ភ្ញៀវប្រចាំ​ថ្ងៃ​របស់​វិទ្យុ​យើង​​នារាត្រី​នេះគឺ ​លោក សុន ឆ័យ ​អនុ​ប្រធាន​គណបក្ស​ភ្លើងទៀន។​ គណបក្ស​ភ្លើងទៀន​ ដែលគេ​មើល​ឃើញថា ​ជាគណបក្ស​ជំទាស់​មាន​សំឡេង​គាំទ្រ​ខ្លាំង​ បានចេញ​នូវសេចក្តី​ថ្លែងការណ៍​ សម្តែង​ការសោក​ស្តាយ​ចំពោះ​លទ្ធផល​នៃការបោះ​ឆ្នោត​ឃុំ-សង្កាត់​ អាណត្តិ​ទី៥ ​ដែលថា​ជាលទ្ធផល ​មិន​ឆ្លុះបញ្ចាំង​ពីឆន្ទៈ​ពល​រដ្ឋ​ខ្មែរ​។ គណបក្ស​ភ្លើង​ទៀន ​បាន​ចាត់ទុក ​ការបោះឆ្នោត​ឃុំ-សង្កាត់ ​អាណត្តិទី​៥​នេះ ​ប្រព្រឹត្ត​ទៅដោយ​មិន​សេរី ​និង​មិន​យុត្តិធម៌។ ​ទោះយ៉ាង​ណា​ លោក ​សុន ឆ័យ ​អនុប្រធាន​គណបក្ស​ភ្លើងទៀន ​គូស​បញ្ជាក់​ថា ​គណបក្ស​គ្មាន​គម្រោង​ធ្វើបាតុ​កម្ម​ប្រឆាំង​នឹង​លទ្ធផល​នោះទេ ​តែបក្ស​នឹង​តស៊ូ​មតិជាមួយ​អ្នកពាក់ព័ន្ធ​នឹង​ការរៀបចំ​ការបោះឆ្នោត ​ដោយសន្តិវិធី។​