សមាគមសម្ព័ន្ធអ្នកសារព័ត៌មានកម្ពុជា ហៅកាត់ថា (ខេមបូចា) បានប្រកាស នៅថ្ងៃសុក្រទី១៣ធ្នូថា សមាគមនឹងដាក់ឲ្យដំណើរការ ក្របខណ្ឌតាមដាននិងឃ្លាំមើលសុវត្ថិភាពអ្នកសារព័ត៌មាន។ លោក ណុប វី នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជា បានផ្តល់បទសម្ភាសន៍ដល់វិទ្យុបារាំងអន្តរជាតិ ដោយបញ្ជាក់ថា ក្របខណ្ឌតាមដាននិងឃ្លាំមើលនេះ ផ្អែកទៅលើផែនការសកម្មភាពរបស់អង្គការសហប្រជាជាតិស្តីពីសុវត្ថិភាពអ្នកសារព័ត៌មាននិងបញ្ហានិទណ្ឌភាព និងសូចនាករសុវត្ថិភាពអ្នកសារព័ត៌មានរបស់អង្គការយូណេស្កូ។ បើតាមលោកណុប វី ក្របខណ្ឌតាមដាននិងឃ្លាំមើលនេះ នឹងជួយដោះស្រាយបញ្ហាសុវត្ថិភាពអ្នកសារព័ត៌មាន ជាពិសេសលើសេចក្តីរាយការណ៍លើប្រធានបទរសើប។