ក្រសួងពាណិជ្ជកម្ម នៅថ្ងៃពុធ បានផ្សព្វផ្សាយឲ្យប្រើប្រាស់ជាផ្លូវការនូវ «គោលនយោបាយជាតិស្វាយចន្ទីឆ្នាំ២០២២-២០២៧» ក្រោយការជជែកវែកញែកជាមួយភាគីពាក់ព័ន្ធតាំងពីឆ្នាំ២០១៩។ ជាគោលនយោបាយជាតិស្វាយចន្ទី ដែលចង់លើកកម្ពស់ទិន្នផល ជំរុញការកែច្នៃ និងជំរុញការធ្វើពិពធកម្មទីផ្សារនាំចេញផលិតផលស្វាយចន្ទី។ លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម គូសបញ្ជាក់ថា ដំណាំស្វាយចន្ទី គឺជាដំណាំកសិកម្មអាទិភាព​ ហើយគោលបំណងចម្បងនៃគោលនយោបាយស្វាយចន្ទី២០២២-២០២៧ គឺការវិនិយោគរបស់បរទេសនិងក្នុងស្រុក ទៅលើការកែច្នៃ។