកឧត្ដមសេនីយ៍ឯក នេត វន្ថា ប្រធាននាយកដ្ឋាននគរបាលបង្ការ ពន្លត់អគ្គិភ័យ និងសង្គ្រោះនៃអគ្គស្នងការដ្ឋាននគរបាលជាតិក្រសួងមហាផ្ទៃបានកត់សម្គាល់ថា នៅដើមឆ្នាំ២០២៥នេះ អគ្គិភ័យបានកើតឡើងច្រើនលើរោងចក្រ និងក្លឹបកំសាន្តដែលពុំមានប្រព័ន្ធបង្ការអគ្គិភ័យឲ្យបានត្រឹមត្រូវ។