បន្ទាប់ពី​លោក​នាយក​រដ្ឋមន្ត្រី ​ហ៊ុន ម៉ាណែត ​ដាក់​បទបញ្ជា​ឲ្យ​ពិនិត្យមើល​ឡើងវិញ​នូវ​បញ្ហា​ចរាចរណ៍​ សមត្ថកិច្ច​នគរបាល​រាជធានី​ភ្នំពេញ​បាន​ចាប់ផ្តើម​បើក​យុទ្ធនាការ​រឹត​បន្តឹង​ច្បាប់​ស្តីពី​ចរាចរណ៍​ផ្លូវគោក​ ជាពិសេស​ការត្រួត​ពិនិត្យ​ជាតិ​ស្រវឹង​នៅ​រាត្រី​ថ្ងៃ​ទី​២៥ ​ខែ​មករា ​ឆ្នាំ​២០២៤។​ ជាការ​ត្រួតពិនិត្យ​ក្រោយ​សោកនាថកម្ម​គ្រោះថ្នាក់​ចរាចរណ៍​កាលពី​សប្តាហ៍មុន ​ដែលធ្វើ​ឲ្យ​មនុស្ស​៤​នាក់​ស្លាប់ ​ដោយសារ​ជន​បង្ក​បើកបរ​ក្រោម​ឥទ្ធិពល​នៃ​គ្រឿង​ស្រវឹង​។ នៅ​ក្នុង​បទ​សម្ភាសជាមួយ​​វិទ្យុ​បារាំង​អន្តរជាតិ ​RFI នៅ​ថ្ងៃសុក្រ ទី​២៦​ ខែមករា​​នេះ ​លោក ​សំ វិច្ឆិកា ​អ្នកនាំពាក្យ​នៃ​ស្នងការដ្ឋាន​នគរបាល​រាជធានី​ភ្នំពេញ​បានបញ្ជាក់​ថា​យុទ្ធនាការ​រឹតបន្តឹង​ច្បាប់​ស្តីពី​ចរាចរណ៍​ផ្លូវគោក​នេះ ​ត្រូវបាន​អនុវត្ត​ទាំងថ្ងៃ​ទាំងយប់ ​ដោយ​មិនបាន​ប្រាប់ជា​មុន និង​គ្មាន​ពេល​កំណត់​។ ​ជា​លទ្ធផល ការ​ត្រួតពិនិត្យ​ទាំង​១៤​ខណ្ឌ​ព្រមគ្នា ​នៅភ្នំពេញ​​កាលពី​​ថ្ងៃ​ព្រហស្បតិ៍​ម្សិលមិញ ​សមត្ថកិច្ច​រកឃើញ​អ្នក​ល្មើសច្បាប់​ចរាចរណ៍​មួយចំនួន ​ក្នុងនោះ​ក៏មាន​អ្នកបើកបរ​មាន​គ្រឿង​ស្រវឹង​ផងដែរ​។