ក្រសួង​ការបរទេស​អាមេរិក​បាន​ប្រកាស​ផ្តល់​ពាន​រង្វាន់​ អ្នក​ការពារ​សិទ្ធិមនុស្ស​ប្រចាំ​ឆ្នាំ២០២២​ ទៅ​កញ្ញា ​ឈឹម ស៊ីថរ ​ដែល​ជា​មេសហជីព​មួយ​រូប​ និង​កំពុង​ជាប់​ឃុំឃាំង​ក្នុង​ពន្ធនាគារ​។ លោក​ នី សុខា ​ប្រធាន​សមាគម​ការពារ​សិទ្ធិ​មនុស្ស​អាដហុក​ បាន​ថ្លែង​ថា ​ពាន់​រង្វាន់​នេះ​គឺ​ជា​ការ​ផ្តល់​តម្លៃ​ខ្ពស់ ​សម្រាប់​អ្នក​ការពារ​សិទ្ធិមនុស្ស​ តាមរយៈ​សកម្មភាព​ដែល​កញ្ញា ​ឈឹម ស៊ីថរ​ បាន​លះបង់​នា​ពេល​កន្លង​មក។​ លោក​បន្ត​ថា ​នេះក៏ជាពាន​រង្វាន់​មួយ​ ដែល​លើកទឹក​ចិត្ត​ដល់​អ្នក​ការពារ​សិទ្ធិមនុស្ស​ដទៃ​ទៀត ​មិន​ត្រឹម​តែ​កញ្ញា​ ឈឹម ស៊ីថរ​ ប៉ុណ្ណោះទេ។​ បើ​តាម​លោក នី សុខា​ ចង់​ឬមិនចង់​ ការ​ផ្តល់​ពានរង្វាន់​ដល់​ កញ្ញា ​ឈឹម ស៊ីថរ ​អាច​មាន​ឥទ្ធិពល​ខ្លះ​ទៅលើការ​សម្រេច​របស់​តុលាការ​ ក្នុង​ការ​ពិចារណា ​ដោះលែង ​និង​ទម្លាក់​ចោល​ការ​ចោទប្រកាន់​មកលើកញ្ញា។​