ច្បាប់​ស្តីពី​សិទ្ធិ​ទទួល​បាន​ព័ត៌មាន​អាច​នឹង​ត្រូវ​អនុម័ត​នៅក្រោយ​​ការ​​បោះ​ឆ្នោត​ឆ្នាំ២០២៣​។ ​នេះ​ជា​ការ​​ប្តេជ្ញា​ចិត្ត​ជា​ថ្មី​ម្តង​ទៀត​​របស់​​ប្រមុខ​​រដ្ឋាភិបាល​​កាល​ពី​ម្សិលមិញ​ ដែល​​កន្លង​មក​​លោក​​ធ្លាប់​​ប្តេជ្ញា​ថា​​រុញ​ឲ្យ​ចេញ​ច្បាប់​នេះ​​នៅ​ក្នុង​អាណត្តិទី​៦​នេះ។​ អ្នក​​​​តស៊ូ​​មតិ​​ជំរុញ​ឲ្យ​​ចេញ​​ច្បាប់​នេះ ​យល់​ថា ​ភាព​​យឺត​យ៉ាវ​នេះ​​ការ​អនុម័ត​ច្បាប់​ស្តីពី​សិទ្ធិ​ទទួល​បាន​ព័ត៌​មាន​ គឺ​មក​ពី​ឆន្ទៈ​នយោបាយ ​មិន​មែន​មក​ពី​បញ្ហា​បច្ចេក​ទេសនោះ​ឡើយ​។​ ការ​លើក​ឡើង​យ៉ាង​ដូច្នេះ ​ដោយសារ​តែ​សេចក្តី​ព្រាង​ច្បាប់​នេះ ​ត្រូវ​បាន​រៀប​ចំ​ឡើង​ជា​ច្រើន​ឆ្នាំ​មក​ហើយ​។​