នៅថ្ងៃទី០៦ ខែធ្នូ ឆ្នាំ២០២៤នេះ ក្រុមអង្គការសង្គមស៊ីវិល អ្នកប្រកបរបរសេដ្ឋកិច្ចក្រៅប្រព័ន្ធ សហជីព យុវជន និងប្រជាពលរដ្ឋប្រមាណ៣០នាក់ បាននាំគ្នាធ្វើធម្មយាត្រាដើម្បីអបអរសាទរទិវាសិទ្ធិមនុស្ស១០ធ្នូ លើកទី៧៦។​ ធម្មយាត្រា បានចេញដំណើរពីទីរួមខេត្តកំពត ឆ្ពោះទៅកាន់ទីក្រុងភ្នំពេញ ដោយត្រូវចំណាយពេលវេលាចំនួន៣ថ្ងៃ ​ក្នុងគោលបំណងផ្តល់សារចងចាំដល់មហាជនស្តីពីទិវាសិទ្ធិមនុស្សអន្តរជាតិថ្ងៃទី១០ ធ្នូ។ នៅក្នុងកិច្ចសម្ភាសជាមួយវិទ្យុបារាំង RFI នាថ្ងៃទី០៦ ខែធ្នូ ឆ្នាំ២០២៤នេះ លោក សាន់ ម៉ាឡា ប្រធានកម្មវិធីបណ្តាញ និងតស៊ូមតិនៃអង្គការភាពជាដៃគូដើម្បីបរិស្ថាន និងការអភិវឌ្ឍន៍ បានកត់សម្គាល់ថាអាជ្ញាធរគ្រប់ជាន់ថ្នាក់បានជួយសម្រួលឲ្យធម្មយាត្រារបស់ក្រុមលោកធ្វើដំណើរដោយរលូន។