នៅ​ថ្ងៃ​នេះ ​តាម​រយៈ​ប្រព័ន្ធ​តេលេកក្រាម​ លោក​នាយក​រដ្ឋមន្ត្រី ​ហ៊ុន សែន ​បាន​ប្រកាស​ស្វាគមន៍​លោក​ សួង សុភ័ណ្ឌ ​ប្រធាន​គណបក្ស​ខ្មែរ​ឈ្នះ ​ដែល​បាន​ស្នើ​សុំ​មក​រួម​ជីវភាព​នយោបាយ​ជា​មួយ​នឹង​គណបក្ស​ប្រជាជន​កម្ពុជា។​ តាម​រយៈ​កិច្ច​សម្ភាស​ជា​មួយ​វិទ្យុ​បារាំង​អន្តរជាតិ ​លោក​ សួង សុភ័ណ្ឌ​ ដែល​ជា​ប្រធាន​គណបក្ស​ខ្មែរ​ឈ្នះ ​បាន​អះអាង​ថា​ មូលហេតុ​ដែល​លោក​សម្រេច​រួម​ផ្លូវ​ជា​មួយ​គណបក្ស​កាន់​អំណាច​ គឺ​ដោយ​សារ​តែ​បក្ស​ប្រឆាំង​ចាប់​ផ្តើម​បែក​ខ្ញែក​គ្នា ​មិន​អាច​សហការ​គ្នា​បាន។​ តាម​លោក​ សួង សុភ័ណ្ឌ ​ទោះបី​ជា​ពេល​នេះ ​លោក​ត្រូវ​ប្តូរ​ទ្រនំ​បក្ស​ តែ​លោក​អះអាង​ថា​ នឹង​មិន​បោះបង់​គោល​ជំហរ​ជួយ​ជាតិ​ជា​ដាច់​ខាត។​