បញ្ហា​ទឹក​ជំនន់​នៅ​ត្រូវ​រដូវ​ភ្លៀង​ធ្លាក់​ឆ្នាំ​នេះ ត្រូវ​បាន​រដ្ឋា​ភិបាលបង្ហាញ​ក្តី​បារម្ភ ដោយ​បញ្ជា​ឲ្យ​អាជ្ញាធរ​យក​ចិត្ត​ទុក​ដាក់​ខ្ពស់ ក្នុង​ការ​បញ្ចៀស​គ្រោះថ្នាក់​ជូនប្រជាពលរដ្ឋ។ លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបញ្ជាក់ថា គ្រោះ​ទឹក​ជំនន់​នៅ​ឆ្នាំ​២០២២​នេះ មាន​សភាពធ្ងន់​ជាង​កាល​ពី​ឆ្នាំ២០២១ ដ្បិត​ភ្លៀងធា្លក់​ជា​ហូរហែចាប់ពីខែឧសភា​មក​ដល់​ខែ​កញ្ញា​នេះ បានធ្វើឲ្យខេត្ត​ចំនួន ​១៩​ត្រូវ​ជន់លិច។ តាម​លោក សុទ្ធ គឹមកុលមុនី ៩ខែ​មក​នេះ គ្រោះ​ទឹក​ជំនន់បាន​សម្លាប់​ប្រជាពលរដ្ឋ​អស់ ​៩នាក់ និង​ខូចខាត​ស្រូវ​ដំណាំ​ពលរដ្ឋជាង​៤ម៉ឺន​ហិកតា។