ធនាគារជាតិ​នៃ​កម្ពុជា​កាលពី​ថ្ងៃ​ទី​១៧ ​ខែ​កញ្ញា ​ឆ្នាំ​២០២៤ ​បាន​ចេញ​សេចក្តីណែនាំ​បន្ថែម​មួយ​ស្តីពី​ការលើកកម្ពស់​ការប្រើប្រាស់​ប្រាក់រៀល​សម្រាប់​សេវា​ទូទាត់​សងប្រាក់​នៅកម្ពុជា​។ ​សេចក្តីណែនាំនេះ​ ត្រូវគេ​មើលឃើញថា​ធ្វើឡើង​ក្រោយ​មាន​ការលើកឡើង​ពី​មហាជន​តាម​បណ្តាញសង្គម​ថា​ធនាគារ​មួយចំនួន​បានគិត​កម្រៃសេវា​ពី​អតិថិជន​ចំពោះ​ការបើក ​និង​បិទគណនី​ជា​ប្រាក់រៀល​។ នៅក្នុង​កិច្ចសម្ភាស​ជាមួយ​វិទ្យុបារាំង ​RFI ​នាថ្ងៃ​ទី​១៨ ខែ​កញ្ញា ​ឆ្នាំ​២០២៤​នេះ ​លោក ​សុខ ចាន់ ​អ្នកនាំពាក្យ​សមាគម​ធនាគារ​នៅ​កម្ពុជា​បានថ្លែងថា​ធនាគារ​ជាតិនៃ​កម្ពុជា​បាន​បញ្ជាក់ហើយ​ថា​ការបើក ​និង​បិទ​គណនី​ប្រាក់រៀល​មិនតម្រូវ​ឲ្យយក​កម្រៃ​សេវាទេ​។ ​អ្នកនាំពាក្យ​សមាគម​ធនាគារ​រូបនេះ​បន្តថា​សមាជិក​សមាគម​ក៏បានផ្តល់​ដំណឹង​មកដែរថា ​ពួកគេ​មិនបាន​យក​កម្រៃ​សេវា​ពីការបើក ​និង​បិទ​គណនីប្រាក់រៀល​ឡើយ​។