ផ្តើមចេញពីរឿងក្ងោក ប្រមុខរដ្ឋាភិបាលកម្ពុជាលោក ហ៊ុន សែន នៅថ្ងៃអង្គារនេះ បានចេញបទបញ្ជាដោយផ្ទាល់មាត់ ដោយស្នើឲ្យអ្នកច្បាប់សិក្សា និងធ្វើវិសោធនកម្មកថាខណ្ឌមួយចំនួននៃច្បាប់ស្តីពីព្រៃឈើ និងសត្វព្រៃ ទាក់ទងទៅនឹងការអនុញ្ញាត និងការលើកទឹកចិត្តឲ្យប្រជាពលរដ្ឋអាចមានសិទ្ធិចិញ្ចឹមប្រភេទសត្វដែលជិតផុតពូជបាន។ លោក ប៊ូ វរសក្ស នាយកអង្គការជីវិតធម្មជាតិនៅកម្ពុជា បានសម្តែងនូវការគាំទ្រដល់ការលើកឡើងរបស់លោកនាយករដ្ឋមន្ត្រី ដោយទន្ទឹមគ្នានេះអង្គការរបស់លោកនឹងរីករាយក្នុងការចូលរួម ពិនិត្យនិងធ្វើការសិក្សា ប្រសិនបើមានកិច្ចសហការឲ្យចូលរួមពីផ្នែកពាក់ព័ន្ធ។